МАН-ын улс төрийн зодоон албан ёсоор эхэлчихсэн. Бие биеээ сандал суудлаас нь унагаж, улс төрөөс бүр мөсөн явуулах гээд ил цагаан нүдэлцэж байна. Ер нь энэ намынхан эрх бариад сонгуульд ялаад эхлэхээрээ хоорондоо эв түнжин хагаралдаж, эрх мэдлийн төлөө фракц болоод үзэж тардаг зантай. Энэ нь бүр тогтсон соёл болчихсон гэмээр юм уу даа. Бүр Оросуудтай нийлж нэгнийгээ буудаж, хороож байсан гашуун түүхтэй болохоор тэд цаг ямагт нэг рүүгээ боргож, урах нь арга ч үгүй биз гэж улс төр судлаачид ярьдаг...

Энэ удаагийн зодоон Ерөнхий сайдын баруун гар, Хууль зүйн сайд асан, шинэ Хотын дарга Х.Нямбаатар, арав гаруй жил улс төрд босоо “аварга” явсан Д.Сумьяабазар нар нийлчихээд намынхаа генсек, ЗГХЭГ-ын дарга Д.Амарбаясгалантай үзэж байна. Тэд Д.Амарбаясгаланг улс төрөөс нэг мөсөн зайлуулах гээд нүүрсчин гэх нэр хоч зүүлгээд өдөр, шөнөгүй үзээд байна. Одоогоор Х.Нямбаатар, Д.Сумъяабазар нар Д.Амарбаясгаланд зай завсар, минутын амралт ч өгөхгүй балбалж, ялж байгаа харагдана.

Гэхдээ эхний үед хүч, тэнхээ, нөөцөө шавхаж, хамаг тактикаа эсрэг талынханд дэлгэчихсэн тамирчин  дараагийн үед илүүрхэх үү, хэмх нүдүүлэх үү. Багтраа нь гарсан тамирчин баруун гарын цохилтоо явуулах уу, эс явуулах гэдэг нь цаг хугацааны асуудал.

Рингийн буланд шахуулсан Д.Амарбаясгалан хүнд цохилтоос гарч чадах уу

          Хуучин цагт Ардын намынхан өглөө нь хэрэлдээд, орой нь эвлэрдэг, хэрүүл, зодооноо тогоондоо “чанадаг”, шорвог “хоол”-оо бусдад өгдөггүй гэж өөрсдийгөө дөвийлгөж, Ардчилсан намынхнаар тохуурхдаг байлаа. Гэхдээ одоо цагт Ардын намынхны эрх мэдлийн төлөөх тэмцэл ил болж, “сав”-наасаа хальж байна. Боксын тамирчид шиг рингэн дээр гарчихаад нэгийгээ “алах”-аас наагуур болж байна. Тэдний гол хүсэл нь хоёр үеийн турш илүүрхэж, ямар ч хамаагүй аргаар өрсөлдөгчөө нам цохиж, цэвэр ялах. Ялагдсан тамирчнаа рингийн буланд дахиж харахгүй байхын тулд тэд өөд уруугүй хөл, тархиа ажиллуулж байна гэсэн үг л дээ.

МАН-ын одоогийн “гал тогоо”-г баригчид хэн нь илүү хүчтэйгээ үзэхийн тулд нэг нэг рүүгээ том “нүүрс” нүүлгэж өнгөрсөн өдрүүдэд хангалттай харлаа. МАН-ынхны хамгийн эмзэг сэдэв нь нүүрсний хулгайч болох. Өөрөөр хэлбэл, хэдхэн жилийн өмнө ЖДҮ-чин гэх нэр зүүхгүй гэсэндээ тэд рингэн дээр хамгийн чангаараа хашхирч, бусдыгаа зааж өгч байгаа мэт дүр үзүүлдэг байлаа. Харин одоо тэд нүүрсний хулгайч гэдэг нэр зүүх вий гэдгээс сүнсээ цайлтал айж байгаа. “Нүүрсний” гэх хэргийг Ерөнхий сайд Л.Оюун-Эрдэнэ гаргаж ирсэн. Нэр нь нүүрстэй холбогдсон хэнийг ч үлдээхгүй, ард түмэнд тас татуулах рингийг бэлдчихсэн гэсэн үг. Нүүрсчин гэхэд л хэн ч унахад бэлэн ангал хүлээж байгаа юм. Ингэхээр Ардын намынхны нэгнээ унагах, ялах гол тактик нь нүүрсний хулгайч гэдгийг нь ард түмэнд итгүүлэх болжээ.

         ЗГХЭГ-ын дарга Д.Амарбаясгаланг нүүрсний хулгайч хэмээх нийтлэл гаднын сайтад нийтлэгдсэн. Үндсэндээ түүнийг ХБНГУ руу хэсэг гишүүнийн хамт явах хоёр хоногт ийм мэдээлэл цацагдсан. Тодруулбал, Yahoo Finance, News Direct гэх сайтад түүнийг “Админерал” компаниар дамжуулан нүүрсний хулгайн хэрэгт нэр холбогдсон хэмээн нийтэлсэн. Ингэхдээ “Д.Амарбаясгалан Тавантолгойгоос 47 мянган тонн нүүрсийг “Админерал” компаниар дамжуулж, ашиг хонжоо олсон гэгдэж буй. Энэ хэргийг шалгах явц үргэлжилж байгаа. Тус мөрдөн байцаах явцад Д.Амарбаясгалан эрх мэдлээ ашиглан хөндлөнгөөс оролцох гэж оролдож байна” гэх агуулгыг гаргасан. Энэ асуудал түүнийг эзгүй хооронд сөхөгдсөн нь бас л хоржоонтой.

Гадны хэвлэлд мэдээлэл цацагдсаны дараахан Д.Амарбаясгаланд зориулсан тусгай сонин хүртэл дотооддоо гаргалаа. Тухайлбал, 12 нүүртэй сонины дөрөв, таван нүүрт нь Д.Амарбаясгалангийн тухай бичсэн пост, сэтгэгдэл, гадны хэвлэлд гарсан мэдээллийг орчуулаад тавьчихсан байна лээ. Ерөнхий утгаараа энэ шуудан МАН-ын генсек Д.Амарбаясгаланд зориулсан гэдэг нь илт.

Дараа нь, Д.Амарбаясгалангийн тухай мэдээлэл, баримтыг олон нийтэд цацаж, үүргээ гүйцэтгэсэн сэтгүүлч, хэвлэл мэдээллийнхнийг Хотын дарга асан Д.Сумъяабазар БНХАУ руу авч явлаа гэх мессэжийг олон нийтэд өглөө. Ерөөсөө л МАН-ын зодоон эхэлчихсэн нь эндээс бэлхэн харагдаж байгаа юм.

Ингээд харахаар Д.Амарбаясгалан яалт ч үгүй “зодуулж” байна, эхний үед. Рингийн буланд шахуулсан Д.Амарбаясгалан хүнд цохилтоос гарч чадах уу гэдэг нь анхаарлын төвд байна. Хэрэв Д.Амарбаясгалан цохилтоос гарч чадахгүй бол бүр мөсөн улс төрийн тоглолтоо дуусгана дуусна. Хэрэв хүнд цохилтоос гарвал...

Х.Нямбаатар, Д.Сумьяабазар нар  эхлүүлсэн зодооноо ялалтаар дуусгахгүй бол улс төрөөс явна

         Д.Амарбаясгалан рингийн буланд шахуулчихаад, Хотын шинэ, хуучин дарга нарт зодуулж байгаа нь учиртай. ЗГХЭГ-ын дарга Д.Амарбаясгаланг ногоон автобусны дуулианыг дэгдээсэн гэх хардлага Хотын дарга асан Д.Сумъяабазарыг буух өдрөөс эхэлсэн. Өөрөөр хэлбэл, түүний МАН-ын нэр бүхий хүнд буцааж барьсан хариу нь өндрөө авч, Хотын сайд, Хотын дарга нарыг зэрэг суудлаасаа буухад хүргэсэн. Магадгүй одоо улаан автобусны хэрэг мандаж, Хотын хуучин удирдлагуудыг хууль хяналтын байгууллагын хаалга татахад хүргэж болзошгүй сэжүүр гараад ирсэн.

Хэрэвзээ, Хотын дарга Х.Нямбаатараар хамгаалуулж, Ерөнхий сайдаар төвийг бариулсан Д.Сумъяабазар энэ тулаанд ялахгүй бол улс төрөөс бүр мөсөн явна. Өөрөөр хэлбэл, Х.Нямбаатар, Д.Сумьяабазар нар  эхлүүлсэн зодооноо ялалтаар дуусгахгүй бол улс төрөөс явна гэсэн үг. Тэдэнд Д.Амарбаясгалантай багаараа биш ганц, ганцаараа үзэх хөзөр үлдээгүй бол ялагдах магадлалтай. Амьсгаа нь задарчихсан тамирчин дараагийн үед тактикаа өөрчлөөд, нэг нэгээр нь бариад авч мэдэх. Хэрэв нэг нэгээр нь барьж аваад тулчихвал байдал өөрөөр эргэж мэднэ.

Товчхондоо, Хотын дарга асан Д.Сумъяабазар Нийслэлийн МАН-ын хороогоо алдчихвал тоглолтын цаг үндсэндээ дууслаа гэсэн үг. Угтаа Д.Сумъяабазар “Энэ бол миний байгуулсан намын хороо. 2020 оны орон нутгийн сонгуульд намаа өөрөө ганцаараа удирдаж орсон. Би УЗ-өөс нэг ч бодлогын, хүний оролцоотой дэмжлэг авч байгаагүй, Д.Амарбаясгалан даргаас ч авч байгаагүй” гэж байсан зодооны гол илрэл. МАН-ынхан нийслэлийн МАН-ын төлөөх өрсөлдөөнд хүч сорьцгоож байна. Хууль зүй, дотоод хэргийн сайд асан одоогийн хотын мээр Х.Нямбаатар, ЗГХЭГ-ын дарга Д.Амарбаясгалан нарын хооронд өрнөж эхэлсэн нь тодорхой харагдаж байна.