Бартаат замын уралдаан бол маш их тэсвэр, тэвчээр шаарддаг спорт. Тиймдээ ч тамирчин гэхээсээ илүү сонирхогчид олон байдаг юм билээ. Энэ удаа бартаат замын уралдааны тамирчин болох мөрөөдлөөр жигүүрлэн бэлтгэл хийдэг, 12 настай А.Тэлмүүн хүүг “Шинэ танил” буландаа онцолж байна. Түүний аав Б.Ариунбаяр 2016 оноос хойш бартаат замын уралдаанаар уралдаж байгаа бөгөөд “Мазаалай кап 2016” уралдааны сонирхогчийн төрөлд хоёрдугаар байрт шалгарч байсан. Хүү нь аавыгаа дагаж энэ спортод дурлажээ. А.Тэлмүүнтэй ярилцлаа.

-Сайн байна уу. Эхлээд өөрийгөө танилцуулаач?

-Намайг Ариунбаярын Тэлмүүн гэдэг, 12 настай, 33-р сургуульд сурдаг. Аав, ээж дүүгийн хамт Гачууртад амьдардаг.

-Бартаат замын уралдааны тамирчин болохоор бэлтгэл хийдэг гэж сонссон. Хэдэн настайгаасаа машин унаж байгаа вэ?

-Тийм ээ, дөрвөн настайгаасаа хойш машин унаж байгаа.

-Анх хэн машин барихыг зааж өгсөн бэ?

-Аав зааж өгч байсан. Аав хөдөө очоод, өвөр дээрээ суулгаад өөрөө араа, хаазаа солиод, машин барихыг зааж өгч байсан юм.

-Яагаад анх машин унаж суръя гэж бодсон бэ?

-Аавыгаа хараад, аав шигээ машин унаж сурахыг хүссэн. Тэгээд л аав маань машин барихыг зааж өгсөн юм.

-Машин барихад аав нь юу гэж захидаг бэ?

-Намайг машин бариад явж байхад аав маань “Битгий сандар, замаа сайн харж, сандрахгүй яваарай” гэдэг.

-Бартаат замын уралдааны тамирчин болохоор шийдэж, бэлтгэл хийхэд нь юу хамгийн их нөлөөлсөн бэ?

-Аав, аавын оролцдог тэмцээн уралдаан, бас машин барьдаг, энэ уралдааныг сонирхдог хүмүүс хамгийн их нөлөөлсөн.

-Дуртай тамирчин байгаа юу?

-99 дугаартай уралддаг Баярбаатар ахаасаа үлгэр дуурайлал авдаг. Манай аавын найз, надтай ойр байж, надад маш их зөвлөгөө өгдөг ах бий.

-Чам шиг машин барьж, ирээдүйд тамирчин болох хүсэлтэй хүүхдүүдэд юу гэж зөвлөмөөр байна?

-Сурч чадахгүй гэж битгий бодоорой. Хичээвэл чи юуг ч сурч чадна. Бас битгий шантраарай гэж хэлмээр байна.

-Ямар, ямар төрлийн машин унаж чаддаг вэ?

-“Портер”, “приус”, “пажеро” зэрэг машиныг шороон, бартаат замаар унаж чаддаг.

-Ямар машин унах дуртай вэ. Бас яагаад?

-“Пажеро” унах дуртай. Хамгийн анх унаж сурсан машин маань болохоор.  

-Анх машин унаж үзэхэд ямар санагдсан бэ?

-Эхлээд маш их айсан. Дараа нь “Би машин барьж чадах юм байна” гэж бодоод маш их баярласан.

-Машинтай холбоотой мартагдашгүй дурсамж байгаа юу?

-Анх аавынхаа өвөр дээр суугаад явж байсан үеэ л хамгийн тод санадаг.

-Ирээдүйд ямар мэргэжилтэй болохыг хүсдэг бэ?

-Би жүжигчин болохыг хүсдэг. Мөн машинаар уралдахаа хобби болгож, ирээдүйд бартаат замын уралдааны шилдэг тамирчин болохыг хүсэж байна.  

-Чөлөөт цагаараа юу хийдэг бэ?

-Унадаг дугуй унадаг. Бас аавдаа машин засахад нь тусалдаг. Аавыг машинаа засаж байхад нь түлхүүр, багажыг нь зөөж өгч, гараашаа цэвэрлэдэг.