Одоогийн улс төрд олны анхаарлаас хол хэдий ч хамгийн зэвүүн, хоржоонтой нүүдэл хийж байгаа нь Ерөнхийлөгч асан Н.Энхбаяр байна. Хүүгээ УИХ-д суух бүх ар талыг нь даагаад, араас нь хамгийн ойрын “цэрэг”-ээ Засгийн газарт сайдаар “шахсан”. МАН-аас өрх тусгаарлаж, МАХН-ыг байгуулсан тэрбээр намынх нь гишүүд байр сууриа олж, яг учраа мэдэж хөл дээрээ тогтдогийн даваан дээр гэнэтхэн МАН-тай гар барилцах тохироонд хүрсэн.

       Ингээд гишүүд дэмжигчдийнхээ итгэл үнэмшлийг ч сонсохгүй өөрийнхөө бойжуулсан МАХН-ыг МАН-д тушаачихаад өөрөө ҮАБЗ-д зөвлөхөөр ажиллаж суугаа. Төрийн гурван өндөрлөгийн суудалд гурвууланд нь сууж, нэг хэсэг Н.Энхбаяраас өөр эрх мэдэлтэн байхгүй мэтээр улс төрд бааварлаж явсан нэгэн. Гэнэт л Үндэсний аюулгүй байдлын судалгааны хүрээлэнгийн зөвлөх болчихоод сууж байгаа нь үнэнд нийцэхгүй мэт санагдаж байгаа биз. Хамгийн сүүлийн жишээгээр бодоход л Үндсэн хуульд бүхэлд нь өөрчлөлт хийх санал Засгин газраас түүнд тавьж, хуулийн шинэ төсөл боловсрууаад ном болгож, хэвлүүлж тараасаар байтал түүнийг нь Засгийн газраас олон нийтэд танилцуулаа ч үгүй буцаасан. Тийм атал ганц үг ган хийлгүй чимээгүй л байсан. Оймстойгоо хүртэл ачигдаж, МАН-ынхныг хорхойтой араандаа зуучихсан явсан түүний амбиц нь нэг Засгийн газарт нэг сайдын суудал авч, ганц хүүгээ улс төрийн зах зухаас атгуулаад үлдээх биш л байлтай.

          Нэг ёсондоо МАН-д хэзээ ч эргэж очихгүй мэтээр улс төрд улайрч байсан түүний нүүдэл хожигдлоор дуусахгүй нь лавтай. Тэгэхээр Н.Энхбаярын улс төр ил биш далд,  хөшигний ард чимээгүйхэн өрнөж байгаагаас гарцаагүй. МАН-д дахин Н.Энхбаярын гэх бүлэглэл чимээгүй хэр нь цоо шинээр бүрэлдэж, улс төрийн шинэ өрөг эхлэхээр цагаа хүлээж байгаа бололтой. Өнөөгийн парламентад Н.Энхбаярыг цагтаа “Хаан” явахад нь түшиж босож ирсэн улстөрчид цөөнгүй бий. Тэр тусмаа намынхаа толгой баячууд, томоохон бизнесмэнүүд нь Н.Энхбаярын туслахаас улс төрийн гараагаа эхлүүлж, улс төрд хөтлүүлж байсан нь ч бий. Тухайлбал, Эрчим хүчний сайд Б.Чойжилсүрэн Н.Энхбаярын зөвлөхөөс улс төрийн карьераа эхлүүлсэн. Түүнчлэн УИХ-ын гишүүн ХХААХҮ-ийн сайд Х.Болорчулуун, Барилга хот байгуулалтын сайд Ц.Даваасүрэнгээс нар Н.Энхбаярын “цэрэг”-үүд байлаа. Түгжрэлийн сайд асан ногоон автобусны хэрэгт холбогдоод буй Ж.Сүхбаатар ч гэсэн Н.Энхбаярыг БНСУ-д эмчлүүлж байх хугацаанд эргэж очсоноо зарлаж, хамт авахуулсан зургаа хүртэл нийтэлж байсан АН-д элссэн гэх С.Ганбаатар ч Н.Энхбаяртай гар нийлэн ажиллаж байв. Түүнчлэн УИХ-ын гишүүн Н.Батшугар, Боомтын сэргэлтийн сайд Б.Тулга гэхчлэн одоогийн Их хуралд суугаа гишүүдийн олонх нь Н.Энхбаярын удирдлага дор ажиллаж байсан.

      Тэгэхээр Н.Энхбаярын улс төрийн карьер энэ хүрээд дуусчихгүй нь гэж лавтай. Түүний хүү Н.Батшугар ч хорхойд хоргүй гэмгүй нэгэн биш. Өөрөөр хэлбэл, улс төрд карьер хөөхөөс гадна уул уурхайд хүч үзэх гэж оролдоод бүтэлгүйтсэн нэгэн. 2016 онд Монголбанкны Дэд ерөнхийлөгчөөс чөлөөлөгдөж, тэр даруйдаа аав Н.Энхбаяраасаа 17 компани өвлөж авсан. Олон нийт Э.Батшугарыг хэвлэлийн, хөрөнгө оруулалтын бизнестэй л гэж ойлгодог боловч уул уурхайн бизнес ч түүнд бий.  

     Тодруулбал, Н.Энхбаяраас Э.Батшугарт шилжсэн “Сод маргад” ХХК нь Ховд аймгийн Дуут сумын Шивэр багийн нутагт XV-014066 дугаартай, 11575.72 га талбайтай Дуут хэмээх хайгуулын тусгай зөвшөөрлийг 2008 оноос хойш эзэмшиж ирсэн.  XV-014066 дугаартай энэхүү тусгай зөвшөөрөлтэй талбай нь Дуут сумынхны тахилгат уул болох Бүргэдтэй хайрханы бэлд олгогдсон байсан учраас Н.Энхбаяр улс төрийн карьераа бодолцож, хайгуул хийхгүй хав дарж хадгалж байсан гэлцдэг. Харин 2019 оны намар Э.Батшугар хайгуулын ажлыг эхлүүлэхээр шийджээ. “Сод маргад” ХХК-ийн ажилчид нь Ховдын Дуут сумын Бүргэдтэй хайрхан бэлд очиж, кемпээ байгуулж, олон тооны өрөм зоож, хайгуулын ажлаа эхлүүлсэн байгаа юм. Үүнийг нь нутгийн иргэд эсэргүүцэж, энэ нь эсэргүүцэл нь өндрөө авч, Ховд аймгийн ИТХ-аас Ажлын хэсэг байгуулагдаж “Сод маргад” ХХК-ийн үйл ажиллагааг зогсоосон гэдэг. Аав хүү  хоёрын уурхайн ажил ингэж бүтэлгүйтсэн ч улс төрийн давцанд дөрөө хоршуулахаар зэхэж байгаа бололтой.

          Хэдийгээр Н.Энхбаяр У.Хүрэлсүхийг намын даргаар ажиллаж байх хугацаанд МАН-тай нэгдэж гар барилцсан ч өнөөдөр Л.Оюун-Эрдэнэтэй ойлголцоод чимээгүйгээр улс төрд оршиж байна. Тэгэхээр Л.Оюун-Эрдэнийн нууц хөзөр Н.Энхбаярын бүлэглэл юм биш үү дээ. Түүнд Х.Нямбаатараас өөр хань түшиг байхгүй юм шиг аашилж, Хөгжлийн банк, нүүрсний хулгай, боловсролын зээлийн сангийн асуудлаар намынхаа томчуудтай муудсан нь ч ийм учиртай байж мэдэх нь. Угтаа бол Сү.Батболдын фракц, Миеэ.Энхболдын фракц гээд Л.Оюун-Эрдэнийг дарлаж байсан бүлэглэлүүдийг хаашаа ч хөдөлгөхөөргүй болгох тактик боловсруулж байсан байж мэдэх нь

 Цаашлаад Ерөнхийлөгч асан Ц.Элбэгдоржийн зарласнаар “С.Зоригийг алсан жинхэнэ хэрэгтнийг чи дэргэдээ авсан шүү” гэж хэлсний эргээд нэг харахад ч буруудах зүйлгүй  юм байна.