2019 оны гаднын улсад байхдаа гэмт хэрэгт нэр холбогдсон 69 хүнийг УИХ-ын чуулганы нэгдсэн хуралдаанаар хэлэлцэж, нэр бүхий зургаан хүнийг эгүүлэн татаж байсан. 

Тодруулбал, хил дамнасан гэмт хэрэгт холбогдсон үндэслэлээр Х.Даваадоржийг Бельги Улс дахь Монголын Элчин сайдын яам болон Европын холбоо, НАТО болон Бенилюкс орнуудын элчин сайдын зөвлөхийн албан тушаалаас чөлөөлсөн. 

Мөн А.Батсайханыг Бүгд найрамдах ардчилсан Лаос улс дахь Элчин сайдын яамны зөвлөхийн албан тушаал, Д.Мөнх-Эрдэнийг БНХАУ-ын Хөх хот дахь Ерөнхий консулын албан тушаал, Б.Баттүшиг БНТУ-ын Истанбул хотод суух Ерөнхий Консулын газрын дэд консулын албан тушаалаас чөлөөлж байжээ. Мөн С.Эрдэнэбаярыг БНТУ-ын Истанбул хотод суух Ерөнхий Консулын газрын жолоочийн албан тушаалаас, С.Эрдэнийг Хонгконгт суугаа Ерөнхий консулын албан тушаалаас чөлөөлж байсан удаатай.

      Гадаад хэргийн дэд сайд асан Ц.Цолмон ОХУ-д Элчин сайдаар сууж байхдаа (1998- 2001 онд) тамхины наймааг анх зохион байгуулалтад оруулсан хүний нэг гэгддэг.

     С.Эрдэнээ нь Монгол Улсаас Австри улсад суугаа Элчин сайдын яаманд атташегаар ажиллаж байсан. ХБНГУ-д тамхины хууль бус наймаа хийсэн хэргээр 2002 онд саатуулагдан, тус улсын хууль хяналтынхан нэг хэсэг хорьж байгаад сулласан гэдэг.

      Цэрэнсодном нь Унгарт суугаа Элчин сайдын яаманд ажиллаж байхдаа тамхины наймааны хэргээр 2003 онд саатуулагдсан.

     Д.Шатарбал нь БНБУ-д суугаа Монгол Улсын Элчин сайдын яаманд зөвлөхөөр ажиллаж байхдаа их хэмжээний хар тамхийг дипломат дугаартай машинаараа тээвэрлэж явахад нь тус улсын тусгай албаныхан баривчилсан. Болгарт хорьж байгаад манай талд шилжүүлсэн. Тамхины хууль бус наймаанд холбогдон шүүхээс ял шийтгүүлсэн ганц дипломатч юм.Шүүхээс түүнд найман жилийн хорих ял ногдуулсан, ял эдэлж байгаад гарсан.

      “Болгар” хэмээх Ганболд- Дипломат байгууллагын үйлчилгээ, аж ахуйн газрын орлогч даргаар ажиллаж байсан. БНБУ-д суугаа Элчин сайдын яаманд ажиллаж байхаасаа эхлэн тамхины наймаа хийсэн гэдэг. ОХУ-д суугаа Монгол Улсын ЭСЯ-нд Элчин зөвлөх байхдаа эхнэр Сэлэнгийн хамт тамхины наймаа хийж яваад 2005 онд ХБНГУ-д баривчлагдсан. Энэ хэргээр эхнэр нь нэг хэсэг тус улсад ял эдэлсэн.

         Б.Даваадорж нь тамхины хууль бус наймаа хийсэн хэргээр шалгагдаж байсан. “Монгол Улсын Элчин сайдын яамны дипломат дугаартай машинаа алдсан” гэж тухайн үед мэдүүлж байжээ. Хэрэгт холбогдуулан шалгах үед алдсан гээд байсан машин нь гэнэт олдсон. Албаны машинаа тамхины наймаачдад ашиглуулж байсан хэмээн түүнийг сэжиглэдэг. Ийм хэрэгт холбогдсон ч ХБНГУ-д суугаа Монгол Улсын Элчин сайдаар томилогдож байжээ. 

Х.Бэхбат нь Женевт Элчин сайдаар сууж байхдаа тамхины хууль бус наймаанд оролцсон хэргээр нэг хэсэг шалгуулсан.

       С.Цоггэрэл  ТЕГ-ын Гадаад тагнуулын газрын даргаар ажиллаж байгаад дипломат албанд шилжсэн. ОХУ дахь Монгол Улсын Элчин сайдын яаманд ажиллаж байхдаа тамхины хэрэгт сэжиглэгдэж байсан ч мултарч, Чех улсад Элчин сайдаар томилогдсон.

        А.Баатарцогт ХХЕГ-т ажиллаж байгаад ОХУ-д Элчин сайдын яаманд  хилийн төлөөлөгчөөр сууж байсан. Энэ хугацаанд түүний албан өрөөнд байсан төмөр шүүгээнээс 250 гаруй мянган ам.доллар алдагдсаныг дээрх хууль бус наймааны мөнгө хэмээн сэжиглэж байсан. Энэ хэргийн дараа ОХУ-ын Эрхүү хотод консулаар томилогдсон байдаг.

Г.Дашдаваа БНБУ дахь Монгол Улсын Элчин сайдын яаманд ажиллаж байсан. Эхнэрийн хамт тамхины наймаа хийсэн хэрэгт сэжиглэгдэж байжээ. 

      Монгол Улсаас Истанбул хотод суух Ерөнхий консул Б.Баттүшиг, жолооч С.Эрдэнэбаяр Германы Дрезден хотноо машиндаа 70 кг хар тамхи тээвэрлэж яваад баригдсан. Тэднийг анх 2019 оны тавдугаар сарын 3-ны өдөр дипломат дугаартай "Мерседес бенз" маркийн автомашиндаа гурван сая еврогийн үнэ бүхий 70 кг хар тамхи тээвэрлэж явахад нь Германы цагдаа нар саатуулан баривчилсан байдаг. 

Бүгд Найрамдах Франц Улсад суух Онц бөгөөд Бүрэн эрхт Элчин сайд асан А.Баттөр оффшор бүсэд мөнгө угаасан байж болзошгүй хэрэгт нэр холбогдож байв. Онц бөгөөд бүрэн эрхт Элчин сайд дипломат цолтой, дипломат албанд 16 жил ажилласан нэгэн. Элчин сайд А.Баттөрийг Ерөнхийлөгч асан Ц.Элбэгдоржийн ойрын хүн гэдэг. Тэрбээр Батлан Хамгаалахын сайдын албан тушаалаар 2012-2015 онд шагнуулж байсан гэх мэдээлэл ч бий.