2025 оны төсвийн төсөлд Ерөнхийлөгч хориг тавьж, Их хурал хүлээж авснаар чуулганы хуралдаанаар дахин хэлэлцүүлэхээр болсон. Төсвийн төсөлд Соёл, спорт, аялал жуулчлалын сайд Ч. Номингийн захиран зарцуулах багцад тусгасан 18.3 тэрбум төгрөгөөр хүүхдүүдэд соёл, спортын ваучер олгох төсөв маргаан дагуулаад байгаа юм.

     Өөрөөр хэлбэл, үүнийг хамгийн их шүүмжилж байгаа гишүүдийн нэг нь УИХ-ын гишүүн Ж.Баярмаа. Соёл, спорт аялал жуулчлалын сайд Ч.Номин хэвлэл мэдээллээр өгсөн ярилцлагадаа “Соёлын ваучерын 18 тэрбум төгрөгийг би хасуулахгүй Би төсвөө хамгаална хэмээн мэдэгдсэн. Түүний ярилцлагыг УИХ-ын гишүүн Ж.Баярмаа шүүжилж “Ч.Номин ярилцлага өгөхдөө маш их хөрөнгө цацаж, над руу чиглэсэн улс төрийн акц хийлээ. Маш  их санхүү зарсан, хувь хүн рүү чиглэсэн” гэж дахин дахин хэллээ. Би ваучерын асуудлыг анх сөхөж, хасуулах зарчмын зөрүүтэй санал гаргасан хүн нь юм.

    Тэгэхээр намайг хэлээд байна уу. Тийм бол ямар мөнгө хэнээс хэний данс руу орсныг нотолж гаргах нь зөв санагдлаа. Миний хувьд тийм их мөнгө, баг бүрэлдэхүүн, телевиз байхгүй. Уг нь, ваучер биш өвлийн ордон, иргэдийн мэдээллийн төв, Соёлын, дипломат корпус, автозогсоол бүхий жорлонтой цогцолбор, хиймэл дагуул, зураг төсөвгүй, магадлалгүй төсөл, арга хэмжээнүүдийг бүгдийг нь шүүмжилж, 2025 оныхыг бүгдийг нь хас гэсэн зарчмын зөрүүтэй санал гаргасан байгаа. Зун Засгийн газрын бүтэц ярих үед Соёлын яамыг татан буулгах тухай ярьсан нь хэн нэгнийг бус асуудлыг ярьсан ухаантай. Зөвхөн соёл бус Ерөнхий сайдад хандсан болон бусад олон шүүмж, санал, үгийг нөхөж үзээсэй гэж хүсэж байна” хэмээн мэдэгдээд байна.

Ч.НОМИНГИЙН АРД Л.ОЮУН-ЭРДЭНЭ Ж.БАЯРМААГИЙН АРД Ц.ЭЛБЭГДОРЖ БИЙ ЮҮ

       Тэгвэл Ч.Номин, Ж.Баярмаа нар дан ганц ваучер олгох асуудлаар маргаагүй. Үүний цаана улс төрийн томчуудыг хагарал ил болж байна уу гэдэг хардлага олны дунд байна. Угтаа бол Ч.Номин, Ж.Баярмаа нар төсвийн асуудлыг ярьж байгаа мэт боловч ард нь улс төрийн томчуудын эрх ашиг яригдаж байгаа гэсэн үг юм.

Соёл спорт, аялал жуулчлалын сайд Ч.Номингийн хувьд Ерөнхий сайд Л.Оюун-Эрдэнийн хүн гэгддэг. Л.Оюун-Эрдэнэ танхимаа бүрдүүлэхдээ төрийн албанд ажиллаж байсан туршлагагүй Ч.Номинг “тооноор” оруулж, Соёлын сайдаар томилсон. Ч.Номингийн хувьд улс төрийн олон дуулианд өртсөн ч Ерөнхий сайд өнөөдрийг хүртэл улаан цээжээрээ хамгаалж, Сангийн сайд Б.Жавхлан ч Ч.Номингийн төсөвт хир халдаахгүй зүтгүүлж байгаа. Улмаар Ч.Номинг УИХ-ын ээлжит сонгуульд Х.Нямбаатартай хамт Сонгинохайрхан дүүрэгт нэр дэвшүүлж, П.Анужингийн тойргийг авч өгч хүртэл крандсан. Ингэж Ч.Номингийн “дээлийг давхарлаад” ч болов хамгаалж үлдэхээр тэмцсэн.

       Харин Ерөнхий сайдын хамгаалж буй Ч.Номинтой чуулганы хуралдаанд ана мана үзэлцэж буй Ж.Баярмааг Ардчилсан нам жагсаалтын эхний зургаад эрэмбэлж оруулснаас харахад нам дотроо том артай болж таарч байгаа юм. Түүний улс төрд орж ирсэн замналыг үзвэл “Ачит ихт” компанийн захирал П.Цагааныг Боловсрол шинжлэх ухааны сайдаар ажиллаж байх хугацаанд БСШУЯ-нд Гадаад харилцааны хэлтсийн даргаар ажиллаж эхэлсэн намтартай. Мөн 2016-2020 онд УИХ-ын гишүүний туслахаар ажиллаж байсан. Түүнийг АН дотроо “Нэг ардчилал” фракцын хүн гэдэг. Ингээд хөөвөл УИХ-ын гишүүн Ж.Баярмаагийн ард Ерөнхийлөгч асан Ц.Элбэгдорж байх нь. Ташрамд дурдахад УИХ-ын гишүүн Ж.Баярмаагийн ард Сангийн сайд асан С.Баярцогт байгаа гэх мэдээлэл гарахад үгүйсгэж байсан юм.