Хичээлийн шинэ жил эхэлж хүүхэд багачуудын инээдээр бялхсан өдрүүд үргэжилж байна. Цахим ертөнцөөр олны хайрыг татаад байгаа “2024 оны бяцхан мисс”-ээр шалгарсан И.Гэгээтэй ярилцлаа.

-Сайн уу. Манай уншигчдад өөрийгөө танилцуулаач?

-Сайн байна уу. Намайг И.Гэгээ гэдэг зургаан настай. Би 2024 онд бяцхан мисс болж байсан. Энэ жил нэгдүгээр ангид орсон. Манай ээжийг Ц.Ивээл гэдэг.

-Хичээлийн эхний өдөр ямар байсан бэ?

-Өчигдөр ангиа андуураад өөр ангид хичээл тарж дуусах хүртэл суучихсан (инээв). Бас багшдаа өгөх гэж авчирсан цэцгээ өөр багшид өгчихсөн. Өнөөдөр харин ангиа зөв тогтоогоод авсан.

-Шинэ цүнх, дэвтрээ авахад ямар санагдсан бэ?

-Маш гоё байсан. Цүнхээ үүрээд сургууль руугаа явахад миний нуруу жаахан өвдсөн.

-Цэцэрлэгийн найзуудтайгаа хамт сурч байгаа юу?

-Тийм ээ, цэцэрлэгийн хэдэн найзуудтайгаа нэг сургуульд орсон. Хамтдаа байх үнэхээр гоё.

-Чөлөөт цагаараа юу хийх дуртай вэ?

-Дуулах, бүжиглэх, зураг зурах дуртай.

-Тэмцээнд оролцож байхдаа хамгийн их баярласан мөч чинь хэзээ байсан бэ?

-Миний нэрийг зарлаж, титэм зүүлгэхэд хамгийн их баярласан. Ээж, эмээ, найзууд маань бүгд баяр хүргэсэн.

-Ирээдүйд ямар хүн болохыг мөрөөддөг вэ?

-Би загвар өмсөгч болохыг хүсдэг. Өөрийнхөө хувцасны загварыг хийж өмсмөөр байгаа.  Том тайзан дээр алхах мөрөөдөлтэй.

-Чамайг хамгийн их дэмждэг хүн хэн бэ?

-Ээж минь. Ээж надад “Чи чадна, мөрөөдлөө биелүүлнэ” гэж үргэлж хэлдэг.