БНХАУ-ын хөрөнгө оруулалттай “Шинжиан шинфа” гэх ХХК-ийн Төрийн банкнаас 20 тэрбумын зээл авсан асуудалд хуулийн байгууллага тус банкны захирлаар ажиллаж байсан Д.Баярсайханд эрүүгийн хэрэг үүсгэн хоёр жилийн хорих ял оноолоо. Тодруулбал, 2017 оны Ерөнхийлөгчийн сонгуулийн өмнө Шинжиан шинфа” компанид олгогдсон 20 тэрбум төгрөгийг улс төрийн зорилгоор гаргасан байж магадгүй гэж тухайн үед зарим хэвлэлүүдээр мэдээлж байв. Мөн “Шинжиан шинфа” ХХК нь 20 тэрбум төгрөгийн зээл авахдаа ямар нэг барьцаа тавиагүйгээр үл барам зээлийн эргэн төлөлт хийгдэхгүй чанаргүй зээлийн ангилалд шилжүүлэн мөнгө угаасан үйл явдал болж таарч байгаа юм.

Ямартаа ч энэхүү мэдээлэл хоёр жил гаруй хугацааны турш хэвлэл мэдээлийн “бай” болсоор ирсэн. Энэ асуудлаар УИХ-ын гишүүн Т.Аюурсайхан өөрийн цахим хуудаснаа “2017.06.23-нд буюу Ерөнхийлөгчийн сонгуулиас гурав хоногийн өмнө ажлын цаг дууссаны дараа Монголбанкнаас Төрийн банкныхныг тарж болохгүйг үүрэгдэж, 20 тэрбумын зузаатгалыг Монголбанкнаас хийж өгнө, нэн даруй "Шинжиан Шинфа" ХХК-д олгохыг чиглэл болгож, Төрийн банк ёсоор болгожээ” хэмээн жиргэснээс тус асуудлыг дахин олон нийтийн анхаарлын төвд оруулж ирсэн байдаг. “Шинжиан шинфа” ХХК-д 20 тэрбумын зээл өгөх зөвшөөрлийг Б.Чойжилсүрэн Сангийн сайд байхдаа Д.Баярсайханд өгсөн гэдэг мэдээллийг зарим хэвлэлүүд онцолж байв. Тодруулбал, 2017 оны зургадугаар сарын 23-ны өдөр Сангийн сайд Б.Чойжилсүрэнгээс Төрийн банкны ерөнхий захирал Д.Баярсайханд “Эдийн засгийг идэвхжүүлэх, бүтээн байгуулалтыг нэмэгдүүлэх, төр, хувийн хэвшлийн түншлэлийг өргөжүүлэх зорилгоор Монгол Улсын Засгийн газартай гэрээ байгуулсан хуулийн этгээдийн санхүүгийн үр ашигтай концессын төслийн 20 тэрбум төгрөг хүртэлх санхүүжилтийн хүсэлтийг Сангийн сайдаас Төрийн банкинд хүргүүлсэн 2016 оны арваннэгдүгээр сарын 3-ны өдрийн 7-1/6647 дугаар албан бичгээр тогтоосон зээлийн хязгаарлалтад хамааруулахгүйгээр холбогдох дүрэм, журамд нийцүүлэн судлан үзэхийг зөвшөөрч байна” гэсэн баримтыг дэлгэсэн байдаг.

Энэ мөнгийг гаргахдаа Сангийн сайд 2016 оны арваннэгдүгээр сарын 3-нд Төрийн банкны ТУЗ-ийн дарга Б.Нямаагийн нэр дээр Чиглэл өгөх тухай албан бичиг явуулж дээрх 20 тэрбумыг “5.0 тэрбумаас дээш санхүүжилтийг Төрийн банкнаас гаргахгүй байхыг нөхцөлд хамааруулахгүйгээр 20 тэрбум төгрөгийг гаргахыг зөвшөөрсөн” гэсэн үг болж таарч байгаа юм.

Хятадын нэг худалдааны компани Монголын Төрийн банкинд 300 сая төгрөгийн байр барьцаанд тавьж 20 тэрбум төгрөг аваад алга болсон үйл явдал, ингэж л хөвөрсөн. Эцэст нь Төрийн банкны захирал Д.Баярсайхан хоёр жилийн хорих ял сонслоо. 20 тэрбум төгрөгийг Монголын Төрийн банкнаас хулгайлсан гэмт хэргийг үүгээр хаах бололтой. Гэхдээ энд нэг зүйлийг онцлоход 20 тэрбум төгрөгийг хулгайлсан жинхэнэ эзэд хэн бэ гэдгийг олж тогтоох ёстой. Д.Баярсайхан, Шинжиан шинфа ХХК бол зөвхөн мөнгийг дамжуулсан гүйцэтгэгчид. Тэд багахан хувь авсан биз. Бараг албан тушаалд очсон төлбөрөө ийнхүү төлсөн ч байж мэднэ. Тэгэхээр энэ мөнгө Шинжиан шинфа ХХК-ийн данснаас цааш хэрхэн зарцуулагдсаныг олж тогтоох ёстой. Асуудлын учгийг тайлах гэж оролдох тусам Сангийн сайд Б.Чойжилсүрэн, Ерөнхийлөгчийн сонгуульд нэр дэвшигч М.Энхболд руу мөнгөний мөр чиглээд байх шиг.