Эрүүл мэндийн даатгалын ерөнхий газраас /ЭМДЕГ/ хөнгөлөлттэй эмийн зохицуулалтын талаар өнөөдөр мэдээлэл хийлээ.

Ирэх арваннэгдүгээр сарын 2-ноос иргэд ЭМДЕГ-тай гэрээ хийсэн эмийн сангуудаас хөнгөлөлттэй эм авах боломжтой болж байгаа. Хөнгөлөлттэй эмийн шинэчлэн баталсан жагсаалтаар ерөнхий нэршлийн 136, худалдааны нэршлийн 522 нэр төрлийн эмийг 30-70 хувь хөнгөлөхөөр болжээ. Хөнгөлөлттэй эмийн жагсаалтад оруулсан эмийг олон улсын эмнэл зүйн удирдамжинд дурдагдсан, хүн амын дунд зонхилон тохиолддог өвчний үед хэрэглэдэг эмийг шалгуураар оруулсан бөгөөд манай улсад бүртгэлгүй 200 гаруй эм байсныг жагсаалтад оруулжээ.

ЭМДЕГ-тай 1001 эмийн сан гэрээт байсан бол одоогийн байдлаар 1600 гаруй эмийн сан хөнгөлөлттэй эмээр үйлчлэх хүсэлт гаргасан байна. Ингэснээр хөнгөлөлттэй эмээр үйлчлэх эмийн сангийн тоо 60 хувиар нэмэгдсэн гэдгийг холбогдох мэргэжилтнүүд хэлсэн юм. Өмнө эм олгох эмийн санг тендерээр шалгаруулдаг байсан бол ирэх сараас и-баримт олгодог болон цахим сүлжээнд холбогдсон эмийн сангууд хөнгөлөлтөөр эм олгох юм байна. Мөн эмийн сангуудад хөнгөлөлттэй эмийн 30 хоногийн нөөцтэй байхаар тооцсон бөгөөд иргэд сар бүрийн эхээр эм дуусах вий гэх айдасгүй болж байгаа аж.

Харин хөнгөлөлттэй эм бичих эмчийн тухайд улсын болон хувийн эмнэлгийн нийт 6500 гаруй буюу зөвхөн амбулаторын эмч жор бичих гэнэ. Жор бичүүлж байгаа иргэн болон эмч хурууны хээгээ таниулах бөгөөд ингэснээр тухайн хороо, дүүрэгт бүртгэлгүй, түр оршин суугч хөнгөлөлттэй эм авах боломж бүрдэж байгаа аж.

Эрүүл мэндийн даатгалын ерөнхий газрын дарга Л.Бямбасүрэн “Хөнгөлөлттэй эмийг авахдаа хурууны хээ таниулах боломжгүй хэвтрийн дэглэмтэй иргэд бий. Ийм тохиолдолд регистрийн дугаараар бүртгүүлж эмээ авах боломжтой. Үнийн тухайд, и-баримт бүртгэлийн системийн зах зээл дээрх нэгжийн үнээр тодорхойлсон. Өмнө нь хайрцгаар нь үнийг тогтоож байсан бол нэг таблеткаар нь үнийг тогтоосноор  иргэд бодитой хөнгөлөлт эдлэх боломжтой.

Хөнгөлөлттэй эм авсны дараа Е-баримтын системээр танд хөнгөлөлттэй эм авсан эсэх талаар асуусан зурвас очих юм. Иргэд  "тийм" эсвэл "үгүй" гэсэн хариултыг өгөх шаардлагатай бөгөөд энэ нь хөнгөлөлтэй эмийн зүй зохистой зарцуулалтад иргэний оруулж буй хувь нэмэр болох болно. "Үгүй" гэсэн хариулт бүрийн мөрөөр ЭМДЕГ хяналт шалгалт хийж шаардлагатай арга хэмжээг авна. Түүнчлэн хөнгөлөлттэй эмийн сангуудад өмнө нь урьдчилж төсөв хуваарилдаг байсан бол одоо гүйцэтгэлээс нь хамаарч 14 хоног тутамд санхүүжүүлнэ. Тодруулбал, эмийн сангууд 14 хоног тутамд гүйцэтгэлийн тайлангаа ирүүлснээр эмийн хангамжийг нийлүүлэх юм” хэмээн ярилаа.