-“ХАМТЫН ХҮЧЭЭР КОРОНАВИРУСИЙН ХАЛДВАРЫГ ДАВНА" ГЭЖ БАЙНГА ХЭЛДЭГ БАЙСАН САЙД, ДАРГА НАР ЧИНЬ ХАМТАРЧ ЧАДАХАА БОЛИЛОО-

Баянзүрх дүүргийн эмнэлэг одоогоор хамгийн ноцтой халдварын голомт болчихоод байна. Энэ эмнэлгээр үйлчлүүлсэн хэдэн зуун хүн халдвар авах эрсдэлд орчихсон, хэвтэн эмчлүүлж байсан хэдэн арван хүн халдвар авчихаад байгаа. Өнөөдрийг хүртэл төр засгаас гаргасан шийдвэр бүхнийг иргэд даган биелүүлсэн. Ингэх ч учиртай. Гэвч гудамжинд яваа иргэдээс халдвар тарсангүй. Үйл ажиллагаагаа явуулж байгаа аж ахуйн нэгжүүдээс халдвар илэрсэнгүй. Харин хамгийн бэлэн байдалд, хамгийн дэг журамтай байж, халдвар хамгааллын дэглэмийг мөрдөж ажиллах ёстой эмнэлгээс халдвар илэрч, хамгийн аюултай нөхцөл байдлыг үүсгээд байна. Төрийн тусгай, онцгой байдал, эмч, цагдаагаар хамгаалуулж байсан “Энхсаран” сувиллаас халдвар тархаснаас хойш өнөөдрийн байдлаар коронавирусийн халдвар мянга давчихаад байгаа. Цаашид энэ тоо хэд хүрэхийг таашгүй. 

Гэтэл хэдэн сайд, дарга нар хоорондоо түнжин хагарч, хэдэн тийшээ хараад суучихсан дүр зурагтайбайна. Ерөнхий сайд У.Хүрэлсүхийн үгээр бол монголчууд бид яг одоо үхэх, сэхэхийн зааг дээр дайны нөхцөлд гардан тулалдаанд оролцож байгаа. Гэвч гардан тулааныг удирдаж байгаа сайд, дарга нарт нэгдсэн нэг “толгой” гэж алга. 

Гаргасан шийдвэр бүхэн нь “ганц хоногийн настай”, эргэж буцсан байдгаас болж иргэд л хохирч байна. Сүүлийн үед Улсын онцгой комиссын дарга Я.Содбаатар, Нийслэлийн онцгой комиссын дарга Д.Сумъяабазар нар нэгдсэн ойлголцолд хүрч, хамтарч ажиллаж чадахаа больсон гэнэ. Тэдний гаргасан шийдвэр бүхэн хоорондоо зөрчилдөж ирсэн билээ. Тиймдээ ч Ерөнхий сайд У.Хүрэлсүх хотын дарга Д.Сумъяабазарыг дуудаж,“УОК-той уялдаа холбоотой ажиллахыг хатуу сануулсан гэдэг. Нэг ёсондоо НОК, ЭМЯ, ХӨСҮТ нь Улсын Онцгой комиссынхоо үгийг ч тоохоо больсон гэхэд хилсдэхгүй. Гэвч хотын мээр Ерөнхий сайдын үгэнд орох нь битгий хэл гэдийгээд “хэвтчихсэн” сурагтай.

        Түүнчлэн Монгол Улсын иргэдийн амь нас эрүүл мэндийг гартаа атгаж байгаа ЭМЯ, ХӨСҮТ-ийн удирдлагууд бие биедээ нуруугаа харуулаад цөөнгүй хонолоо. Эрүүл мэндийн сайд Т.Мөнхсайхан, ХӨСҮТ-ийн дарга Д.Нямхүүг ажлаа өгөхийг шаардсан гэх мэдээлэл бий. Сайд нь үүрэг даалгавар өгөхөөр Д.Нямхүү нь нас, мэргэжил, олон жилийн туршлага зааж өөрийнхөө арга барилаар ажиллах гээд байдаг бололтой. Гэвч залуу сайд албан тушаалын хүчийг үзүүлж, ХӨСҮТ-д Мэргэжлийн хяналтын шалгалт оруулаад авсан. Шалгалтаар ноцтой зөрчлүүд илэрч, улмаар халдвартын эмнэлгээс иргэдийг Цэргийн төв эмнэлэг рүү шилжүүлэх чиглэл өгсөн ч ХӨСҮТ-ийн дарга Д.Нямхүү нь “Үгүй” гээд тас гүрийж үзсэн. Энэ мэтээр тэдний үл ойлголцол зөвхөн албан тушаалын бус ард түмний хэрэг болж улам өргөжиж байна. Гэвч энэ цаг үе бол Т.Мөнхсайхан, Д.Нямхүү гэх хоёр хүний асуудал биш, нийт монголчуудын эрүүл мэнд, амь нас, үндэсний аюулгүй байдал “чичирч” буй хугацаа.  Өнөөдрийн нөхцөл байдлыг харахад “дайны бүслэлтэд байсан” арван сарын хугацаанд эрх баригчид яг үнэндээ ямар ч бэлтгэл ажил хангаагүй нь, ядаж л удирдлагын багаа чадавхжуулж, нэгтгээгүй нь харагдаж байгаа юм. Наад зах нь дотоодод халдвар тархвал бид яах вэ гэдгийг тооцож үзээгүй гэхэд хилсдэхгүй. Яг үнэндээ өнгөрсөн хугацаанд Эрүүл мэндийн яам, УОК “халдвар нэмэгдвэл” гэх нөхцөл байдлыг хэдэн ор нэмээд болчихно гэж тооцсон бололтой. Түүнчлэн иргэдээ шинжилгээнд хамруулахдаа хариуг нь хэрхэн мэдэгдэх талаар ч тэд тооцоолоогүй  байсан. 

         Ядаж л сайд, дарга нар нь гэнэтийн цочролд орохгүй байх бэлтгэлийг хангах ёстой байсан. Гэтэл дотоодын халдвар нэмэгдэж хүндрэл учраад ирэхээр сайд, дарга нар яах учраа олохоо больж, нэг, нэгэндээ уурлаж, нэгдсэн шийдэлд хүрч, хамтарч ажиллаж чадахгүй, тал талд дөвчигнөөд эхэллээ. 

МАН-ын дарга У.Хүрэлсүх “Хүчээ нэгтгэе” уриатай УИХ-ын сонгуульд оролцож, үнэмлэхүй олонх болсон. Гэвч өнөөдрийн байдлаар эрх баригч намын сайд, дарга нар энэ хүнд үед хүчээ нэгтгэх нь битгий хэл бусдынхаа үгийг ч даах тэнхэлгүй, чадваргүй байгаа нь олон зүйлээс харагдаж эхэллээ. Үүнээс хэцүү зүйл болбол хариуцлагатай алба хашиж буй өнөөх хэдэн дарга, даамлууд маань яаралтай арга хэмжээ, тактик, төлөвлөгөө гарган ягштал мөрдөж, сэмбийтэл ажиллаад, даваад гарахын оронд хошуугаа унжуулж сууцгаачихаад, Д.Нямхүү эмчийн хэлдгээр “коронавирустэй хэрэлдээд ялагдах” нь л дээ. 

Өнөөдрийн нөхцөл байдлыг харахад “дайны бүслэлтэд байсан” арван сарын хугацаанд эрх баригчид яг үнэндээ ямар ч бэлтгэл ажил хангаагүй нь, ядаж л удирдлагын багаа чадавхжуулж, нэгтгээгүй нь харагдаж байгаа юм