“Намайг ачсан дурлал” киноны сэргэлэн, хөөрхөн Маралаагийн дүрийг бүтээсэн Т.Гэгээтэй ярилцлаа. Монголын гэрэлт ирээдүй болсон тэрбээр өмнө нь “Хоёр шөнө”, “Болзооны сургууль” кинонд тоглож байжээ.

-Чамд энэ өдрийн мэнд хүргэе. “Намайг ачсан дурлал” киноны гол дүрд тоглох ямар байсан бэ?

                -Намайг “Orange entertaiment”, “TAG entertainment”-ийн ах эгч нар маань 500 гаруй хүүхдээс сонгож авсан гэсэн. Анх удаа киноны гол дүрд тоглох үнэхээр сонирхолтой санагдсан. Кино багийнхандаа бүгдэд нь баярлалаа.

-Киноны гол дүрд тоглоход хэцүү санагдсан зүйл бий юү?

                -Би гол дүр учраас олон зураг авалтад оролцсон. Байнга зураг авалтад орох жаахан ядармаар байсан ч гоё юм билээ. Дүрийнхээ үгийг зураг авалт бүрийнхээ өмнө сайн цээжилж, алдахгүй байхыг хичээсэн. Кино багийн ах, эгч нар минь надад их тусалж, намайг халамжилсан. Бүгд надад урам өгч, хайрласан.

-“Намайг ачсан дурлал” кинонд тоглосон жүжигчин ах, эгч нараасаа хэнтэй нь уулзахдаа хамгийн их догдолсон бэ?

                -Бүх жүжигчидтэй уулзахдаа баярлаж, тэднээс олон зүйл сурсан ч Б.Үжин эгч, С.Баянмөнх ах хоёртой уулзахдаа бүүр их догдолж хөөрсөн. Би Gangbay хамтлагт дуртай учраас С.Баянмөнх ахыг хараад их баярласан. Намайг хараад инээгээд байсан.

-Кинод тоглохдоо олон сонирхолтой зураг авалт хийлгэсэн байх. Тэр дундаас хамгийн сонирхолтой нь аль байсан бэ?

                -Надад шүүгээнээс унадаг хэсгийн зураг авалт хийх хамгийн хэцүү байсан. Би бараг уйлах шахсан. Манай найруулагч намайг их дэмжиж, зөвлөж, урам өгсөн. Намайг байхгүй өдөр жаахан уйтгартай өнгөрдөг гэсэн. Тэгээд “Арчаагүй шд” гэж хэлдэг хэсэг надад хамгийн инээдтэй. Би жаахан хүүхэд учраас том хүнийг загнаж болохгүй шүү дээ. Киноныхоо зураг авалтаар анх удаа том хүн загнах жаахан сонирхолтой, эвгүй байсан.

-Хамгийн анх ямар кинонд тоглож байсан юм бэ, тэр үед ямар санагдаж байв?

                -Жүжгийн дугуйланд суралцаж байхад “Хоёр шөнө” кинонд тоглох санал ирж, анх удаа кинонд тоглож байсан. Дараа нь Номингийн рекламд тоглож байхдаа Favway нэгдлийн Ж.Номингэрэл эгчтэй танилцаж, дугаараа өгсөн юм. Тэгсэн намайг яг салхин цэцэгтээд эдгэрсний дараа Ж.Номингэрэл эгч залгаад “Болзооны сургууль” кинонд Ү.Ундрал эгчийн бага насны дүрд тоглох санал тавьсан. Өмнө нь ингэж хоёр удаа туслах дүрд тоглосон.

-Кинонд тоглох санал ирэхэд ямар санагддаг юм байна?

                -“Хоёр шөнө” кинонд тоглоход би зургаан настай байсан юм. Киноны санал ирэх ёстой догдолмоор юм байна лээ. Миний аавын дүрд тоглосон Р.Отгонбаяр ахыг өмнө нь “Нийслэл хүүхэн” киноноос үзэж байсан учраас хараад их баярласан. Миний үзэх дуртай жүжигчин л дээ. Дараа нь, Favway-ийн “Болзооны сургууль” кинонд тоглох үнэхээр сонирхолтой байсан. Ж.Номингэрэл эгч, Ү.Ундрал эгч, Jwoo ах намайг зөндөө халамжилсан. Тэр хоёр эгч шигээ мундаг жүжигчин болохыг хүссэн.

-Ангийнхан, найзууд нь миний тоглосон киног үзсэн байна уу. Юу гэж хэлж байна?

                -Манай найзууд, ангийнхан бүгд үзсэн байна лээ. “Чи “Болзооны сургууль”-д тоглосон юм уу, “Хоёр шөнө” кинонд тоглох ямар байсан бэ” гээд бүгд асууж, сонирхсон. Жаахан ичмээр ч гоё санагдсан.

-Чамд жүжигчин байхын юу нь сонирхолтой санагдсан юм бэ?

                -Би багаасаа найзуудтайгаа жүжиглэж тоглодог байсан. Кинонд тоглож байгаа ах, эгч нар тэдний жүжиглэж байгаа нь надад бүгд сонирхолтой, гоё санагддаг. Миний сонирхлыг ээж минь дэмжиж драмын дугуйланд сургасан. Дугуйланд явж эхлээд маргааш нь кинонд тоглох санал авсан. Би ирээдүйд жүжигчин, дуучин, бүжигчин болно. Бусдын хайрыг татсан уран бүтээлч болно.

-Өөрийнхөө тоглосон киног үзэх ямар байдаг вэ?

                -Эхэндээ үнэхээр ичиж байсан ч дараа нь тайвшраад ичихгүйгээр үздэг болсон. Миний дараагийн киноны санал ирчихсэн. Би үнэхээр баяртай байгаа.

- TAG” энтертайнментын уран бүтээлч хоёр ахтайгаа хамтарч ажиллах ямар байв?

                -М.Цэндбаяр, Б.Билгүүнжаргал ах биднийг зөндөө инээлгэж, хөгжөөсөн. Зураг авалтыг хөгжилтэй болгож, олон хүнд аз жаргал мэдрүүлсэн байх. Хоёр ахтайгаа ажиллах үнэхээр гоё байсан.

-Гэр бүлийнхэндээ хандаж үг хэлэх үү?

                -Гэрийнхэн минь миний тоглосон киног үзээд аз жаргалтай байгааг харах хамгийн сайхан. Намайг үргэлж дэмждэг гэрийнхэндээ баярлалаа. Тэр дундаа намайг өсгөж, хамгийн сайн хүмүүжүүлж, дэмждэг ээждээ баярлалаа, тандаа хязгааргүй их хайртай шүү.