Тулгар төрийн 2232 жил, Их Монгол Улс байгуулагдсаны 817 жил, Ардын хувьсгалын 102 жилийн ойн баяр наадам үргэлжилж байна. Өнгөрсөн жилүүдийг бодвол цар тахалгүй, эдийн засгийн хүнд дарамтгүй үед баяр наадмаа тэмдэглэж байгаа бөгөөд үндэсний баярыг маань сонирхож, гаднаас ирэх жуулчдын тоо ч мэдэгдэхүйц өсжээ. Тэр дундаа Монголд анх удаа ирж байгаа жуулчид эрс тэс уур амьсгал, үер, усны гамшиг нүүрлэсэн ч баяр наадмаа зохион байгуулж байгааг гайхан ярьж байна. Уншигч танд монгол наадам үзэж, сонирхохоор ирсэн жуулчдын сэтгэгдлийг хүргэе.

Германаас ирсэн ГОРАН МАЛУ: Наадмаараа дамжуулан үүх түүх, үндэсний соёлоо сэргээн сануулдаг нь сайхан санагдлаа

Монгол Улсад хоёр дахь удаагаа ирж байна. Анх ирэхдээ монгол наадмыг үзэх гэсэн ч хувийн шалтгааны улмаас үзэж чадаагүй. Тэгээд хоёр дахь удаагаа энэ улсад ирээд л анх удаагаа үндэсний баяр наадмыг нь үзэх завшаан тохиолоо. Чингис хаанаас эхэлдэг үүх түүх, үндэсний соёлоо баяр наадмаараа давхар харуулж, монголчууд, дэлхий дахинд сэргээн сануулдаг нь сайхан санагдлаа. Би анх Монголд ирэхээсээ ч өмнө бууз, хуушуур зэрэг үндэсний хоолыг нь интернэтээс харсан, мэддэг байсан. Харин ирээд монгол найзаасаа сонссоноор монгол наадам хуушуургүй болдог гэсэн. Тэгэхээр нь өөр өөр амттай хуушуур идэх гэж таарсан асар болгоноосоо хуушуур авч идэж үзсэн. Үнэхээр гайхалтай байсан шүү.

Австралиас ирсэн ДЭЙВ: Монголд ирсэн нь аялагчийн хувьд туршлага судалсан явдал байлаа

Монгол Улсад анх удаа ирж, үндэсний баяр наадамд нь оролцож үзэж байна. Үнэхээр зугаатай байгаа. Би гэр бүлийн хүнийхээ хамтаар дэлхийн олон улс, хотоор аялж байсан. Гэхдээ Монголд ирсэн нь үнэхээр гайхалтай, аялагч хүнд туршлага суулгасан явдал болсон. Хэдхэн өдрийн өмнө бороо ороод үерлэсний дараа гэнэт үер зогсоод монголчууд үндэсний баяраа тэмдэглэж эхэлсэн. Үнэхээр эрс тэс цаг агаартай ч иргэд үүндээ дассан, гаднын жуулчдыг баяртайгаар хүлээж авч байгаа нь сайхан санагдлаа. Мөн монгол хоол үнэхээр сайхан амттай байсныг хэлмээр байна.

Бельгиэс ирсэн КАРОЛИН: Монголоос явмааргүй санагдаж байна

Монголд анх өнгөрсөн жил ирж, наадамд үзэж байсан. Цар тахлын дараахан тэмдэглэсэн наадам гэхэд монголчууд их хичээж, үнэхээр сайхан зохион байгуулж байсан нь мэдрэгдсэн. Харин энэ удаагийн наадам миний бодлоор илүү тайван, амьсгаа авах, уужрах цаг завтай, чөлөөтэй болж байна. Би бөхийн спортод дуртай. Өнгөрсөн жил ирээд монгол бөхөд илүү дуртай болсон. Цэнгэлдэхийн гадаа гурван цаг гаруй зогсож, дэлгэцээр бөхөө үзэж байна. Бөхийн хувьд дөнгөж эхний өдөр болохоор тийм ч хүмүүсийн сонирхлыг татахгүй байх шиг. Харин миний хувьд үнэхээр гайхалтай хэвээрээ байгаа. Түүнчлэн манай Бельгид махтай хоол их байдаг. Энд ирээд мах ихтэй хоол идсэн. Үндэстний соёл, хоол, хүмүүс гээд л... Монголоос явмааргүй санагдаж байгаа (инээв).

Англиас ирсэн залуу хос ДЭВИД МАДДЕН, ЛИЗ МАКГРАТ: Үндэсний баяраар нь Монголд ирсэндээ баяртай байна 

Дэвид: Монголд хоёр өдрийн өмнө ирлээ. Бид хоёр Монгол руу явах аяллаа үндэсний баяраар нь тааруулахаар эртнээс төлөвлөж байгаад ирсэн. Яг л эртнээс бодож, төлөвлөж байсны адилаар баяр наадмынх нь сайхан цагаар ирсэнд баяртай байна. Төлөвлөгөөгөөр бид хоёр Монголд дахин хоёр долоо хоног болно. Тэр хугацаандаа ч мөн Монголын илүү олон газрыг үзэж, үндэсний соёл, уламжлалыг нь мэдэх хүсэлтэй байгаа. Монголд яг ирэхэд бороо орж, үерлэж таарсан. Бороо, үерийн асуудал тулбал Улаанбаатар тийм ч сайн хот биш юм болов уу гэж бодогдсон. Гэсэн ч монголчууд үер, усны аюултай байсан ч яаж ийгээд үндэсний баяраа зохион байгуулсанд их баярлаж байна.

Лиз: Анх удаа Монголд ирж үзлээ. Тэгэхдээ Монголын үндэсний баяраар нь ирсэндээ үнэхээр их баярлаж байна. Бид хоёр дэлхийн олон хотоор явж үзсэн л дээ. Гэхдээ Монгол шиг ийм оронтой таарч байгаагүй. Монгол наадмаас сур харвааг илүүтэй сонирхож байна. Харваж байгаа хүмүүс нь үнэхээр гайхалтай чадварлаг, туршлагатай, сэтгэл зүйгээ үнэхээр өндөр түвшинд бэлдсэн нь харагддаг юм байна. Мөн Монголд ирээд бууз гэдэг хоол идэж үзсэн. Гайхалтай байсан л даа. Гэхдээ хүмүүс “Хуушуур идээрэй” гэж их хэлсэн. Монголчууд наадмаар хуушуураа иддэг гэсэн. Тиймээс өнөөдөр хуушуур иднэ гэж бодож байгаа (инээв).