Ерөнхий сайд Л.Оюун-Эрдэнэ өчигдөр цаг үеийн асуудлаар мэдээлэл солилцсон билээ. Энэ үеэр Эрдэнэбүрэн сумын ИТХ-ын дарга нь БНХАУ-ын Элчин сайдын яаманд албан бичиг өгч, шууд харилцаа тогтоосон талаар мэдэгдлээ.

       Тэрбээр “Эрдэнэбүрэнгийн УЦС-ын асуудал дээр Засгийн газар аль болох иргэдэд бага хохирол учруулах байр суурь барина. Гэхдээ Засгийн газар улс орны эдийн засгийн бие даасан, тусгаар тогтнолтой холбоотой дэвшүүлсэн төсөл, хөтөлбөрөөсөө ухрахгүй. Эрдэнэбүрэнгийн айл өрхүүдтэй Эрчим хүчний сайд газар дээр нь очиж уулзсан. Зарим айл нь үнэлгээгээ өгч, зайлшгүй нөхөн төлбөр олгох шаардлага байгаа. Мөн нөхөн олговор олгох сургаар нүүгээд оччихсон айлууд ч бий. Тийм учраас энэ асуудал дээр хатуу байр суурь барьж ажиллахаас өөр гарцгүй. Би удахгүй тэнд очиж ажиллана. Эрдэнэбүрэнгийн УЦС-ыг ойрын ирээдүйд эхлүүлнэ.

         Эрдэнэбүрэн сумын ИТХ-ын дарга нь БНХАУ-ын Элчин сайдын яам руу бичиг өгч, энэ асуудал нэлээд амаргүй нөхцөл байдал руу орсон. Сумын ИТХ-ын дарга бол нутаг дэвсгэрээ төлөөлөх эрхтэй. Гэхдээ шууд гадаад харилцаа хийх субъект биш. Манайд замбараагүй байдал нэлээд хавтгайрсан байна. Тийм учраас Ерөнхий сайдын хувиар энэ асуудалд эрх мэдлийнхээ хүрээнд арга хэмжээ авна гэж бодож байгаа. Цаашид ингэхээс ч өөр гарцгүй” гэлээ.

Тэгвэл бид энэ талаар Ховд аймгийн Эрдэнэбүрэн сумын ИТХ-ын дарга Б.Энхбаттай холбогдож тодрууллаа.

-Ерөнхий сайд таныг Эрдэнбүрэнгийн УЦС-ын асуудлаар БНХАУ-ын Элчин сайдын яаманд албан бичиг өгч, шууд харилцаа тогтоосон гэж хэлсэн. Энэ үнэн юм уу?

           -Ор үндэслэлгүй худал мэдээлэл байна. Би Эрдэнэбүрэн сумын ИТХ-ын даргаар ажилладаг нь үнэн. Гэхдээ БНХАУ-ын Элчин сайдын яаманд Эрдэнэбүрэнгийн УЦС-ын асуудлаар албан бичиг явуулж, хууль зөрчөөгүй.

-Тэгэхээр Ерөнхий сайд худал ярьсан гэсэн үг үү?

         -Мэдэхгүй байна. Ерөнхий сайд тийм мэдэгдэл хийгээгүй байх. Тийм мэдээлэл би олж сонсоогүй. Та бүхэн андуурсан байх.

-Өөрөөр хэлбэл, таныг албан бичиг өгснөөс болж хоёр улсын хооронд сэв суусан гэсэн шүү дээ. Танд мөн хариуцлага тооцно гэсэн?

          -Дахиад хэлэхэд би ямар ч бичиг өгөөгүй. Ерөнхий сайд ч тийм мэдээлэл хийгээгүй гэж итгэж байна. Өөр ярих зүйл алга.