Засгийн газар ээлжит бусаар хуралдаж, шийдвэрээ танилцууллаа. Энэ сарын 13-нд ус, хог, цахилгаан, дулаан тэглэх шийдвэр гарсан тай холбогдуулан түр журам гаргалаа.  Энэ талаар Эрчим хүчний сайд Н.Тавинбэх “ Цахилгааны хэрэглээнд хязгаар тогтоож, зөрүү төлбөрийг иргэн, ААН хариуцах тухай журам гаргалаа. Уг журмаар хэрэглэгч, цахилгаан үйлдвэрлэгчийн эрх, үүргийг тодорхой зааж өгсөн. Эрх үүргийн хүрээнд хөнгөлөлт тогтоосон хугацаанд хэрэглэгчийн цахилгааны хэрэглээ өмнөх оны мөн үеийнхээс хэтэрвэл зөрүү төлбөрийг иргэн, аж ахуйн нэгж байгууллага төлнө. Мөн үеийнхтэй тэнцэх хэмжээний цахилгааны хэрэглээг төр хариуцна. Хэрэглээний ачаалал бидний тооцоолсноос хэт их байна. Ялангуяа оргил цаг буюу 17:00-21:00 цагийн хооронд ачаалал хэт нэмэгдэж байгаа учир цахилгааны хэрэглээгээ 20 хувиар бууруулах шаардлагатай. Төрөөс суурь хэрэглээний төлбөрийг тэглэсэнтэй холбоотойгоор зохиомол хэрэглээ буюу дулааны асуудлаа цахилгаанаар шийдэх, зохиомол хэрэглээ үүсгэх тохиолдол их гарч байна. Хэрэглээг бууруулахад ард иргэдийн оролцоо  маш их хэрэгтэй. Цахилгаан, дулаан хэрэглэдэг 738 мянган хэрэглэгч байдгаас 90 хувь нь хөнгөлөлтөд хамрагдаж байгаа. Төлбөр тэглэсэнтэй холбоотойгоор бид гарах эрсдлийг тооцоолсон. Гэхдээ бидний тооцоолсноос хэт их буюу цахилгааны ачаалал 2-3 дахин нэмэгдсэн. Иймд нөхцөл байдлаас хамааран түр журам гаргаж байна” гэв.