УИХ-ын гишүүн асан Д.Өнөрболорын ухуулагчаар ажиллаж байсан эмэгтэй нас барсан билээ. Тодруулбал, Төв аймгийн Баяндэлгэр сумын иргэн, Д.Өнөрболорын шадар туслахаар ажиллаж байсан 62 настай, Ц гэх эмэгтэй нас барсан харамсалтай хэрэг гарсан. Талийгаач тэр өдөр сумын айлуудаар явж, ухуулга, сурталчилгаагаа хийж, намын байрандаа тайлангаа тавиад явсан. Ингээд шөнө нь амиа алдсан юм.

Бид талийгаачийн хүүтэй холбогдож, хэрэг нь хэрхсэн талаар тодрууллаа. Мөн уг хэрэгт ямар нэгэн байдлаар хэн нэгэн улс төрийн болон эрүүгийн хариуцлага хүлээсэн талаар хариулт авсан юм.

Х.Ананд “Ээж маань эрүүл мэндийн шалтгаанаар амиа алдсан учраас хэрэг нь хаагдсан. УИХ-ын гишүүн байсан Д.Өнөрболор гэдэг хүн бидэнтэй ирж уулзаагүй. Ээж маань угтаа тэр хүний шадар туслах, ухуулагчаар ажиллаж, өглөөнөөс орой хүртэл ядартлаа явсан. Гэсэн ч ирж уулзаагүй. Гэхдээ би гомдолгүй ээ, хэнд ч гомдох билээ дээ. Ээж бид хоёр хоёулаа амьдарч байсан. Одоо би Улаанбаатар хотод сургуульдаа сурч байгаа учраас гэртээ очиж чадахгүй байна” гэлээ.