ЗУРААЧ Ц.ОРГИЛ: Анхны үзэсгэлэнгээ дэлгэнгээ тархиа амраачихаад, дараагийн санааныхаа эрэлд гарна даа

2025-09-18, 1278

Монгол хүүхдүүд, баатрууд, өв соёл шингэсэн байх юм, түүний үзэсгэлэнд. Гэхдээ энэ бүхнийг инээд хөгжөөнтэй шог зургаар үзүүлсэн нь сонирхолтой санагдана. Ц.Оргил зураачийг бид ихэвчлэн даварч, томорсон дарга нар, ихэмсэг ямбат эрх мэдэлтнүүдийн байр байдлыг егөөдсөн шог зураач гэж мэддэг бол түүнд оюун санаа, сэтгэл зүрхээ нэрсэн, бодож санадагаа хүргэхийг зорьсон цөөнгүй сайхан бүтээл бийг өнгөрсөн зургаан өдөр дэлгэсэн үзэсгэлэнгээс нь мэдлээ, үзлээ. Мэдээж өнөөх том гүзээт тонтгор дарга нар ч дэлгэгджээ.

Бид түүний үзэсгэлэнгийн сүүлийн өдөр амжиж очин, зураачтай ярилцахаас гадна нүд, сэтгэл баясгасан сайхан бүтээлүүдээр нь саатсанаа уншигч тантай хуваалцъя.

Тэрбээр "10 том зураг, долоон шог зурагтайгаар анхны үзэсгэлэнгээ нээлээ. Эдгээр бүтээлээ би гурван жилийн хугацаанд бэлтгэж гаргасан. Монгол хүн бүрийн багаасаа сонсож өссөн үүх түүхтэй холбоотой сэдвүүдээс өөрт хамгийн ойрхноос нь сонгон өөрийн илэрхийлэл, төсөөллөөр дамжуулан дүрслэн буулгасан. Хамгийн гол нь зураач гэхээс илүүтэй уран бүтээлч гэдгээ харуулахыг зорьсон" гэнэ.

Бүтээлүүдээ цөмийг нь тосон будгаар зурсан гэнэ. Үнэхээр ч хана дагуулан харахад хэн ч хэдэн насны ч хүн үзсэн энгийн, ойлгомжтой, гэхдээ нарийн ажиллагаа, бодол шаардсан бүтээлүүд үзэсгэлэнд ирсэн хэн бүхэнд аз жаргал түгээж байгаа нь мэдрэгдсэн. Ц.Оргил зураачийн авьяас билиг аав, ээжээс нь үүдэлтэй байна. Зураач гэр бүлд төрж, өссөн болохоор багаасаа л зурах дуртай, харандаа, будгийн үнэнч "найз" байж. Тиймдээ ч хүсэл мөрөөдөл нь түүнийг анхны үзэсгэлэнгээ дэлгэх энэ аз жаргалтай өдрүүдэд хөтлөн авчирч чаджээ.

Энэ тухай "Хүмүүс үзэсгэлэнг маань зорьж ирж үзээд баяр хүргэж байна гэхээр хамгийн сайхан байна. Амьдралдаа анх удаа цэцэг авч үзлээ. Аз жаргалтай өдрүүд өнгөрч байна. Хамгийн гол нь миний хувьд зорилгынхоо ард гарч, тархи, сэтгэл амарч байна" гэж байв. Түүнээс мөн шог зургийн мөн чанарын тухай сонсоход "Шог зурагийн гол зүйл нь ёжтой байх юм болов уу. Мөн тухайн зургийг хүмүүс хэрхэн хүлээж авч буй хандлагаас хамаарна. Доромжлол гэж хүлээж авч болно, хөгжилтэй зураг байна гэж ойлгож ч болно. Хүн бүр өөр өөрийнхөөрөө л хүлээж авдаг. Магадгүй эгдүүцэж байгаа бол тухайн хүнэнэ төрлийн зураг нэг их үздэггүй, ойлголтгүй байх магадтай" гэсэн.

Харин өөрийн тухайд томоохон тосон будгийн зургаа зурах явцдаа уйдсан үедээ сошиал орчинд хүмүүсийн ид ярьж, шуугиж байгаа сэдвээр шог зураг зурсаар байгаад сонирхолтой болсон гэнэ. Тэр нь өнөө бидний сайн мэдэх шог зургууд.

Ийм л нэгэн залуу уран бүтээлч анхныхаа үзэсгэлэнг дэлгэчихээд амсхийж сууна. Мэдээж дахин өөр бүтээл хийх, үзэсгэлэн гаргах зорилго бий гэдгээ ч хуваалцсан. Гол нь түүнээс урьд тархиа амраачихаад, өөр сонин содон шинэ санаа, шинэлэг бүхний эрэлд гарна гэсэн юм. Уран бүтээлийн өндөр амжилт хүсэж, удахгүй хоёр дахь үзэсгэлэнгээр нь дахин уулзья.

Тэр мөн манай сайтад өмнө нь өгч байсан ярилцлагадаа "Зураг зурахад дүрэм байхгүй шүү дээ. Хүссэн, дуртай бүхнээ зурж болно. Бүр хүн үзэхийн аргагүй зүйл зурж ч болно. Зурмаар байвал зурах эрх хэн бүхэнд бий. Гагцхүү юу зурах уу гэдэг тухайн хүний харах өнцөг, хүмүүжил, үзэл бодлоос ихээхэн хамаарна. Харин шог зураач үнэн байх ёстой. Амьдрал дээр байдаггүй зүйлийг инээдтэй юм шиг зурвал худлаа болно. Тухайлбал, нэгэн эрх мэдэлтэй том дарга мөнгө “идсэн” байхад “Манай дарга сайн” гэж зурж болохгүй. Тэгвэл шог зургийн үнэ цэн алдагдаж, худал болно" хэмээн ярьж байсан. Ярилцлагыг бүрэн эхээр нь дээрх хэсэг дээр дарж уншаарай.

ЗУРААЧ Ц.ОРГИЛ: Анхны үзэсгэлэнгээ дэлгэнгээ тархиа амраачихаад, дараагийн санааныхаа эрэлд гарна даа

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид