Ард иргэдийн эсэргүүцэлтэй тулсан “Халзан бүрэгтэй”-н төслийг Ховд аймгийн Засаг дарга М.Амарсанаагийн тушаалаар зогсоогоод байгаа билээ. Тодруулбал, Ховд аймгийн Мянгад суманд “Халзан бүрэгтэй”-д газрын ховор элементийн ашиглалтын тусгай зөвшөөрөл эзэмшигч  “Монголиан нэшнл рийр ийрт корп” ХХК-ийн үйл ажиллагаа явуулахдаа зөрчил гаргасан болох нь эрх бүхий албан тушаалтны шийдвэрээр тогтоогдож, долоо хоногийн өмнө үйл ажиллагааг нь зогсоосон.

Харин Засгийн газраас мэдээлэл хийж, ЗГХЭГ-ын дарга Н.Учрал “Халзан бүрэгтэй төсөлд тусгай зөвшөөрөл олгох төрийн захиргааны байгууллагын шийдвэр гарчихсан. Тэрийг цуцлах эрх хэнд ч байхгүй. Засгийн газрыг давж, аймгийн Засаг дарга шийдвэр гаргахгүй” гэж мэдэгдээд байгаа.

Бид энэ талаар Ховд аймгийн Засаг дарга М.Амарсанаагаас тодрууллаа.

-“Халзан бүрэгтэй”-н төслийг хэдий хэр хугацаанд зогсоогоод байгаа вэ?

      -Хавар хүртэл түр хугацаанд зогсоосон. Төслийг удирдагч компани нь ард иргэдэд мэдээлэл олгоогүй, ойлголцож чадаагүй. Ийм учраас иргэдийн эсэргүүцэл хурцадмал байдалд орж, эмх замбараагүй байдалд орсон. Энэ үйл явдлыг аймгийн Засаг дарга зүгээр хараад сууж болохгүй биз дээ. Ард иргэдийн амь, эрүүл мэндэд хохирол учрахаас сэргийлж, үйл ажиллагааг нь зогсоосон. Түүнээс биш, тусгай зөвшөөрлийг нь цуцлаагүй. Тэгэх боломж аймгийн Засаг даргад байхгүй.

-Засгийн газраас мэдээлэл хийсэн. Танд ямар нэгэн мэдэгдэл, албан бичиг хүргүүлсэн болов уу?

     -Засгийн газрын бодлогыг дагаж, мөрдөж ажиллах нь аймгийн Засаг даргын үүрэг. Засгийн газрынхаа эсрэг ажиллаж болохгүй шүү дээ. Аж ахуйн нэгж ард түмэнтэй ойлголцож, төслийнхөө үр ашиг, үр шимийг ойлгуулж чадаагүй. Ийм учраас түр зогсоохоос өөр арга байгаагүй.

-Хавраас “Халзан бүрэгтэй”-н төслийг эхлүүлэх юм байна. Дахиад ийм эсэргүүцэлтэй тулбал яах вэ?

      -Аж ахуйн нэгж мэдээллээ сайн өгөх хэрэгтэй. Орчин үеийн техник технологи, хүний эрүүл мэндэд сөрөг нөлөөгүй, хүрээлэн буй орчинд хоргүй гэдгээ ойлгуулах цаг хугацааг олгож, түр хугацаанд зогсоосон шийдвэр. Энэ бүх ажлаа хийнэ. Засгийн газрын бодлогыг би дэмжээд ажиллана.