Шулуухан хэлэхэд Ардчилсан намынхан Ардын намыг улаан цээжээрээ хамгаалж байна. Чуулганаа хуралдуулахгүй, гишүүд нь Байнгын хорооны хуралдаандаа суухгүй, бойкот хийж, эрх баригчдаас хариуцлага нэхэхээсээ илүү хамгаалж, өмгөөлсөн мэдэгдлийг ар араас нь гаргах болов. Ухаандаа Ардчилсан намынхан  Ардын намынханд учраа олох, эвлэрэх боломж олгох цагийг нь сөрөг хүчнийхэн хожиж өгч байгаагаас ялгаагүй харагдаж байна.

        Үндэсний хэмжээний улс төрийн хүчин гэхэд арай л унж дорой улбайж сулбайсан шийдрүүд гаргаж байна даа, Ардчилсан намыхан.  Зүй нь бол Ардын намын дарга нарын “зодоон”-ыг зөвөөр эргүүлж чадвал Ардчилсан намханд хамгийн ашигтай байх байлаа. Гурван сонгуульд дараалан ялагдал хүлээсэн Ардчилсан намынхан ирэх сонгуулиар эрх мэдэлд хүрэх хамгийн том боломж нь одоо л нээгдчихсэн байлтай.

        МАН-ын дарга нарын тэмцэлдээн дундаас гаргаж ирсэн ноцтой баримт болгоныг нь хуулийн байгууллагад барьж очоод, нэг бүрчлэн  шалгуулуулж, олон нийтийн өмнө үнэн мөнийг нь улайтал нь дэлгээд ард түмнээс оноо аваад зогсож байх бүрэн боломж байв, тэдэнд.

         Цаашлаад улсын төсөв хэлэлцэж байгаа цаг хугацаанд төсвийн алдагдлын ингэж бууруулж, хэрэгцээгүй урсгал зардлаа ингэж танаад, багш, эмч, ажилчдын цалинг ийм хэмжээнд нэмж болохоор байна гээд тоо баримтууд барьчихаад улаан нүүрийг нь улалзуулах ёстой байлаа, сөрөг хүчнийхэн. Цаашлаад нууцын гэрээнд оруулж, нүүрс хулгай хийдэг гэх нийгмийн бухимдлыг төрүүлсэн дуулиант асуудлаар ч улс төр хийх боломж, баримт хангалттай ил болчихлоо, нийгэмд

       Харамсалтай нь, тэд тэгсэнгүй. УИХ-д  42 суудалтай сөрөг хүчнээс улс төрийн зангараг, бодлогын шийдвэр огтоос гарсангүй. Адаглаад хамтарсан Засгийн газраас хэлмэгдэж гарсан түүнийхээ хариуг авах хор шар гэж ч алга үнэндээ. МАН-ын дөрвөн жилд амалсан амлалт, мөрийн хөтөлбөрийг нь нэгт нэгэнгүй гаргаж тавиад өнөөгийн нийгмийн бодит байдалтай харицуулан ам асуух бүрэн эрх нь Ардчилсан намынханд бий. Харин ч эсэргээрээ бүлгийн гишүүд нь хоёр хуваагдчихаад чуулганы хуралдаанаа бүлгээрээ орхиж гарч, УИХ-ын даргыг, Ерөнхий сайдтай хамтад нь хэлэлцэх ёстой гэх ядмагхан шийдвэр гаргаснаа танилцууллаа.

АН-ЫН ЯДМАГХАН ШИЙДВЭРТЭЙ, ЧАДВАРГҮЙ УЛС ТӨРИЙН ТОГЛОЛТ

          Тодруулбал, УИХ дахь Ардчилсан намын дарга О.Цогтгэрэл “Нэгдүгээрт, УИХ-ын дарга, Ерөнхий сайд хоёрыг огцруулах асуудлыг хамтад нь хэлэлцэх ёстой. Намын амуудал төрийн асуудал болчихлоо. Засаглалын хямралд хүргэж байгаа асуудлыг хамтад нь хэлэлцэх нь зүйтэй. Хоёрдугаарт, Ардчилсан намын бүлэг санал хураалт хүртэл нэгдсэн байр сууриа илэрхийлэхгүй. Санал хураалтын өдөр нэгдсэн байр сууриа илэрхийлнэ. Гуравдугаарт, цөөнхөөс томилогдсон УИХ-ын дэд дарга чуулганыг даргалах ёстой гэсэн байр суурьтай байна” хэмээн мэдэгдлээ. 

     Уг нь УИХ-ын чуулганаар хэлэлцэх тов дарааллын хувьд Ерөнхий сайдыг огцруулах асуудал эхэнд нь орж, Байнгын хороо хэлэлцээд эхэлсэн. Цаашлаад УИХ-ын даргыг огцруулах саналыг АН-ыг мэдээлэл хийсний дараа буюу өчигдөр үдээс хойш УИХ-ын дэд даргад гишүүд өргөн барьсан байна. Зүй нь Засгийн газрыг огцруулах эсэх асуудлыг хэлэлцэж шийдвэрлэсний дараа УИХ-ын даргад хариуцлага тооцох асуудал орох байлаа. 

          Гэтэл Ардчилсан намынхан энэ хоёр асуудлыг хамтад нь оруулах ёстой гэсэн байр суурь илэрхийлж, дахиад л төрийн ажлыг тодорхойгүй хугацаанд хойшлуулах нөхцөл байдалд хүргэж мэдэх нь. Ардчилсан намын ил үйлдэл ард түмнийг төлөөлж байгаа сөрөг хүчний гэхээсээ илүү Ардын намд ашигтай байх шийдвэр байна.   Өөрөөр хэлбэл, сөрөг хүчний дээрх байр суурь УИХ, Засгийн газрын үйл ажиллагааг бүрэн гацаах, эрх баригчид эрх мэдлийн төлөөх “зодоон”-оо улам удаашруулах боломжийг нь нээж өгч байна.

        Парламентын засаглалтай, ардчилсан улсад хууль тогтоох дээд байгууллагынхаа дархлааг хамгийн их хамгаалж, өмгөөлж, бэхжүүлэх ёстой сөрөг хүчин парламентынхаа дархлааг сулруулж, унагаах хэмжээний мэдэгдэл гаргасан гэдгийг улс төрийн хүрээнийхэн халаглан шүүмжилж байна.

        Үнэндээ Ардчилсан намын одоогийн удирдлагууд арай мэдрэмжгүй байгаагийн тод илрэл нь энэ байна.    Ард түмэн Ардын намаас уйдаж эхэлсэн гэдэг нийгмийн захиалгаа ч тэд ойлгож чадсангүй. Өнгөрсөн гурван сонгуульд Ардын нам дараалан ялалт байгуулахдаа Ардчилсан намыг амь таслахаас наагуур шороотой нь хутгаж байлаа. Гэтэл арай гэж парламентад 42 суудалтай болсон Ардчилсан намынхан Ардын намынханд “найр тавьсан” шийдвэрүүдийг бүлгээрээ гаргаж байгаагаас ялгаагүй харагдаж байна. Ийн Ардчилсан намын аргаа ядсан улс төр ард түмний хүлээлтэд хүрч чадсангүй дээ.