Монголын анхны "Балдорж" шагналт редакц, МСНЭ-ийн 2021 оны "Монголын шилдэг мэдээллийн сайт", “Web awards 2023” наадмын оны онцлох редакц Эргэлт.мн мэдээллийн сайт Эргэлт сэтгүүлийнхээ гурав дахь дугаарыг нийтлэл, ярилцлага, хөрөг, тэмдэглэл, сурвалжилга, эрэн сурвалжлах сурвалжилга, дурсамж, тэмдэглэл, орчуулга тэргүүтэй сэтгүүл зүйн бүх төрлийг багтааж 333 хуудастайгаар бэлтгэлээ.

      “Эргэлт” сэтгүүлээс онцлох таван алдартны хөрөг, тэдний гэр бүлийн ярилцлагыг танилцуулж байна.

НЭРТ СОЁН ГЭГЭЭРҮҮЛЭГЧ ЛОДОНГИЙН ТҮДЭВИЙН ХҮЙ ЦӨГЛӨСӨН НУТГААС...

  Өвөр замын өтөг гэж өндөр өндөр уулсаар хүрээлүүлсэн, салхи, шувуу, бугын урамдаанаас өөр аниргүй намуухнаас намуухан нутаг бий. Дүнсгэр уулсынх нь баруун энгэрт нурж, эвдрээд сүйд болчихоогүй ч олон жилийн түүхийн гэрч болсон энэ намхан чулуун хороо бол агуу их соён гэгээрүүлэгч Лодонгийн Түдэвийн онож, төрсөн бууц юм. Алсын мананд бууж, бороо ганц нэг дусагнасан намраар Улаанбаатар хотоос 1050-аад километрийн зайд орших түүний хүй цөглөсөн нутгийн бид зорин очсон билээ. Энэхүү тэмдэглэлийг “Эргэлт” сэтгүүлээс уншаарай.

МАНДАХ НАР ШИГ МЯГМАРНАРАН

           Ардын жүжигчин Г.Мягмарнаран гуайг бид "Тунгалаг тамир" киноны цамбын дүрээс эхлэн мэднэ. Тайз, дэлгэцийн олон бүтээлд дотно дулаан дүр бүтээсэн. Хамгийн сүүлд "Мөрөөдлийн театр"-ын "Шөнө буусан аадар" жүжгийн Халзангийн дүрд тоглож, үзэгчидтэйгээ тайзнаас уулзсан. Түүнийг бид энэ удаагийн сэтгүүлдээ онцолж "Мандах нар шиг Мягмарнаран" гэх хөрөг бичвэрийг дэлгэсэн юм.

ХӨГЖМИЙН ЗОХИЛЧ Ц.ЧИНЗОРИГИЙН ОХИН СУВДЦЭЦЭГ: УУЛЗАЖ ҮЗЭЭГҮЙ ААВЫНХАА “НАМРЫН ДУРСАМЖ”, “ДУУНЫ ХОРВОО” ДУУНД ХАЧИН ИХ ХАЙРТАЙ

-ХУВЬ ТАВИЛАНГИЙН ЭРХЭЭР ААВ БИДНИЙГ, БИД ААВЫГАА ХАРЖ ЧАДААГҮЙ-

            Төрийн соёрхолт хөгжмийн зохиолч Ц.Чинзориг ихэр охидоо хорвоод мэндэлхээс 14-хөн хоногийн өмнө бурхан болж, тэднийгээ харж амжаагүй гунигт түүхтэй. Гэхдээ түүний үргэлжлэл болсон охид өдгөө аавынхаа үлдээсэн алдар гавьяаг үргэлжлүүлсэн үзэгч сонсогчдын сэтгэлийг долгисуулсан  чадварлаг хөгжимчид болж, үзэгчдийн алга ташилтан дунд амжилт, бүтээл дүүрэн хөдөлмөрлөсөөр үеийнхнээсээ эн тэнцүү хоёул онцгойрч явна. Тэд аавыгаа хэрхэн дурсаж, үйл хэргийг нь яаж үргэлжүүлэхээр зорьж яваа талаар нь Өвөрмонголд ажиллаж амьдачрч байгаа охин Ч.Сувдцэцэгтэй ярилцлаа.

ДАНЗАНГИЙН НЯМСҮРЭН ГУАЙН ХӨШӨӨГ УРЛАСАН ЗУРААЧ, УРАН БАРИМАЛЧ Ж.ДҮҮРЭНТӨГСИЙН ДҮҮ Ж.БАТБИЛЭГ: АХ МИНЬ МОНГОЛЫН СОР БОЛСОН ХӨШӨӨ, ДУРСГАЛУУДЫГ ЧИН СЭТГЭЛ, АВЬЯАС, УР, ХӨДӨЛМӨРӨӨРӨӨ ШИНГЭЭН БҮТЭЭСЭН ДЭЭ

         Ж.Дүүрэнтөгс гэж гайхалтай авьяастай уран барималч, зураач бидний дунд даруухнаар аж төрж байлаа. Нэрт зураач, барималчийн эзгүйд урланг нь амилууж яваа хүн бол түүний Ж.Батбилэг юм. Бид түүнтэй ахынх нь уран бүтээл, амьдралын замналын талаар хөөрөлдсөнөө энэ удаагийн “Эргэлт” сэтгүүлд багталаа.

ЗУРААЧ П.МЭЛСИЙН ЭХНЭР Б.ОЮУНЧИМЭГ: ХАНЬ МИНЬ БУЙДХАН УРЛАНДАА ТАМХИ БААГИУЛЖ, ЧИХЭРТЭЙ БАЙХУУ УУНГАА САЙХАН БҮТЭЭЛ ОЛНЫГ ТУУРВИСАН ДАА

          Дорнын уудам нутаг их түүхийг хадгалан буй гэдгийг нэрт зураач П.Мэлсийн уран зураач П.Мэлсийн уран зургийн номыг үзэн байхдаа бага ч болов мэдэрлээ. Цэлийтэл харагдах тэнүүн, дэлгэр нутгийн өвөрмөц төрх, дахин давтагдашгүй гоо зүйг тэр уран бүтээлдээ гүн гүнзгий тусгажээ.  Тиймдээ бид энэ удаагийн сэтгүүлдээ түүний эхнэр Б.Оюунчимэгийг урьж, хөөрөлдсөнөө уншигч таны өмнө дэлгэж байна.