“Үндэсний үсэглэлийн аварга” нэвтрүүлгийн хүчтэй өрсөлдөгчдийн нэг Б.Аминзаяатай ярилцлаа.

-“Үндэсний үсэглэлийн аварга” нэвтрүүлэгт яагаад орох болсон бэ. Нэвтрүүлэгт оролцоход ямар санагдсан бэ?

      -“Үндэсний үсэглэлийн аварга” нэвтрүүлгийн өмнөх улирлын дугааруудыг үздэг байсан. Миний дуртай нэвтрүүлгийн нэг. Тэгээд л энэ жил оролцохоор үеэл эгчтэйгээ хамт бүртгүүлсэн юм. Удаа ч үгүй  “Боловсрол” телевизээс оролцогчоор тэнцсэн гэх хариу ирснээр оролцсон. Гэрийнхэн маань ч баяртай хүлээж авч, намайг дэмжсэн. Анх тэмцээнд ороход 52 хүүхэд цугласан байсныг хараад олон найзтай болох нь дээ гэж бодсон.

-Нэвтрүүлгийн үеэр хэцүү санагдсан ямар сорилт байсан бэ?

          -Анх камерын өмнө гарч, үг үсэглэх үед тулгамдаж, сандардаг байсан. Аажимдаа дассан. “Одолложээ”, ”гадуурхасхийгээд” гэсэн үгийг үсэглэх хэцүү байсан. Багийн үсэглэл дээр сандарч,нэг үг алдсан. Хурдан үсэглэл дээр богино хугацаанд олон үг үсэглэх жаахан хэцүү байсан.

-Өдөрт хэдэн цаг бэлддэг вэ. Үг үсэглэхдээ ямар арга ашигладаг вэ?

          -Би өдөрт хоёр цагийг үг үсэглэхэд зарцуулдаг. Эмээ үг хэлж өгнө. Алдсан үгээ журамласан толь бичгээс харж дэвтэртээ бичээд, нүдэлж тогтоох маягаар үгээ бэлддэг байсан.

-Нэвтрүүлгийн үеийн хөгжилтэй дурсамжаасаа бидэнтэй хуваалцаж болох уу?

       -Шилдэг 26-д шалгарахад их гоё байсан. Дараа нь 11 үг амжилттай үсэглэж, долоо дахь дугаарын ялагч болсондоо их баярласан. Мөн  багийн үсэглэл дээр манай баг хоёр удаа түрүүлж, хоёр дугаарыг алгассан. Багаараа тэмцээнд оролцох хамгийн гоё, хөгжилтэй, бахархалтай байдаг.

-Чөлөөт цагаараа юу хийдэг вэ?

         -Ном унших, гар бөмбөг тоглох, хөгжим тоглох, дуу дуулах гээд чөлөөт цагаараа олон зүйл хийх дуртай. Өнгөрсөн наймдугаар сард хоёр найзтайгаа хамт Япон Улсын “Teeball” спортын тэмцээний нээлт, хаалт дээр дуулсан.    

-Аав, ээж нь юу хийдэг вэ. Чамд юу гэж захиж, сургадаг вэ?

        -Миний аавыг  А.Баттөгс, ээжийг Ч.Марал-Од гэдэг. Аав, ээж хоёр минь хөгжимчин. Одоогоор аав гадаадад ажиллаж байгаа. Гэрийнхэн минь намайг жаахан байхаас олон дугуйлан, тэмцээнд хамруулж дэмждэг байсан. Үргэлж намайг дэмждэг гэрийнхэндээ баярлалаа. Хайртай шүү.

-Хэрвээ чи нэг онцгой чадвартай болох боломжтой бол юу хүсэх байсан бэ?

           -Монгол хэл дээрээ ямар ч үгийг алдалгүй бичиж чаддаг онцгой чадвартай болох байсан. Гэхдээ алдаагүй бичихийн төлөө хичээж байгаа.

-“Үндэсний үсэглэлийн аварга” нэвтрүүлэгт орох гэж зорьж буй хүүхдүүдэд зөвлөх зүйл байгаа юу?

          -Алдаж бичсэн үгээ Журамласан толь бичгээс харж нягталж байгаарай. Хэрвээ тогтоогдохгүй бол бичиж тэмдэглээд, цээжлээрэй гэж хэлмээр байна. Бүгдээрээ эх хэлээрээ алдаагүй сайхан бичиж, ярьдаг болбол гоё.

-Ярилцсанд баярлалаа.