Т.ЭЛБЭГЖАРГАЛ: Түргэн цээж бодолтын олон улсын аварга болоход гэрийнхэн маань хамгийн их баярласан

Х. АНАРГҮЛ:
Гэрэлт ирээдүй- Шинэ танил

2025-08-08, 50

АНУ-ын “United Abacus Arithmetic Association” сампингийн холбооноос зохион байгуулсан “2025 Global Cup” цээж бодолтын олон улсын тэмцээний аварга, долоон настай хүү Т.Элбэгжаргалыг уншигч тантай уулзуулж байгаадаа баяртай байна. Тэрбээр Малайз Улсад өнгөрсөн онд болсон “World City Cup” олон улсын цээж бодолтын тэмцээнд амжилттай оролцож, алтан цомын эзэн болсон юм.

-Түргэн цээж бодолтын олон улсын аварга болсонд нь баяр хүргэе. Тоогоо бодож дуусаад, аварга болсноо мэдэхэд ямар сэтгэгдэл төрж байсан бэ?

-Баярлалаа, цээж бодолтын аварга болсноо мэдээд их баярласан. Би Нийслэлийн ерөнхий боловсролын 130 дугаар сургуулийн хоёрдугаар ангид сурдаг. Олон Улсын тэмцээнд оролцож шагнал авах их гоё юм билээ. Шагналаа авчхаад ээж рүүгээ залгаж цом авснаа хэлсэн. Ээж ч баярлаж “Миний хүү, мундаг шүү” гэж урамшуулсан. Дараа нь Монголд ирэхэд гэрийнхэн маань хэдийнээ онгоцны буудал дээр ирчихсэн, алга ташаад угтсан. Гэрийнхнээ баярлахыг харах хамгийн сайхан байсан. Бас бусад хүн “Энэ нөгөө Америкийн тэмцээнээс цом авсан хүүхэд байна шүү дээ” гэхийг сонсоход сайхан байдаг. Надад тусалж, дэмжсэн хүмүүс болон Оюуны хөгжлийг дэмжих академийн багш нартаа баярлалаа.

-Сампингаар хэзээнээс хичээллэж эхэлсэн бэ?

-Дөрвөн настайдаа сампингаар тоо бодож сурсан. Би Баянгол дүүргийн 114 дүгээр цэцэрлэгт явдаг байхдаа сампингаар хичээллэж эхэлсэн. Тэгээд Оюуны хөгжлийг дэмжих академийн сургалтад гурван жил яваад, олон улсын түргэн цээж бодолтын тэмцээнд явж эхэлсэн.

-Цээжээр бодоход хэцүү зүйл нь юу байдаг вэ. Өдрийн хэдэн цагийн бэлтгэл хийдэг вэ?

-Би гурван оронтой тоог, хоёр оронтой тоогоор үржих, хуваах, нэмэх, хасах үйлдлээр боддог. Хуваах үйлдэл жаахан хэцүү. Сампинтай нэг цаг, ой тогтоолтын нэг цаг гээд өдөрт хоёр цагийн бэлтгэл хийдэг.

-Олон улсын тэмцээнд явахад гоё зүйл нь юу вэ. Суралцах зүйл ч олон байдаг болов уу?

-Багш нар болон олон хүүхэдтэй хамт баг болон явдаг болохоор дурсамжтай, хөгжилтэй гоё байдаг. Гэхдээ гэрийнхэн болон ээжийгээ жаахан санасан. Олон улсын тэмцээнд оролцохын мөн нэг сайхан зүйл нь орон орны найзтай болдог нь гоё.

-Тэмцээний үеэр анхаарал төвлөрөлт, сандралгүй байдал их чухал байдаг байх. Багш нар нь ч зөвлөдөг байх, тийм үү?

-Тийм ээ. Тэмцээн эхлээгүй байхад хүүхдүүдтэй юм ярьж, хөгжилдөж болно. Харин тэмцээн эхлэхэд анхааралтай байж, сандрахгүй, бодлогодоо төвлөрөх ёстой.

-Чөлөөт цагаараа юу хийдэг вэ?

-Би чөлөөт цагаараа ахтайгаа хамт хөл бөмбөг, сагс тоглох дуртай. Бас Bruno Mars-ийн дууг дуулж, G-Dragon-ний бүжгийн бичлэгийг үздэг.

-Ямар мэргэжилтэй хүн болно гэж боддог вэ?

-Жүжигчин болохыг хүсдэг. Манай ахыг Т.Элбэгбаяр гэдэг. Зургадугаар ангид сурдаг. “В1 давхар”, “HELLO BOSS”, “Гарц” зэрэг кинонд тоглосон. Ахынхаа тоглосон кинонуудыг үзэх дуртай. Ах шигээ кинонд тоглохыг мөрөөддөг.

-Бидний урилгыг хүлээн авсан дүүдээ баярлалаа, амжилт хүсье.

- Баярлалаа.

Т.ЭЛБЭГЖАРГАЛ: Түргэн цээж бодолтын олон улсын аварга болоход гэрийнхэн маань хамгийн их баярласан

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.