Худалдаа, хөгжлийн банкны харьяа “Ти Ди Би Секьюритис” (TDB Securities) үнэт цаасны компани болон “International Customer Experience Institute” (ICXI)-ийн Ази дахь бүсийн түнш байгууллага “CMI”-ийн төлөөлөгчдийг  Монгол Улсаас Англи Улсад суугаа Элчин сайдын яаманд хүлээн авч уулзлаа. “TDB Securities” нь Монгол Улсын хөрөнгийн зах зээлийн тэргүүлэгч үнэт цаасны компаниудын нэг бөгөөд дотоодын хөрөнгө оруулагчдыг дэлхийн санхүүгийн зах зээлтэй холбох чиглэлээр анхдагч үүрэг гүйцэтгэж ирсэн байгууллага юм.

    Тус компани нь Британид төвтэй “International Customer Experience Institute”  (ICXI)-ээс боловсруулсан “ICXS:2024” стандартыг байгууллагын хэмжээнд амжилттай хэрэгжүүлж, 125 жилийн түүхтэй, стандарт болон баталгаажуулалтын дэлхийд нэр хүндтэй байгууллага болох Их Британийн Стандартын хүрээлэн (BSI)-ийн хараат бус үнэлгээгээр “International Service Excellence” түвшний баталгаажуулалт хүртсэн Монгол Улсын анхны байгууллага болжээ.

    “ICXS:2024” нь хэрэглэгчийн туршлагын удирдлагын олон улсын стандарт бөгөөд байгууллагын засаглал, соёл, үйлчилгээний чанар болон гүйцэтгэлийг цогцоор нь үнэлж, харилцагчид, хөрөнгө оруулагчид, ажилтнууд болон бусад оролцогч талуудад хүргэж буй үнэ цэнэ, туршлагыг тасралтгүй сайжруулахад чиглэдэг.

    Уулзалтын үеэр Монголын хөрөнгийн зах зээлийн хөгжил, олон улсын шилдэг туршлага, мөн Британи дахь Монгол иргэдэд хөрөнгө оруулалтын бүтээгдэхүүн, үйлчилгээний хүртээмжийг нэмэгдүүлэх чиглэлээр хамтран ажиллах талаар санал солилцов.