Багахангай дүүргээс Нийслэлийн иргэдийн төлөөлөгчдийн хурлын сонгуульд нэр дэвшигчид өнөөдөр буюу 2020 оны аравдугаар сарын 12-нд Бодлогын нээлттэй мэтгэлцээн зохион байгуулахаар зарласан билээ. Уг мэтгэлцээнийг Ардчилсан намаас нэр дэвшигч Баатарын Болор-Эрдэнэ санаачилж, Монгол Ардын намаас нэр дэвшигч Сэрдамбын Эрдэнэбаярыг урьжээ. Гэвч Багахангай дүүргийн МАН-аас албан ёсоор татгалзаж байгаагаа мэдэгдсэнээр уг мэтгэлцээн цуцлагдсан байна.

Баатарын Болор-Эрдэнийн хувьд орон нутгийн хөгжлийн төлөө бодлогоо уралдуулж, үзэл бодлоороо мэтгэлцэх нь зүйтэй гэж үзэн, дахин хүсэлт илгээж, мэтгэлцэх цаг, өдрөө товлох санал хүргүүлжээ. Багахангай дүүрэгт сүүлийн 30 жил МАН дангаар засаг барьж буй. С.Эрдэнэбаярын хувьд Багахангай дүүрэгт 16 жил намд зүтгэсэн бөгөөд сүүлийн найман жил дүүргийн Засаг даргаар ажилласан аж.

Харин Б.Болор-Эрдэнэ нь өнгөрсөн дөрвөн жилд Баянгол дүүргийн төлөөлөгчөөр ажиллаж, дүүрэгтээ олон төсөл хөтөлбөр амжилттай хэрэгжүүлж байжээ.