Ерөнхий сайд, УИХ-ын дарга хоёрын МАН-ын даргын төлөөх өрсөлдөөн хэн нь суудалтайгаа үлдэхийн төлөөх тэмцэл болж хувирлаа. Улс төрийн түүхэнд урьд нь огт ийм нөхцөл байдал үүсэж байсангүй.

     Өөрөөр хэлбэл, УИХ-ын гишүүд Засгийн газрыг огцруулахаар гарын үсэг цуглуулж,  Засгийн газрын гишүүд нь УИХ-ын даргаа эсэргүүцэж акц хийхээс гадна  Хууль зүй, дотоод хэргийн сайдаар УИХ-ын гишүүн Б.Энхбаярыг томилох Ерөнхий сайд зарласан ч намын гишүүнчлэлээс хасах шийдвэр гаргаад байна. Улмаар Ерөнхий сайдыг  огцруулах асуудлыг УИХ-аар хэлэлцүүлж эхэлсэнтэй холбоотой Хууль зүй, дотоод хэргийн сайдын томилгоог хойшлуулсан гэдгээ ч мэдэгдсэн. Ийн нэгэндээ чагтан холбоог тултал тавьж, ууртай мэдэгдлүүдийг ар араас нь хийсэн улс төрийн халуун өдрүүд УИХ-ын гишүүдийн бүлэг  фракцыг ус тосоор н ялгаж, хэн нь хэнийн хүн болохыг бүрэн баталж өглөө.

           Өнөөдөр Төрийн байгуулалтын байнгын хорооны хурлыг 8:30 цагт хуралдаж, Ерөнхий сайдыг огцруулах эсэх асуудлыг хэлэлцэнэ. Тус байнгын хорооны гишүүдийн бүтэц бүрэлдэхүүнийг харвал УИХ-ын дарга Д.Амарбаясгалангийн талын хүмүүс жин дардаг. Өөрөөр хэлбэл, УИХ-ын гишүүн Л.Оюун-Эрдэнэ, Н.Номтойбаяр, А.Ариунзаяа, Ц.Сандаг-Очир, О.Алтангэрэл,  Ж.Бат-Эрдэнэ, Б.Баярбаатар, Э.Болормаа, Ц.Даваасүрэн, Т.Доржханд, С.Зулпхар, Л.Мөнхбаатар, Ч.Номин, Л.Гантөмөр, Э.Одбаяр, О.Саранчулуун, Ц.Туваан, Г.Уянгахишиг, Ө.Шижир, Б.Батбаатар нарын кноп УИХ-ын даргын талд буюу Ерөнхийсайдыг огцруулахад үйлчилнэ.  Харин Ерөнхий сайд Г.Занданшатарын талаас ЗГХЭГ-ын дарга С.Бямбацогт, УИХ-ын О.Цогтгэрэл, Л.Энх-Амгалан, М.Бадамсүрэн, Ж.Баярмаа, А.Ганбаатар, Б.Хэрлэн Ц.Идэрбат, Д.Энхтуяа Ерөнхий сайд Г.Занданшатарыг өмөөрч, эсрэг кноп дарах магадлалтай гэсэн үг. Гэвч Ардчилсан намынгишүүд дундаас аль ч талд нь гарын үсэг зураагүй цөөн гишүүд бий. Түүний нэг нь УИХ-ын гишүүн Ч.Лодойсамбуу, УИХ-ын дэд дарга Б.Пүрэвдорж нар Төрийн байгуулалтын байнгын хороонд харъяалагдаж байна.

           Тэдний кноп хэрхэхээс шалтгаалж, Төрийн байгуулалтын байнгын хорооны шийдвэр гарна. Цаашлаад УИХ-ын чуулганы нэгдсэн хуралдаанд өнөөдөр Ерөнхий сайдын асуудал орно. Улс төрд өрнөж буй үйл явдлаас харахад УИХ-ын даргын талынхан парламентад жин дарж байгаа учраас Засгийн газар унах магадлал өндөртэй байгаа гэнэ. Харин Ерөнхий сайд Г.Занданшатар үүнд нь бухимдаж, “Ерөнхий сайдын суудлаас буухдаа тулбал, УИХ-ын даргыг албан тушаалаас нь чөлөөлж, бүрэн эрхээс нь түдгэлзүүлнэ” гэх санааг цухалзуулаад авсан гэх.

          Г.Занданшатарын Засгийн газрыг УИХ-ын гишүүдийн олонх дэмжиж, огцруулбал Ерөнхийлөгч дээр очоод бүдрэх магадлалтай. Өөрөөр хэлбэл, Ерөнхийлөгч энэ асуудалд оролцохгүй гэж мэдэгдсэн ч намын асуудал нь төрийн “зовлон” болж, цаашлаад шинэ үеийнхэн хүчтэй гарч ирж байгаагийн том сануулга болж байгаа гэсэн үг юм. Тиймээс Ерөнхийлөгч бүрэн эрхийнхээ хүрээнд хоориг тавьж, Г.Занданшатарын Засгийн газрыг авч үлдэх магадлал ч өндөр байна. Нэг ёсондоо Ерөнхийлөгчийн хувьд 2028 оны сонгуульд бэлдэж, Л.Оюун-Эрдэнийн Засгийн газар унасны дараагаар Г.Занданшатарыг Ерөнхий сайдаар томилж, дараачийн сонгуульд бэлдэж эхэлсэн гэдгийг улс төрийн хүрээнийхэн жиг жуг гэлцэх болсон.

       Тиймээс Г.Занданшатарын Засгийн газрыг авч үлдэх сонирхол ч бий. Нөгөө талаараа энэ асуудалд оролцохгүй гэснээрээ хуулиййн дагуу хууль тогтоох дээд байгууллага гүйцэтгэх засаглалд хариуцлага тооцож, огцруулах асуудлыг тэр чигээр нь зүтгүүлж ч болох юм.

      Хэрэв зээ ийм нөхцөлд хүрвэл УИХ-ын даргыг огцруулах Д.Энхтүвшин тэргүүтэй гишүүдийн гарын үсэг цуглуулж өргөн мэдүүлсэн шаардлагыг хэлэлцэж, дараагийн нүүдлээ хийнэ гэсэн үг. Цаашлаад МАН-ын даргын сунгаанаас өмнө нүүрсний хэрэгт холбогдуулан шалгаж, цагдан хорьсон МАН-ын нэр бүхий гишүүдийн цагдан хорих хугацааг сунгасан гэх мэдээлэл ч байна.

        Ингээд харвал Ерөнхий сайд Г.Занданшатар “явж”, дараа нь УИХ-ын дарга Д.Амарбаясгаланг “явуулах” улс төрийн зураглал зурагдаж эхэлсэн цуу яриа  үнэний ортой бололтой.