• Өнөөдөр 2025-04-21

Монгол Улсын 31 дэх Ерөнхий сайд У.Хүрэлсүхийн албан тушаалаасаа огцрохдоо хэлсэн ОНЦЛОХ ҮГС

2021-01-21,   1327

  • Би Монголын төрийг шударга, ард түмэндээ ээлтэй, ард түмнийхээ үгийг сонсдог, ард түмэндээ үйлчилдэг төр засаг байгаасай гэж чин сэтгэлээсээ бодож, эрмэлзэж, дөрвөн жилийн хугацаанд ард түмнийхээ өгсөн итгэл найдварыг эр хүний ёсоор хариулъя гэж хичээн зүтгэж ирсэн.

 

  • Цар тахлын голомтод ажиллаж, амьдарч байсан хүмүүст баярлаж, талархаж байна. Гэхдээ хариуцлага алдаж тэр эмэгтэйг ямар хүнд байдалд оруулж байсныг зарим нэг хариуцлагагүй хүнээс бид олж харсан. Тийм учраас цаашид шат шатандаа хариуцлага, сахилга бат, дэг журмаа сайжруулж, алдаа гарвал хариуцлагаа үүрч чаддаг төр засаг байх ёстой. Үүнийг би Ерөнхий сайдын хувьд байнга сануулж ирсэн. Харамсалтай нь, энэ удаа тэр эмэгтэйг бид үнэхээр хүнд нөхцөлд ХҮНИЙ НҮД ХАЛТИРАМ, СЭТГЭЛ ЭМТРЭМ, ЭЛЭГ ШИМШРЭМ байдалтай авч явсанд улсын Ерөнхий сайдын хувьд дахин гүнээ хүлцэл өчиж байна. Энэ алдаанаас болж, миний кабинетийн хоёр гишүүн огцрох өргөдлөө надад өгсөн.

 

  • Төрийн нүд сэргэг, чих сонор байх ёстой. Тийм учраас ард түмэн маань үгээ хэлж, хариуцлагатай хандахыг Ерөнхий сайдаасаа шаардсан. Энэ шаардлагыг би хүлээж авч байна. Энэ хариуцлагыг би Ерөнхий сайдын хувьд үүрэх ёстой. Магадгүй энэ нь улс төрд шинэ соёл оруулж ирж байгааг үгүйсгэхгүй.

 

  • Миний хүүхэд байхаасаа сурсан зүйл бол хариуцлагыг хамтаараа үүрэх явдал юм. Энэ эр зоригийнхоо үүднээс Монгол Улсын Ерөнхий сайд гэсэн эрхэм хүндтэй албан тушаалаас огцорч байгаагаа албан ёсоор мэдэгдэж байна.

 

  • Ард түмний жагсаал, цуглаан болж байгаа цаг үеийг далимдуулж, улс төрийн үйл ажиллагаа явагдсан. Миний итгэж найдаж, хамтарч ажилласан Монгол Улсын Ерөнхийлөгч Х.Баттулга ард түмнийг үймээн самуунд турхирч, хөрөнгө санхүүжилт хийж, ард түмний тайвнаар өөрсдийнхөө үзэл бодлыг илэрхийлж байгаа жагсаалыг улстөржүүлсэн. Миний итгэл найдвар үнэхээр алдарч байгаа.

 

  • Та бид 2008 оны долдугаар сарын 1-нийг мартаагүй. Дахиж Монголд тийм үйл явдал битгий гараасай гэж чин сэтгэлээсээ Ерөнхий сайдын хувьд хүсэж байна. Тийм учраас миний гаргаж байгаа энэ шийдвэр ч гэсэн үүнтэй холбоотой.

 

  • Монгол Улсын Ерөнхийлөгч бол ард түмний эв нэгдлийн илэрхийлэгч байдаг. Ард түмнийхээ аюулгүй байдлыг хангаж, хамгаалах Үндсэн хуулийн үүрэгтэй хүн. Харамсалтай нь, энэ ажлаа хийж чадахгүй зөвхөн өөрийнхөө сонгууль руу чиглэсэн улс төрийн акцуудыг удаа дараа хийж, төрийн тогтворгүй байдлыг бий болгосон, улс төрийн оноо авах гэсэн, ард иргэдийн сэтгэл санааг үймүүлсэн мэдээ мэдээллүүдийг өөрийнхөө харьяа хэвлэл мэдээллийн байгууллагуудаар дамжуулж, олон удаа цацаж, янз бүрийн юм хийж байгааг хэвлэлийнхэн мэдэж байгаа биз ээ. Цаашид Монгол Улсын ард түмний эрх ашгийг хамгаалагч хүн ийм зохисгүй үйлдэл битгий гаргаасай гэж хэлэхийг хүсэж байна. Мөн Үндсэн хуулийн дагуу өнөөгийн Ерөнхийлөгчдөө хариуцлага тооцох ёстой гэж үзэж байгаагаа эрх баригч намын даргын хувьд илэрхийлье.

 

  • Төр маань түвшин, түмэн олон маань амгалан байх явдал бол төрийн өндөрлөг гэж нэрлэгддэг ҮАБЗ-ийн гурван гишүүний шууд асуудал байдаг. Харамсалтай нь, өнөөгийн Ерөнхийлөгч маань энэ ажлаа хийж чадахгүй байна.

 

  • Миний бие улс төрөөс бүр мөсөн явж байгаа юм биш. Цаашид монгол төрийнхөө төлөө урьдын адил хүчин зүтгэнэ. Хууль, хүчний байгууллагыг ашиглан өөрийнхөө сонгуулийн өрсөлдөгчийг улс төрийн зорилгоор намнадаг, хууль, хүчний байгууллагын даргыг томилохдоо өргөдлийг нь түрүүлж авдаг төрийн тэргүүн байж таарахгүй. Тийм учраас МАН, ард түмэн анхааралдаа авч хариуцлага тооцно гэдэгт итгэлтэй байна. 

 


Монгол Улсын 31 дэх Ерөнхий сайд У.Хүрэлсүхийн албан тушаалаасаа огцрохдоо хэлсэн ОНЦЛОХ ҮГС
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2
  • Сэтгэгдэл үлдээсэн: 2021-01-22 20:13:49
    Н.ЛХАГВАДОРЖ: МОНГОЛЫН ТӨРД ШУРГАЛСАН СҮҮЛГҮЙ БООХОЙТОНЫ ГЭМЭЭ ХААЦАЙЛСАН ҮЛГЭР ЮМ. ТӨР ТӨМБӨГӨР, ЁС ЁМБОГОР БАЙГААСАЙ БИЛЭЭ ДЭЭ. ЧИНГИСИЙН ТӨР МИНЬ.
  • Сэтгэгдэл үлдээсэн: 2021-01-21 21:41:56
    Ц. Баярмаа. МАН.... ЫН.. Ууган. Гишүүн: Ёрөнхий. Сайд. бол... шудаога. шийдэмгий. зоригтой. Улс. төрч. юмаа.... Намын. ажилаа. илүү. шийдэмгий. зоригтлй. хөдлөх ... хэрэгтэй... Таньд. сайн. сайхныг. хүсэн. ерөөе... С,БД... Ийн. 19--р. хороо. Утасны. дугаар.... 99644359...
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2025 © Зохиогчийн эрх хуулиар хамгаалагдсан. Мэдээлэл хуулбарлах хориотой.