Ардчилсан намын бүлгээс төсөв хэлэлцэж буйтай холбоотойгоор мэдээлэл өглөө.

       Энэ үеэр бүлгийн дарга О.Цогтгэрэл "Ардчилсан намын бүлгээс төсөвт шүүмжлэлтэй хандаж ирсэн. 2025 оны төсөв бол улсын түүхэн дэх хамгийн том төсөв. Энэ бол Ардчилсан намын хувьд түүхэн байр суурийнх нь эсрэг төсөв гэж үзэж байгаа. Тухайлбал, улс төрийн намуудын амлалтад Монгол Улсын эдийн засаг дээр төрийн оролцоог бууруулна гэсэн. Гэвч төрийн оролцоог бууруулна гэсэн гурван нам нийлэхээрээ төрийн оролцоогоо эрс нэмэгдүүлээд явж байгаа" гэв.

    Харин бүлгийн гишүүн Б.Пүрэвдорж "2024-2028 оны хамтарсан засгийн төлөвлөгөө гарсан. Энэ дагуу 2025 оны төсөл орж ирж байгаа. Энэ нь эдийн засгийг илүү шинэ түвшинд аваачих хөрөнгө оруулалт хийгдсэн. Гэвч гуя дагаж хүзүү гэгчээр сайд нарын урсгал зардал, бусдаар гүйцэтгүүлэх ажил нь замбараагүй нэмэгдсэн. Өнгөрсөн хугацаанд сайд нар нэг арга хэмжээг 300 гаруй сая төгрөгөөр хийдэг байдлыг  багасгаж, танах хэрэгтэй. Бусдаар гүйцэтгүүлэх ажил бол 1.4 их наяд төгрөг байгаа. Өнгөрсөн жилийн төсөв дээр 125 төсөл арга хэмжээг зарцаах юм бол 1.5 их наяд төгрөгийг хэмнэх боломж байна гэж хэлж байсан" гэлээ.