Эрүүл мэндийн даатгалын сангийн санхүүжилт зогссоны улмаас зарим эмнэлгүүд тусламж үйлчилгээгээ төлбөртэй болгож байгаа талаар мэдэгдэл гарсан. Энэ талаар Эрүүл мэндийн сайд Т.Мөнхсайхан мэдээлэл хийлээ. Эрүүл мэндийн даатгалын санд 2021 онд төвлөрөх ёстой 218 тэрбум төгрөг төвлөрөөгүй. Энэ оны төгсгөлд оны санхүүжилтийг татаж, хэрэглэсэнтэй холбоотой хүндрэл гарсан. Гэхдээ өнөөдрийн байдлаар тусламж үйлчилгээг зогсоож, улсын эмнэлгүүд төлбөртэй тусламж үйлчилгээ үзүүлэх нөхцөл байдал үүсээгүй.

Зарим улсын эмнэлгийн Эрүүл мэндийн даатгалын сантай хийсэн гэрээний гүйцэтгэл хэтэрсэн нөхцөл байдал байгаа. Энэ эмнэлгүүдтэй хэлцэл хийж, томуугийн дэгдэлт ихэссэнтэй холбоотой нэн шаардлагатай биш архаг, хууч өвчлөлийг хэвтэн эмчлүүлэхгүй байх чиглэл өгсөн. Үүнд буруу зөрүү ойлголт гарсан. Эрүүл мэндийн даатгалын сан дээр зохицуулалт хийж, сайдын багцуудаас сан руу татах ажлыг хийж байна. Цаашид иргэдэд хүндрэл үүсгэхгүй, санхүүгийн асуудал үүсгэхгүй байхаар ажиллаж байгаа. Мэдэгдэл гаргасан Монгол-Японы эмнэлэг дээр Эрүүл мэндийн даатгалаар тусламж үйлчилгээ хэвийн үзүүлж байгаа. Эрүүл мэндийн даатгалын сан дээр Монгол-Японы эмнэлэг, Улсын III төв эмнэлэг, I төв эмнэлэг, Гэмтэл согог судлалын төв зэрэг эмнэлэгт гэрээний хэтрэлт үүссэн" гэлээ.