Монгол Улсын Ерөнхийлөгч Х.Баттулгын оффшор дансны асуудал аль 2017 оноос яригдаж эхэлсэн билээ. Түүнийг Ерөнхийлөгчийн сонгуульд нэр дэвших үеэр УИХ-ын гишүүн Т.Аюурсайхан оффшортой холбоотой асуудлаар нь тайлбар хүсэж байсан юм. Тухайн үед УИХ-д “Оффшорын эсрэг бүлэг” байгуулагдаж,УИХ-ын гишүүн Т.Аюурсайхан мэдээлэл хийж байсан билээ. Тэрбээр “Ерөнхийлөгчийн сонгуульд нэр дэвшигч Х.Баттулга нь оффшор дансныхаа талаар СЕХ-нд мэдүүлээгүй байна. Х.Баттулга оффшор бүсэд байгаа 17 тэрбум төгрөгөө улсын төсөвт оруулж ирэхийг шаардаж байна” хэмээж байсан. Гэвч Ерөнхийлөгч Х.Баттулга үүнд ямар нэгэн тайлбар хэлэлгүй өнгөрсөн. Тэгээд ч оффшорын асуудал түүний сонгуулийн сурталчилгаанд сөргөөр нөлөөлөөгүй гэж хэлж болно. 

Харин ч Ерөнхийлөгч болсныхоо дараа улстөрчид болон төрийн өндөр албан тушаалтнуудад хандан “49 хоногийн дотор оффшор бүс дахь мөнгөө Монголбанканд оруулж ирэхийг уриалж, энэ талаар тууштай тэмцэнэ” гэдгээ мэдэгдсэн. Энэ нь ч иргэдэд таалагдаж, түүний оффшорын асуудлыг мартсан биз. Түүнээс хойш дөрөв дэх жилийнхээ нүүрийг үзэж, Ерөнхийлөгч Х.Баттулга ч таг, оффшор бүсээс хэчнээн төгрөг орж ирсэн нь ч тодорхойгүй байна. Харин энэ талаар иргэд сонирхоход “Оффшор бүсээс чамгүй мөнгө орж ирсэн” хэмээн иргэдийн амыг таглаад авна лээ. 

Тэгвэл энэ удаад Ерөнхийлөгч Х.Баттулгын оффшор дахь хөрөнгө Олон Улсад шуугиан тарьж эхэлжээ. Сингапурт бүртгэлтэй "Женко Холдинг" компанийн 50 хувийг түүний охин Б.Намуун, үлдсэн 50 хувийг Ерөнхийлөгч Х.Баттулгын хөрөнгө оруулалтын менежер Билли Лимийн хүү Деннис эзэмшдэг талаар гаднын хэвлэлүүд бичиж байна. Ерөнхийлөгчийн охин Б.Намуун Сингапурийн “Overseas Family School”-д суралцаж байсан нь ч энд компаниа бүртгүүлж үйл ажиллагаа явуулахад нөлөөлсөн биз. 

Мөн “Женко Холдинг” компанийг нэг сая ам.долларын дүрмийн сантай байгуулсан тухай болон Х.Баттулга Монголд “Камекс” компани байгуулж, түүний охин компаниуд нүүрс, алт, зэсийн үнэт 17 лицензийг авсан талаар мөн бичсэн байна. Түүнчлэн 2010 онд Хонконгийн хөрөнгийн биржээс Монгол дахь Төгрөг нуурын нүүрсний ордыг Х.Баттулга 250 сая ам.доллараар Кайманы арлуудад бүртгэлтэй Хятадын эзэмшдэг Ming Shin Waterworks Holdings Limited компанид худалдсан гэх мэдээллийг мөн бичжээ. 

Тухайн үед Ерөнхийлөгч Х.Баттулга Зам тээвэр, барилга хот байгуулалтын сайдаар ажиллаж байсан. Харин 2012 онд Төгрөг нуурын ордыг Хонконгийн компанид зарсан байж болзошгүй тухай хэсэг шуугиад намжсан билээ. 

2017 оноос хойш түүний оффшорын асуудлыг хэн ч сөхөөгүй бөгөөд ойрын өдрүүдэд олон нийтэд дахин ил болж байна. Гэвч Ерөнхийлөгч Х.Баттулга оффшор бүсэд нуусан компанийнхаа талаар өнөөдрийг хүртэл ямар нэгэн тайлбар хэлээгүй л байна. Түүний хөрөнгө орлого жилээс жилд өссөн бөгөөд “Женко тур бюро” ХК, Мах импекс ХК зэрэг 20 орчим компанд хувь эзэмшдэг аж. 

Оффшор бүсэд данс нээх, хөрөнгө байршуулах, компани байгуулах нь улстөрчид тэр дундаа төрийн өндөр албан тушаалтнуудад байж боломгүй зүйл. Учир нь төрийн өндөр албан тушаалтнууд олон нийтэд хөрөнгө орлогоо мэдүүлж, АТГ-д хянуулж байх ёстой. Гэтэл олсон орлогынхоо эх үүсвэрийг иргэдээсээ нууж байгаа нь ёс зүйгүй үйлдэл юм. Тиймээс иргэд хардаж, энэ талаар Төрийн тэргүүнээс тайлбар нэхэж байна. 

Хэрвээ Ерөнхийлөгч хэлсэн амандаа хүрч, улстөрчдийн оффшор бүс дэх хөрөнгийг оруулж ирсэн болон өөрийн компанийн талаар тайлбар хэлбэл ирэх оны Ерөнхийлөгчийн сонгуульд иргэдээс өндөр оноо авах нь гарцаагүй биз ээ. 

Дашрамд дурдахад, Сангийн сайд асан С.Баярцогт, УИХ-ын гишүүн Сү.Батболд, Д.Цогтбаатар нарын нэр оффшорт холбогдож, энэ талаараа өөрсдөө тайлбар хийж байсан билээ.