Гадаад харилцааны сайд Н.Энхтайван гадаад харилцааны чиглэлээр авч хэрэгжүүлж буй арга хэмжээний талаар өнөөдөр мэдээлэл хийлээ.

Тэрбээр “Дипломат алба болон Элчин сайдын томилгоон дээр ямар нэгэн шахаа байхгүй. Гадаад харилцааны системд ажиллаж байгаа хүнээ Элчин сайдын яаманд болон элчин сайдаар томилох бодлогыг баримталж ажиллана. Элчин сайдыг томилох асуудлыг Үндсэн хуулийн 33 дугаар зүйлд хуульчилсан байдаг. Үндсэндээ Засгийн газрын шийдвэр гарч, Ерөнхийлөгч дээр орж зөвшилцөж, дараагаар нь УИХ эцэслэдэг. Энэ онд хугацаа нь дуусч, хэтэрсэн 7 орон, хугацаа нь болчихсон 10 гаруй орон байгаа ба 20 элчин сайдын асуудлыг УИХ-д оруулж, шийдвэрлэх юм. Энэ ондоо багтаад энэ ажлыг хийнэ. Хугацаа нь дууссан ч үргэлжлүүлэн ажиллаж байсан долоон хүнийг татсан. Харин ирэх онд хугацаа нь дуусах 10 гаруй Элчин сайд байгаа. Тэгэхээр нийтдээ энэ оны төгсгөл, ирэх оны эхэнд 30 орчим элчин сайдын томилгооны асуудал яригдана” гэв.