Эрх баригч намынхны эрх мэдлийн төлөөх зодоон улам өндрөө авч байна. Намын даргын төлөөх өрсөлдөөн УИХ-ын дарга Д.Амарбаясгалан, Ерөнхий сайд Г.Занданшатар нарын хооронд өрнөж буй мэт боловч, нам дотроо хоёр хуваагдчихсан идээ бээрээ шахалцаж, эр бяраа үзэцгээж эхэлсэн.  Хэний бүлэглэл хүчтэй вэ гэдгээ харуулахын тулд нам дотроо удаан хугацаанд дарж ирсэн хамаг хөзрөө дэлгэлцэж эхэллээ. УИХ-ын даргыг намынх нь гишүүд “Нүүрсчин” хэмээн зарлаж, эсрэг талд нь Засгийн газрыг огцруулах акц өрнөж байна.

          УИХ-ын даргын асуудлаар ноцтой баримт ярьсан гэх УИХ-ын гишүүн Б.Энхбаярыг Ерөнхий сайд Засгийн газартаа Хууль зүй, дотоод хэргийн сайдаар ажиллуулахаа мэдэгдсэн бол хариуд нь МАН-ын Хяналтын хорооныхон үүр шөнөөр хуралдаж, Б.Энхбаярыг намаас нь хөөлөө. Ингээд Хууль зүй, дотоод хэргийн сайдын томилгоо Их хурлаар орох болсон ч Их хурал чуулганаа хуралдуулахгүй бойкот хийж байх. Энэ мэтээр МАН-ынхны нэг нэгэндээ тавьсан тээг, акц төрийн зовлон болтлоо хямарч байна. Цаашлаад УИХ-ын гишүүн П.Сайнзориг тэргүүтэй гишүүд Засгийн газрыг огцруулах гарын үсэг цуглуулж эхэлснийг энэ долоо хоногт эрчимжүүлж, Их хурлаар хэлэлцүүлэх асуудал ч яригдаж эхэлсэн байна.

      Ингэж Ардын намынхан хөнжил дотроо хөлөө жийлцэж байгаа нь АН-д хамгийн ашигтай. Өнгөрсөн хугацаанд гурван удаагийн сонгуульд МАН ялалт байгуулахдаа АН-ыг мөн ч их хагаралдуулсандаа. Цагтаа парламентын хүчтэй сөрөг хүчин байсан Ардчилсан намынхныг тамга тэмдэгээ хоёр болгож, тайзан дээрээ лидерүүд нь хоорондоо зодолдох хэмжээнд хүртэл нь хагаралдуулж байлаа. Төв талбайд намынхаа үүсгэн байгуулагчдыг үсдэж тайзнаас чирэх хүртэл нь дотоод хагарлыг нь тэд өрдөж өгсөн.

         Хэдийгээр Ардчилсан намынхан хоорондоо үзэж тарсан мэт харагддаг ч начир дээрээ МАН-ынхны явуулга мэр сэр байсныг ч улс төрийн хүрээнийхэн жиг жуг гэлцэж байсныг санаж буй биз ээ. Одоо Ардчилсан намынхан Ардын намынхнаас хариугаа авах хамгийн боломжит цаг хугацаанд ирчихсэн байна. МАН-ынхан хэдий чинээ хоорондоо толхилцоно төдий чинээгээрээ АН-ынхан хүчээ зузаатгах боломжтой харагдаж байна.

         Тиймдээ ч МАН-ынхны энэ зодоон дундаас Ардчилсан намынхан хуучин лидерүүдээ гаргаж ирэхээр бэлдэж эхэлсэн сурагтай. Өөрөөр хэлбэл, Ардчилсан намын даргаар О.Цогтгэрэл сонгогдсноосоо хойш намдаа нэг ч томилгоо хийж амжилгүй МАН-ын зодоон эхэлсэн. Тиймээс улс төрийн галыг намжихыг харзнаж  байгаа тэд нам шат шатны удирдлагуудаа солихоор бэлтгэл ажил  нь хангагдсан гэх яриа байна.

МАН-ЫН “ЗОДООН” ДУНДААС АН С.БАЯРЦОГТЫГ УЛС ТӨРД ГАРГАЖ ИРЭХ БЭЛТГЭЛЭЭ БАЗААСАН УУ

         Тухайлбал, Ардчилсан намын Ерөнхий нарийн бичгээр Сангийн сайд асан С.Баярцогтыг томилж, цаашлаад Ерөнхийлөгчийн сонгуульд сойхоор бэлдэж эхэлсэн гэх мэдээлэл бий. Тиймээс Ардын намын энэ “зодоон”-ныг улстөржүүлж, чуулганы хуралдааныг орхиж гарах хүртлээ МАН-ынхныг туйлдуулж эхэлсэн.

        МАН-ын “зодоон”-ыг Ардчилсан намынхан өөрсддөө ашигтайгаар эргүүлэх хамгийн боломжит цаг үе дээрээ ирчихсэн байна. Хамтарсан Засгийн газраас хорсолтойгоор хөөгдсөн тэд МАН-ын их хагарлыг дөрөөлөх тохиромжтой цаг хугацаандаа ирээд буй. Тэр тусмаа Ардчилсан намын одоогийн дарга О.Цогтгэрэл хар пи-араар өрсөлдөгчдөө намнахдаа гаршсан нэгэн гэхэд хэлдсэхээргүй.

     Сануулахад, Ардчилсан намын намын даргын сунгаанд өрсөлдсөн намынхаа гишүүдийг мөн ч их харлуулсан даа. УИХ-ын гишүүн Ч.Лодойсамбуу намын даргад өрсөлдөхөө мэдэгдмэгц түүнийг цахим орчинд харлуулах ажил мөн ч удаан өрнөсөн. Түүний дараа УИХ-ын гишүүн Л.Мөнхбаясгалантай холбоотой мэдээллүүд цахим орчинд дуулиан тарьж, түүнийг намнах ажлууд ч зохион байгуулалттай өрнөсөн. Сүүлд  УИХ-ын гишүүн Ж.Баярмааг намнах улс төрийн хар пи-ар удаан хугацаанд өрнөснийг ч олон нийт санаж буй биз.

         Ерөөс эндээ ажиглахад АН-ын шинэ дарга О.Цогтгэрэл хэзээнээс өрсөлдөгчдөө харлуулахдаа гарамгай гэдэг нь нотлогдож байна. Тиймдээ ч одоогийн МАН-ын “зодоон”-ыг намдаа хамгийн ашигтайгаар эргүүлж, хүчээ зузаатгах ажилдаа орсон сурагтай.

МАН-ынхан нэгнээ нүүрсчин нөгөөгөө хулгайч гэж цоллох тусам түүнийг нь өрдөж өгөөд өөрсдийгөө хамгаалан зогсох боломж Ардчилсан намынханд бүрэн гарчихсан байна.

Тоглоомын дүрмийг Ардчилсан намынхан анхааралтай ажиглаж, ашиглаж чадвал Ардын намынхнаас хариугаа авах цаг одоо л ирчихсэн байна даа. Гэвч улс төрийн хүрээллийнхний дунд яригддагаар МАН АН аль аль нь нэг нам мэтээр бүлэглэл үүсчихсэн гэх яриа олон жил явж ирсэн. Одоо л тэднийг ус тосоор нь ялгах цаг хаяанд ирчихсэн байна даа.