УИХ-ЫН ГИШҮҮН Д.ЭНХТҮВШИН ХЭНИЙ ЗАХИАЛГААР "ХЭЛД ОРОВ"

      Засгийн газрын бодлогыг байнга эсэргүүцдэг тэмцэгч, хэнээс ч, юунаас ч айдаггүй баатар болоод байгаа гишүүдийн нэг нь Д.Энхтүвшин. Төсвийн үеэр "Би МАН-ын хүн биш, Засгийн газар хүчтэй юм. Би та хэдийн ард түмний боломжийг хулгайлсан хулгайтай чинь эцэсээ хүртэл тэмцэнэ" гэсэн нь, ЗГХЭГ-ын дарга Н.Учрал руу дайрч, чичилсэн нь түүний хувьд санаандгүй явдал биш. УИХ-ын гишүүн Д.Энхтүвшин улс төрийн ямар зорилготой, юунд санаархаад эхлэв, түүний ард хэн байгаа болоод тэр “хэлд оров” гэдэг нь улс төрийг сонирхолтой болгож байгаа. Нөгөөтэйгүүр түүний энэхүү үг, үйлдлүүд нь МАН-ын фракц хэрхэн хуваагдсан, хагаралдсан болохыг, тэр хэнийх нь багт орчихоод томроод байгааг ч харж болно. Өөрөөр хэлбэл, төрийн томчууд МАН дотроо нам бүрдүүлчихээд шинэ багт нь багтсан Д.Энхтүвшин тэргүүтэнгүүд том эзэнтэй болсноо өөрсдөө тунхаглаж, айхгүй барихгүй дээрээ тулаад буй гэх яриа бий. Тэрбээр УИХ-ын сонгуулиар жагсаалтын есд бичигдэж, УИХ-ын болсон. Тухайн үед түүнийг Ерөнхий сайдын сойж буй нэр нөлөө бүхий залуучуудын нэг гэх яриа гарч байсан. Харин сүүлийн үеийн үйл явдлаас харахад, Ерөнхий сайд болоод тэдний багийнхны баталсан төсвийг илтэд шүүмжилж, олноос сайшаал хүртээд амжсан. 

Тэрбээр төсөв баталсаны дараа “Данхар төсвийг тануулж чадсангүй. Хамтарсан Засгийн газар ард түмэнтэйгээ хийсэн нийгмийн гэрээгээ эрээ цээргүй зөрчлөө. Засгийн газар янз бүрийн шалтаг, заль, шахалт ашиглан ямар ч буулт хийлгүй, оруулсан төсвөө хүч түрэн бүрэн батлууллаа. Тэд хамтдаа их хүчтэй юм байна. Засгийн газар ард түмнээ сонсож чадахааргүй өндрөөс өндөрт хөөрсөн байна. Буцааж байранд нь буулгаж хариуцлага тооцох цаг удахгүй ирэх байх. Төсвийн урсгал зардлыг буруулах шаардлагыг 25 гишүүн дэмжиж хүч түрсэн. Гишүүд нэмэгдэх нь. Ард түмний боломжийг хулгайлсан хулгайтай үр дүнд нь хүртэл тууштай тэмцэнэ” хэмээн өөрийн цахим хуудастаа тэмцлийн хэлбэрт шилжиж байгаагаа илэрхийлсэн. Түүний энэ үйлдэл нь УИХ-ын гишүүдийг гараа өргөөд төсөв баталж байгаад нь бус Засгийн газрын гишүүдтэй бялуу хуваалтаас болоод сайнгүй болчихсоныг нь харуулж байгаа юм. УИХ-ын гишүүн Д.Энхтүвшин 2025 оны төсвийн төсөл дэх зарчмын зөрүүтэй саналуудын талаар мэдээлэл хийхдээ "Засгийн газрын үйл ажиллагааны хөтөлбөрийн эсрэг байр сууриа илэрхийлсэний төлөө Н.Учрал сайдаас дарамт ирсэн" гэж мэдэгдсэн байдаг.

      Улмаар Засгийн газрын Хэрэг эрхлэх газрын дарга Н.Учрал "Засгийн газрын үйл ажиллагааны хөтөлбөр боловсруулах үеэр МҮХАҮТанхимыг урьж ажиллуулж саналуудыг нь тусгасан байтал санал аваагүй гээд байхаар нь Д.Энхтүвшин гишүүнээс асуусан асуулт маань дарамталж байгаа мэт санагдсан бололтой. Төсөв хэлэлцэх үеэр Д.Энхтүвшин гишүүнийг би дарамтлах байтугай нэг үг ч солиогүй. Чуулган, байнгын хороогоор ч бид хоёрт зөрчилдсөн зүйл байхгүй" гэж хариу тайлбар өгсөн. Тэгвэл УИХ-ын гишүүн Д.Энхтүвшин өөрийн твиттер хуудсаараа дамжуулан "Танхимаас гаргасан гол санал нь хамтарсан Засгийн газарт орсон намуудын сонгуулийн мөрийн хөтөлбөртөө тусгасан эдийн засаг, бизнесийг дэмжих чиглэлийн заалтуудыг нь засгийн газрын үйл ажиллагааны хөтөлбөртөө тусгах тухай байсан. Үгэнд чинь орсонгүй гэж намайг намаас хөөж, намын бүлэг дээр арга хэмжээ авахуулах хүсэлтэй байгаа сурагтай байсан. Би МАН-ын гишүүн биш, намын бүлгээс хөөвөл хөөгдье. Дараа нь хэвлэл мэдээлэл, сошиал, янз бүрийн аргаар дайрч дарамтлах бол тэрнээс чинь айхгүй шүү. Мөн чи бид хоёулаа үхэл, амьдралын зааг дээр очоод буцаж ирсэн хүмүүс. Амьдралын хоёр дахь боломжоо яагаад эгэл жирийн хүмүүсийн төлөө зориулж болохгүй байгаа юм бэ, эсвэл ядаж саад болохгүй байя л даа" хэмээсэн нь сүүлийн үед олны анхаарлыг ихэд татаад буй. Иймэрхүү тайлбар мэдэгдлүүдээрээ хэлд орсноо батлаад байгаа Д.Энхтүвшин өмнө нь юу ч болж байсан ганц ч үг ган хийдэггүй байснаас нь харахад тэр яалт ч үгүй том эзэнтэй, баталгаатай артай болж, улс төрд хөл нийлүүлжээ.

Түүнээс гадна УИХ-ын гишүүн Ч.Анар Ерөнхий сайдын айлчлалыг шүүмжилж, буруу юм хийгээд байгааг нь сануулсан. Ямартай ч МАН-ын гишүүд төсөвтэй, төсөвгүй Ерөнхий сайдыгаа, МАН-аа шүүмжилж талцал бий болгоод эхэллээ. Харин тэдний улс төр цааш хэрхэн үргэлжлэх бол.