-БАЯНГОЛ ДҮҮРГИЙН ИТХ-ЫН ТӨЛӨӨЛӨГЧ НАРЫГ 42 САЯ ТӨГРӨГӨӨР ШАГНАЖЭЭ-

Баянгол дүүргийн ИТХ-ын шилэн дансны мэдээллийг шүүж үзлээ. Шилэн дансны мэдээллээр тус дүүргийн төлөөлөгч нарыг 42 сая төгрөгөөр шагнаж, урамшуулсан баримт байх аж. Тодруулбал, тус дүүргийн ИТХ-ын шилэн дансны мэдээлэлд “МАН захирамж 76 төлөөлөгчийн урамшуулал” гэх утга бүхий гүйлгээг өнгөрсөн оны арванхоёрдугаар сарын 14-ний өдөр хийсэн байв.

Бид энэ талаар Баянгол дүүргийн ИТХ-ын дарга А.Даваажаваас тодрууллаа.

Тэрбээр “Дүүргийн төлөөлөгч нарыг улиралд тутам шагнаж, урамшуулдаг. Бүх дүүрэг, аймаг, суманд  энэ системээр ажилладаг. Үүний дагуу өнгөрсөн арванхоёрдугаар сард Баянгол дүүргийн 41 төлөөлөгчийг 42 сая төгрөгөөр шагнаж, урамшуулсан. Өөрөөр хэлбэл, төлөөлөгч нарын улиралын цалин гэсэн үг. Баянгол дүүрэгт МАН-ын 21, Ардчилсан намын 19, ХҮН-ын нэг төлөөлөгч бий” гэлээ.