УИХ-ын Тамгын газрын дэд дарга Э.Лхагва Улс тунхагласны баяраар гэр бүлээрээ битүү шөл хийж идэх даалгавар ерөнхий боловсролын сургуулийн сурагчдад өгөх албан бичиг Боловсролын яаманд хүргүүлсэн талаар мэдээлэл гараад буй. Энэ талаар бид өөрөөс нь тодрууллаа. Тэрбээр "Анхдугаар Үндсэн хуулиа батласны 100 жилийн ойн арга хэмжээ энэ жил тохиож байна. УИХ-аас 2023 онд 100 жилийн ойг тэмдэглэх тухай тогтоол баталж, тэмдэглэн өнгөрүүлэх ажлыг зохион байгуулах ажлын хэсгийг байгуулсан.

Уг тогтоолоор Анхдугаар Үндсэн хуулийн түүхэн ач холбогдлыг шинжлэх ухааны үндэслэлтэй судлах, эрдэм шинжилгээний хурал зохион байгуулах, түүхэн судалгааны болон танин мэдэхүйн бүтээл туурвиж нийтийн хүртээл болгох, Үндсэн хуулиа эрхэмлэн дээдлэх үзэл санааг иргэдэд тайлбарлан таниулах, төрийн ёслол хүндэтгэлийн бусад арга хэмжээний төлөвлөгөөг боловсруулан баталж, хэрэгжилтийг зохион байгуулахыг ажлын хэсэгт даалгасан. Үүний хүрээнд 10-аад ажил зохион байгуулахаар төлөвлөсөн. Хүндэтгэлийн чуулган зарлаж, үзэсгэлэн гаргаж байна.  Үндсэн хуулиа баталж, улс тунхагласан өдрийн ач холбогдлыг иргэд төдийлөн мэддэггүй юм байна. МУИС-ийн 2016 онд хийсэн "Монголын залуу үеийн эх оронч үзэл болон нөлөөлөх хүчин зүйлийг шинжлэхүй" гэсэн судалгаа байгаа. Энэ судалгаагаар иргэд Үндэсний баяр, түүхэн өдрүүдийн ач холбогдлыг хэр мэддэг вэ гэхэд Цагаан сарыг 78 хувь нь, наадмыг 83 хувь, Улс тунхагласан өдрийг 18 хувь, Эх орончдын өдөр 36 хувь, Тусгаар тогтнолоо сэргээн мандуулсан өдрийг 16 хувь мэддэг гэж хариулсан байна. Мөн иргэдийн олонх нь баярын ширээ засаж, гэр бүлээрээ байх нь баярын уур амьсгал нэмэгдүүлдэг гэж хариулсан учраас баярын ширээг нь засуулахаар хийж байгаа ажил юм.

Бусад улс энэ өдрийг яаж тэмдэглэдэг вэ гээд судлаад үзсэн ихэвчлэн үндэсний хоолоо  идэж гэр бүлийн хүрээнд тэмдэглэдэг юм байна. Тиймээс бид гэртээ яаж тэмдэглэх вэ гэдэг дээр судалгаа хийж, "Санан тунхаглах ирээдүй" гэдэг цогц ажил гаргаж ирсэн юм. Үүнд Монгол Улсын хүн бүр гэр бүлийнхэнтэйгээ хамт байж, монгол хоол идэх уриалга дэвшүүлсэн. Монгол хоол гэдэгт аарц, борц хоёр ордог юм байна. Тэгэхээр энэ хоёр нь баярын ширээний хоол болж чадахгүй. Тиймээс шөлтэй хоол зүгээр гэдэг мэргэжлийн хүмүүсийн зөвлөгөөг авсан. Үүнд Монголын ресторануудын холбоотой хамтран ажиллаж байгаа. Ингээд сурталчлан таниулах ажлыг хийж эхлүүлсэн юм. Гол нь Боловсролын яам албан бичгээр албажуулдаг гэхээр нь албан бичиг явуулсан. Анхдугаар Үндсэн хуулиа тэмдэглэх том ажлын хэсгийг Х.Булгантуяа дэд дарга ахалж байгаа.  Дэмжлэг үзүүлэх ажлын хэсгийг тэргүүн дэд дарга Ч.Ариунхур ахлаад, би 100 жилийг сурталчлан таниулах ажлыг нь хариуцаж байна. Миний хариуцсан ажлын хэсэгт Гадаад харилцааны яам, Боловсролын яам, Хууль зүйн Үндэсний архив, МҮОНРТ багтаж, хамтран ажиллаж байгаа юм" гэлээ.