Засгийн газрын хуралдаанаар зарим асуудлын талаар хэлэлцлээ. Энэ үеэр Цахим хөгжил, инновац, харилцаа холбооны сайд Ц.Баатархүү мэдээлэл өгсөн юм. Тэрбээр “Фэйсбүүк хэрэглэгчдийн дунд цахим залилан түгээмэл гарч байна. фэйсбүүк хэрэглэгчид ямар нэгэн урилгад нууц үгээ оруулахгүй байхыг анхааруулмаар байна. Тагнуулын Ерөнхий газрын дэргэд байдаг нийтийн төв төрийн байгууллагын кибер аюулгүй байдлыг хамгаалж байдаг. Монголд үйл ажиллагаа явуулж буй бүх хувийн хэвшлийг хамгаалах боломжгүй. Тэгэхээр кибер аюулгүй байдлын үнэлгээ хийх журмыг баталж, хувийн хэвшилд эрх олгосон. Цахим систем хэрэглэж буй төрийн 33 байгууллага жил бүр үнэлгээгээ хийлгэж байх ёстой. Улс орны хэмжээнд хөндлөнгийн байгууллагаар аудит хийлгэх хэрэгтэй. Монгол Улс кибер аюулгүй байдал, халдлагад бэлэн байна уу гэдэгт үнэлгээ хийлгэх нь зүйтэй болоод байна гэсэн үг. “Интермед” эмнэлэг технологийн алдаа гаргасан. Учир нь, үндсэн вэб сайт сервирээ нэг дор байршуулсан. Кибер зөрчил, халдлагатай тэмцэх нийтийн төвөөс анхааруулга өгч байсан юм билээ. Гэтэл “Интермэд” эмнэлэг рүү руу аравдугаар сарын 23-нд эхний хортой код нэвтэрсэн байсан. Хакер багийнхан ямар нэгэн хүний юм уу байгууллагын хаягыг нь барьцаалаад тодорхой хэмжээний төлбөр нэхдэг. “Интермед”-д очсон хакерын багийг судалж үзэхэд, европын хэд хэдэн орны эмнэлгийн сайт руу нэвтэрсэн байсан.Тиймээс тогтолцоогоор нь бүрэн сайжруулахын тулд ямар арга хэмжээ авах вэ гэдгийг албаныхан ярилцаж байгаа. Онц чухал мэдээлэл буюу хүний хувийн мэдээллийг хадгалж, дамжуулж байгаа байгууллагууд мэдээллийн технологийн мэргэжилтэн гэдэг нэрийн дор 2-3 хүнийг ажилд авдаг. Кибер аюулгүй байдлын мэдлэгтэй мэргэжлийн хүн авдаггүй учраас иймэрхүү гэмт хэрэг гарч байгаа” гэв.