ГАЛД ӨРТСӨН ХҮҮХДҮҮДИЙН ЭМЭЭ: ЖААХАН ХҮҮГЭЭ ХӨДӨӨЛҮҮЛЧИХЭЭД ИРЛЭЭ. ОХИНД МИНЬ ЯМАР ХЭЦҮҮ БАЙГАА БОЛ ГЭЖ БОДОХООР ЗҮРХ ШИМШРЭХ ЮМ

      Хэнтий аймгийн Хэрлэн сумын нэгдүгээр багийн иргэн Ч.Баттулгын гэрт энэ сарын 2-нд ахуйн түймэр гарч,17 настай Б.Сүхбат, 11 настай Б.Амин-Эрдэнэ нар галд өртсөн тухай мэдээлэл гарсан. Галын улмаас 17 настай Б.Сүхбат дүүгээ галаас аварч байхдаа өөрөө амиа алдсан харамсалтай хэрэг гарсан. 11 настай охины биеийн байдал ямар байгаа талаар эмээгээс нь тодрууллаа.

-Танай гэр бүлийнхэнд гүн эмгэнэл илэрхийлье. Хүүгийнх нь буяны ажил дууссан уу. Охиных нь биеийн байдал ямар байгаа вэ?

     -Бидний хувьд санаанд багтамгүй аймшигтай явдал тохиолдлоо. Нөхөж баршгүй уй гашуу гэж үүнийг хэлэх байх. Бид жаахан хүүгээ өнөөдөр /өчигдөр/ хөдөөлүүлчихээд ирлээ. Ээж нь ГССҮТ-д охиноо сахиж байгаа. Ээж нь охиноо аваад хот руу явахдаа хүүтэйгээ эцсийн удаа салах ёс гүйцэтгээд явсан. Харин аав нь охин дээрээ очиж чадахгүй хүүгээ хөдөөлүүлж, буяны ажлыг нь дуусгачихаад сууж байна. Энэ хоёрт минь ямар хэцүү байгаа бол гэж бодохоор өр зүрх шимшрэх юм. Охины биеийн байдал хэвэндээ, унтуулгатай байгаа гэсэн.

-Охинд нь ГССҮТ-ийн эмч нарын зүгээс ямар эмчилгээ хийж байгаа вэ?

     -Охины шагайнаас дээших бүх бие нь түлэгдэлтэй байгаа. Эмч нар 90 хувийн түлэгдэлтэй гэж оношилсон байна лээ. Охины түлэгдээгүй үлдсэн шагайных нь арьснаас авч шуунд нь нөхсөн гэсэн. Одоо охинд минь бусад биеийг нь нөхөх эрүүл арьс үлдээгүй. Арьс нөхнө гэдэг чинь нэг удаа хийгээд эрүүл болчихдог юм биш гэнэ. Олон удаагийн давтавжтай нөхөж байж түлэгдсэн хэсэг нь нөхөн төлждөг гэсэн. Охины минь түлэгсдэн бусад биеийг нь нөхөх шаардлага гарвал хаанаас ямар арьс авч нөхөхийг нь мэдэхгүй байна. Одоогийн байдлаар өдөрт дөрвөн сая төгрөгийн эмчилгээ хийлгэж байгаа. Хүчтэй эм, тарианы ачаар л тэсэж байгаа байх. Мөн уушги нь цоорч, толгой, нуруу, нүүр, нүд нь битүү боолттой аймгийн эмнэлгээс явсан. Одоо ч боолттой хэвээрээ байгаа. Би өөрөө охиноо сахиж, нүдээрээ хараагүй болохоор нарийн асуудлыг нь сайн мэдэхгүй байна.

-Цаашид гадаадад эмчлүүлэх эсэх нь тодорхой болсон  уу?

    -Цаашид хаана ямар эмчилгээ хийлгэх нь одоогийн байдлаар тодорхойгүй байна. Уг нь, Солонгос Улсад эмчлүүлэх яриа гарсан ч бүрэн шийдэгдээгүй байгаа. Биеийнх нь байдлыг харзнах байх. Бид буяны ажлаа бүрэн дуусгахчихаад охин руугаа явна.

-Охины эмчилгээнд зориулж хандивын данс нээсэн байсан. Монголчууд сэтгэлийн дэм, тус хүргэж байгаа болов уу?

     -Охины дараагийн эмчилгээ тодорхойгүй байгаа учир бид хандивын дансаа түр хаасан. Монголчууд бидэн сэтгэлээрээ хандсан учир тэдний сайхан сэтгэлийг хүндэтгээд дансаа түр хаасан. Бидэнд тусалсан бүх хүнд баярлалаа гэдгээ онцолж хэлмээр байна.

-Тухайн үед гал юунаас болж гарсан юм бэ. Та энэ тухай мэдсэн үү?

    -Гал гардаг өдөр би тэдэнтэй хамт байгаагүй болохоор юу болсныг хэлж мэдэхгүй байна. Түүнийг хууль, шүүх, онцгой байдлын байгууллагаас тодорхойлох байх. Би үүнээс өөр мэдээлэл өгөх боломжгүй байна.

ГАЛД ӨРТСӨН ХҮҮХДҮҮДИЙН ЭЭЖ Г.МАНДАХЦОЛМОН: МИНИЙ ОХИН ЦОНХООР ГАРЧ ИРЭХДЭЭ ҮС, ТОЛГОЙ НЬ ШАТЧИХСАН, ХАМАГ БИЕ НЬ ГАЛТАЙ ГАРЧ ИРСЭН

     -“17 настай хүүгээ алдаад, 11 настай охиноо эмнэлэгт сахиад сууж байгаа эгчид нь дээшээ тэнгэр хол, доошоо газар хатуу байна. Ганц охиноо тахир дутуу ч хамаагүй амьд авч үлдмээр байна. Охиноо чадлаараа эмчлүүлж байгаа ч гэсэн цаашид эрсдэл маш их гарна гэсэн. Хбидэнд охин минь ямар ч байсан хамаагүй амьд үлдвэл болох нь тэр. Тийм учраас миний охинд хандивын гараа сунгаж, амьд үлдэхэд нь туслаач ээ гэж нийт монголчуудаасаа хүсэж, гуйж байна. Би Хэнтий аймгийн “Хүннү” зоогийн газарт тогоочоор ажилладаг. Гал гардаг өглөө 07:20 цаг гэхэд би гэрээсээ гарсан. Гэрээсээ гараад таван минут бололгүй эргээд иртэл хоёр хүүхэд минь байшинтайгаа хамт галд өртчихсөн байсан. Тийм богино хугацаанд яагаад тийм их гал гарсныг би гайхаад олохгүй байгаа. Гал түймэр унтраах хүмүүс дуудаж, цонхоо хагалаад ортол миний хүү дүүгээ гаргаад өөрөө гарч ирж чадалгүй алтан амиа алдсан. Хүүдээ маш их харамсаж байна. Миний хүү тэнгэрийн орноос ээж, аавыгаа харж байгаа бол уучлаарай гэж гуйж байна. Хүү минь дүүгээ аврахдаа “Миний дүү хурдан гараарай. Ах нь араас нь гарна” гэж хэлсэн байсан. Дүү нь гарч ирчихээд ах дотор байгаа шүү, авраарай гээд л орилоод байсан. Миний охин цонхоор гарч ирэхдээ үс, толгой нь шатчихсан, хамаг бие нь галтай гарч ирсэн. Тэгээд би охиноо тэвэрч аваад цасан дээр бөмбөрүүлж, гадуур хувцсаараа ороогоод эмнэлэг дээр ирэхэд охины минь арьс зумарч, хувцасанд наалдчихсан ямар аймар байсан гэж санана. Миний охиныг авраарай гээд би орилоод байсан. Охиноо цонхоор гарч ирээгүй байсан бол би өөрөө шатаж байгаа байшин руу орох гээд байсан. Тэгээд миний охин эмнэлэг дээр ирээд унтуулгад орсон. Одоохондоо эм, тарианы хүчинд байгаа. Миний охины амь нас цаг хугацагаар хэмжигдэж байгаа” хэмээн ярьсан байдаг.

ХЭНТИЙ АЙМГИЙН ОНЦГОЙ БАЙДЛЫН ГАЗРЫН ДАРГА Ж.ЭРДЭНБАТ: МӨРДӨН ШАЛГАЛТЫН АЖИЛЛАГАА ДУУСААГҮЙ БАЙХАД МАНАЙХААС МЭДЭЭЛЭЛ ӨГӨХ БОЛОМЖГҮЙ

     Харин ахуйн түймэр юунаас болж гарсан талаар Хэнтий аймгийн Онцгой байдлын газрын дарга Ж.Эрдэнэбатаас тодрууллаа. Тэрбээр “Гал түймэр юунаас болж гарсныг манай албаныхан тодорхойлж байгаа. Цагдаагийн байгууллагаас зохион байгуулж буй мөрдөн шалгалтын ажиллагаа бүрэн дууссаны дараа галын дүгнэлтийг тайлбарлана. Шалгалтын ажиллагаа дуусаагүй байхад манайхаас мэдээлэл өгөх боломжгүй” гэлээ.