Монголын Үндэсний худалдаа, аж үйлдвэрийн танхимаас дараах мэдэгдлийг гаргажээ.

"Ковид-19" цар тахлын улмаас зарласан хатуу хөл хорио, удаа дараагийн тодорхойгүй шийдвэрүүд нь бизнес эрхлэгчид, ААН-үүдийн хэвийн үйл ажиллагааг алдагдуулж, өр зээлд баригдуулж, ажлын байраа цомхотгохоос аргагүй байдалд хүрлээ. Компаниудын хувьд нөхцөл байдлыг харгалзан үзэж, өнөөдрийг хүртэл бүтэн жилийн турш өөрсдийн хамаг нөөц боломжоо шавхаж, тэсэж тэвчиж ирлээ. Үүнээс цааш ажиллах, үйл ажиллагаагаа явуулах санхүүгийн боломжгүй болж, мухардалд ороод байна.

МҮХАҮТ-аас 2020 оны арваннэгдүгээр сард явуулсан судалгаагаар аж ахуйн нэгжүүдийн 34 хувь нь ажлын байраа хадгалах, ажиллагсдын цалин тавих, 21 хувь нь бизнесийн зээлээ эргэн төлөх, 17 хувь нь хөл хориотой холбоотой төр засгаас гаргаж буй шийдвэрийн ойлгомжгүй, уялдаа холбоогүй байдал бэрхшээл үүсгэж байна гэсэн бол 16 хувь нь түрээсийн төлбөрөө төлөх нь хамгийн хүндрэлтэй байна гэж хариулаад байна. Өнөөдөр үүссэн хүнд нөхцөл байдлаас цаг алдалгүй, хохирол багатай гарахын тулд дараах тодорхой хүсэлтийг УИХ, Засгийн газарт хүргүүлж байна.

Үүнд:

1. Үйл ажиллагаа бүрэн зогссон, ихээр хязгаарлагдсан салбарын бизнест богино хугацааны ажилгүйдлийн эсрэг санхүүгийн дэмжлэг үзүүлэх
2. Зээлийн хүүгийн 100 хүртэлх хувийг тодорхой хугацаанд төрөөс санхүүжүүлэх
3. Хилийн боомтуудын үйл ажиллагааг халдвар хамгааллын дэглэмийн дор хэвийн явуулах
4. Үйл ажиллагаа нь зогссон үйлчилгээний салбаруудыг үл хөдлөх хөрөнгийн болон газрын төлбөрөөс чөлөөлөх
5. 2021 оны төсвийг тодотгох, төсвийн үр ашиг багатай, нэн шаардлагатай бус хөрөнгө оруулалтын зардлыг танаж, эдийн засгаа дэмжих арга хэмжээ авах
6. Нэмэгдсэн өртгийн албан татварын хувь хэмжээг бууруулах

Эдгээр арга арга хэмжээг яаралтай хэрэгжүүлэхгүй бол эргэлтийн хөрөнгөгүй, орлогогүй, удаан хугацааны турш хөл хорионы журмыг хэрэгжүүлэн сул зогссон аж ахуйн нэгж, татвар төлөгчид ажилтнаа цомхотгоод зогсохгүй дахин сэргэхгүйгээр бизнесээ хаах, дампуурлаа зарлахад хүрээд байна. Олноороо цомхотголд орсон иргэд ч ажилгүйдлийн тэтгэмж нэхэмжилж, Нийгмийн даатгалын санд ачаалал үүсгэх нь тодорхой болоод байна. Үүсээд буй нөхцөл байдлыг эргэн харж, иргэдээ, ажил олгогчоо бодсон хүнлэг шийдвэр гаргахыг шаардаж байна.