• Өнөөдөр 2026-11-20

Монголын хөрөнгө оруулалтын “Сингапур-2026” форум амжилттай боллоо

2026-11-20,   163

    Монгол Улсаас Бүгд Найрамдах Сингапур Улсад суугаа Элчин сайдын яам болон Capital Markets Mongolia (CMM) хамтран “Монголын хөрөнгө оруулалтын форум – Сингапур 2026” арга хэмжээг амжилттай зохион байгууллаа. Форумд Монголын болон олон улсын хөрөнгө оруулалт, банк, санхүү, бизнесийн салбарын 200 гаруй төлөөлөгч оролцож, Монгол Улсын эдийн засгийн төлөв, хөрөнгө оруулалтын боломж, хамтын ажиллагааны талаар санал солилцов.

    Форумыг Элчин сайд Г.Уянга нээж, Монгол, Сингапурын хамтын ажиллагааг ногоон эдийн засаг, нүүрстөрөгчийн зах зээл, технологи, инновацын салбарт өргөжүүлэх боломжийг онцлов. Мөн хоёр улсын нүүрстөрөгчийн зах зээлийн хамтын ажиллагааны хүрээнд төслийн өргөдлийг 2026 оны аравдугаар сарын 30-ны өдрөөс хүлээн авч эхэлснийг мэдээлж, Монгол Улсын хөдөө аж ахуй, ноолуур, мах, арьс шир боловсруулах зэрэг уул уурхайн бус салбарын хөрөнгө оруулалтын боломжийг танилцуулав.

   Форумын үеэр Монголын бондын зах зээл, эрчим хүчний шилжилт, нөөцийн үр ашигтай ашиглалтын талаар хэлэлцүүлэг өрнүүлж, “BlackRock”, “UBS Asset Management”, “Wellington Management”, “Standard Chartered”, “DBS”, “BNY”, “MUFG”,  “IFC” зэрэг олон улсын санхүүгийн байгууллагын төлөөлөл оролцов. Түүнчлэн Голомт банк, “ICFG Limited”, “Steppe Link Holding” байгууллагууд хөрөнгө оруулалтын төсөл, боломжуудаа танилцуулж, “CMM”-ийн “Mongolia Desk” мэдээллийн платформыг нээлээ. Энэхүү форум нь Монгол Улсын хөрөнгө оруулалтын боломжийг олон улсад таниулах, бизнесийн түншлэл, эдийн засаг, санхүүгийн хамтын ажиллагааг өргөжүүлэхэд чухал ач холбогдолтой боллоо.

 


 

 


Монголын хөрөнгө оруулалтын “Сингапур-2026” форум амжилттай боллоо
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188