МАН-ын хагарал ёроолдоо туллаа. Анх МАН-ын даргын төлөөх өрсөлдөөн байсан бол сар гаруй хугацаанд шийдэлд хүрэхгүй явсаар төрийн “зовлон” болж, Төрийн ордон хөл толгойгоогүй бужигнах болов. Өдөр болгон шинэ мэдээлэл, шинэ сенсаци гаргаснаас өөрөөр төрийн ажлыг урагшлуулах ганц шийдэл ярьсангүй. Байнгын хороо чуулганы хуралдаан ч хийхээ болиод удаж байна. Сүүлдээ нам дотроо хоёр даргатай,  хоёр  дарга нь дахиад тус тусдаа даргатай болтлоо хагарч байна.

         Өчигдөрхөн гэхэд л МАН-ын бүлэг хоёр хуваагдаж, хоёр даргатай болж буйгаа зарлав. Өөрөөр хэлбэл, УИХ дахь одоогийн МАН-ын бүлгийн даргаар УИХ-ын гишүүн Ж.Бат-Эрдэнийг томилон ажиллуулж эхэлсэн. Гэвч намынх нь нэр бүхий гишүүд бүлгээ хуралдуулах шаардлага хүргүүлж, хуралдахгүй байна гэх шалтгаанаар “шинэ” бүлэг байгуулан УИХ-ын гишүүн Ж.Батжаргалыг даргаар томилж орхив. Энэ талаар УИХ-ын гишүүн Ж.Батжаргал “МАН хоёр хуваагдаагүй ээ. Бид нэг бүлэг. Тийм учраас асуудлаа хооронд ярьж, хууль дүрмийнхээ хүрээнд шийдсэн асуудлаа дээдэлж явах ёстой.  2025 оны аравдугаар сарын 15-ны өдөр УИХ дахь МАН-ын бүлгийн ээлжит бус хуралдаан боллоо. Хуралдаанаар хоёр асуудал хэлэлцлээ. Нэгдүгээрт, МАН-ын бүлгийн даргыг сонгох асуудлыг хэлэлцэж, хуралдаанд оролцсон гишүүдийн дийлэнхийн саналаар шинэ даргаар намайг сонголоо. Хоёрт, МАН-ын бүлэг дээр ажлын хэсэг байгуулах тухай хэлэлцэж, шийдвэрлэлээ. Учир нь Засгийн газраас УИХ-д 2025 оны есдүгээр сарын 1-нд Монгол Улсын 2026 оны нэгдсэн төсөв, түүнийг дагасан хууль тогтоомжуудыг өргөн мэдүүлсэн. Өнөөдөр 2025 оны аравдугаар сарын 15-ны өдөр. Хуулиараа бид ирэх оны төсвөө арваннэгдүгээр сарын 15-ны дотор баталдаг. УИХ-ын үндсэн бүтэц болсон байнгын хороодоор улсын төсвийг хэлэлцэж байгаа ч хууль тогтоомжуудад болон 2026 оны Хөгжлийн төлөвлөгөөнд нийцсэн эсэх талаарх санал хураалтыг хийгээгүй байна. Тийм учраас улсын төсвийг хэлэлцүүлэгт бэлтгэх бүлгийн ажлын хэсгийг байгуулах нь зүйтэй юм байна гэж үзлээ” хэмээн мэдээллээд буй.

         Эсрэг талд нь зарим гишүүдэд намын хурлын тов зар ирээгүй хэмээн бухимдаж, уг бүлгийг дүрмийн бус, хууль бус шийдвэр гаргасан гэж тайлбарлаж эхэлсэн. Энэ талаар УИХ-ын гишүүн Б.Баярбаатар “МАН бүлгийн хурлын зар надад ирээгүй. Албан ёсны зар өчигдөр ирсэн. Зарын дагуу Бүлгийн даргаас тодруулсан. Тодорхой нэр бүхий гишүүд Бүлгийг хуралдуулах шаардлага тавьсныг өнөөдөр 12:00 цагт хуралдана гэж ойлгосон. Би хурал болж байгааг цахим орчноос мэдсэн. Хууль бус хурал шүү дээ. Бүлгийн дарга нь товоо тогтоож, ажлын алба нь хурлын товтой холбоотой бэлтгэл ажлаа хангана. Хурал нь хууль бус юм чинь шийдвэр нь ч хууль бус гэсэн үг. Хэлэлцэх асуудлаарлаар орж ирээд ярьж болно шүү дээ. Гэтэл хүч түрж ингэж болохгүй. Бүлгийн даргыг чөлөөлж байгаа үндэслэл нь зөв буруу юм уу гэдгийг нь ч мэдэхгүй байна” хэмээсэн.

       Тэгэхээр МАН-аас  гарсан шийдвэр болгон нь хоёр тусдаа болох нөхцөл байдал үүслээ. Эрх баригч намынхны энэ хагарал Монгол Улсыг хоёр хуваахдаа ч тулаад байна. МАН-ын цагаан байрныхан эргэлт буцалтгүй хоёр хуваагдаж, нэг нам нэг үзэл санааны төлөө явж байсан журмын нөхөд хүртэл нэгнээ харлуулах  ажлыг хийж эхлээд удаж байна.

       Цаашлаад төрийн ажлыг шат шатанд нь гацааж, Төрийн албаныхан хүртэл хоёр талцаад эхэлсэн. Судлаач, эрдэмтэд нь улс төрийн тодорхойгүй нөхцөл байдлын талаар байр сууриа илэрхийлэх, гарц гаргалгааг нь үнэн мөнөөр нь тайлбарлахаас ч айж, бэргэж зугтаах болов. Угтаа бол тэмцэлдэгч хоёр тал хэн нэгний үнэн ярьсныг юу ч гэж шүүрч аваад, яаж ч өөртөө ашигтай байж болохоор байгааг бүх талаар нь ажиглаж эхэлнээс болоод хэн хэнийх нь талд орохгүй гэх байр суурийг учир мэдэх хуульчид, судлаачид илэрхийлэх болов. Ийн институц хоорондын “зодоон” монгол төрийн зовлон болж, гацаанд орлоо.

       Хөл толгойгүй энэ “зодоон”-ы хөлд улсын эдийн засаг уруудаж мэдэхээр байна. МАН-ын даргын өрсөлдөөн эхэлнээс хойш шат шатны төрийн байгууллагын ажлууд нам зогсож, нөгөө таван үе шаттай хэлэлцүүлэхээр тогтсон төсөв нам царцах дээрээ тулаад байна. Тэгвэл өдгөө хоёр дахь МАН төрд чимээгүй бүрэлдэж явсан нь одоо илэрч, түүнийг татан буулгах өрсөлдөөн ч МАН-ынхны даргын зодоон дээр илэрч байгаа гэдгийг улс төрийн хүрээнийхэн жиг жуг гэх болсон.

     Эцэст нь дахин сануулахад, Г.Занданшатар, Д.Амарбаясгалан нарын эрх мэдлийн төлөөх өрсөлдөөн  Монголыг хоёр хувааж мэдэх нь.