Энхтайваны гүүрээс тэмээтэй хөшөө хүртэлх авто замын ажил хэд хоногийн өмнө хийгдсэн.  Харамсалтай нь, дээр дурдсан чиглэлийн авто замд технологийн алдаа гарсан нь олон нийтийн шүүмжлэл дагуулаад байгаа. Тодруулбал, зассан замын нэг хэсэг нь хотгор, гүдгэр болж, технологийн алдаа гарсан юм.

Дээрх чиглэлийн замын шинэчлэлийг "Трүйрөүд" ХХК хийж гүйцэтгэжээ. Тодруулбал, уг компани Энхтайваны гүүрээс тэмээтэй хөшөө хүртэлх замыг нийслэлийн төсвийн 2.8 тэрбум төгрөгөөр засварласан билээ.

Тэгвэл бид шинэчилсэн замыг дахин хэзээ шинэчилж, засварлах талаар "Трүйрөүд" ХХК-ийн захирал З.Батжаргалтай холбогдож тодруулахад “Хэмжилт хийгдээд дуусаж байна. Одоогоор ямар алдаа гарсан гэдэг нь тодорхойгүй байна. Ямартай ч бид засварлаж, хүлээлгэж өгөх ажил хийнэ. Цаг агаарын нөхцөл байдлаас болоод энэ ондоо багтаж засварлах эсэх нь тодорхойгүй байна. Ямартай ч цаг агаар дулаархыг хүлээж байна” гэв.