Богд банк хөрөнгийнхөө 20 хувийг олон нийтэд нээлттэй санал болгоно

Богд банкнаас Монголын хөрөнгийн бирж дээр шинээр хувьцаа гаргаж, олон нийтээс хөрөнгө оруулалт татах шийдвэр гаргалаа. Ингэснээр тус банк нийт хөрөнгийнхөө 20 хувийг олон нийтэд нээлттэй санал болгож, компанийнхаа хэлбэрийг хувьцаат болгон, олон нийтийн өмчлөл бүхий анхны банк болох юм. 

Богд банкны хувьцааг хөрөнгийн зах зээлд олон нийтэд танилцуулан арилжаалах үндсэн андеррайтераар Ард санхүүгийн нэгдлийн охин компани болох “Ард секюритиз” үнэт цаасны компани ажиллах юм байна.

Богд банкны гүйцэтгэх захирал Г.Саруул “Манай банк олон нийтэд хувьцаагаа нээлттэй санал болгосноор олон жил хүлээж, ярьсан арилжааны банкны өмчлөгчөөр Монголын ард түмэн болох үйл явцын салхийг хагалж байгаадаа баяртай байна. Бид илүү нээлттэй, ил тод хувьцаат компанийн хэлбэрт шилжсэнээр компанийн засаглал төгөлдөршиж, олон түмний зүгээс банкны үйл ажиллагаанд илүү их итгэл хүлээлгэж, орчин үеийн шилдэг банк болон хөгжихөд чухал ач холбогдолтой алхам болно гэж харж байгаа” гэв.

Тус банкны хувьцааг хөрөнгийн зах зээлд олон нийтэд танилцуулан арилжаалах үндсэн андеррайтераар Ард санхүүгийн нэгдлийн охин компани болох “Ард секюритиз” үнэт цаасны компани ажиллах юм. Тус компанийн ТУЗ-ийн гүйцэтгэх дарга Э.Амарбаясгалан “Банкны тухай хуулийг шинэчлэн баталсан энэ үед Богд банк олон нийтийн банк болох ажил үйлсэд бид хамтрах болсондоо таатай байна. Банкууд олон нийтэд нээлттэй болсноор хөрөнгийн зах зээл үсрэнгүй хөгжилд хүрч, банкны засаглалын тогтолцоо сайжран, ард түмний хүртэх өгөөж нэмэгдэх боломж бий болно. Цаашид арилжааны банкууд хөрөнгийн зах зээлээс хөрөнгө босгож, үйл ажиллагаа тэлнэ гэдэгт итгэлтэй байна” хэмээн ярилаа.

Банкны тухай хуульд нэмэлт, өөрчлөлт оруулах тухай хуулийн төслийг өнгөрсөн нэгдүгээр сарын 28-нд УИХ-ын намрын ээлжит чуулганаар хэлэлцэн баталсан. Уг хуульд Монгол Улсад үйл ажиллагаа явуулж буй арилжааны банкууд тодорхой хугацааны дотор олон нийтэд хувьцаагаа арилжаалдаг, өмчийнхөө төвлөрлийг сааруулсан байх тухай заалт оруулсан билээ.