Хүүхэд, залуучууд өөрсдийн үзсэн анимэ дүрд хувирч, хувцаслалт, гадаад төрхийг нь дуурайхыг косплей гэж нэрлэдэг. Хэдхэн жилийн өмнө манайд энэ төрлийн сонирхолтой хүн ховор байсан байх. Харин одоо урлаг болтлоо хөгжиж, сонирхогчдын хүрээ тэлсээр байгаа. Бид косплейн хөгжилд өөрийн хувь нэмрээ оруулж яваа  Nene буюу  Б.Энэрэлийг урьж, ярилцлаа.

-Сайн байна уу, яг л анимийн дүр шиг хөөрхөн харагдаж байна. Манай уншигчдад өөрийгөө танилцуулаач?

     -Сайн байна уу. Энэ ярилцлагыг уншиж буй хүмүүст энэ өдрийн мэнд хүргэе. Намайг Батхишигийн Энэрэл гэдэг. Загвар болон гар урлал, косплей сонирхогч. Косплей хийдэг хүмүүс Нэнэ нэрээр минь илүү мэдэх байх.

-Хэзээнээс косплей сонирхож эхэлсэн бэ?

    -Дунд ангидаа анх анимэ үзэж эхэлсэн. Тэгээд яриаг нь хадмал орчуулгагүй ойлгохын тулд япон хэл бие даан сурч эхэлсэн юм. Суралцах явцдаа  анимэн дүрдээ хувирдаг косплей гэж зүйл байдгийг мэдсэн.

   Тэгээд гэр бүлдээ “Хийж үзмээр байна” гэхэд “Ахлах ангид ороод хийж болно” гэсэн. Ахлах ангидаа технологийн хичээл дээрээ самбарын алчуур оёж үзээд, үүнийгээ хөгжүүлж, илүү олон зүйл оёж сурахыг хүссэн. Тэгээд багшдаа “Надад оёдол заагаад өгөөч” гэхэд оёдлын онолын хичээлийн номууд өгсөн. Схемээ ойлгож, онолын мэдлэгтэй болтол оёдлын машинд огт ойртуулахгүй байсан. Тэгээд дуртай зүйлээ хийхийн тулд бүх зүйлээ бие даан судалсан даа. Үүнээс хойш бага багаар оёж сурч, дуртай анимийн дүрийн хувцсаа оёж эхэлсэн. Халаасны мөнгөө цуглуулж байгаад л косплей хийх материалаа авдаг байлаа.

-Таныг косплей хийж эхлэхэд, Монголд энэ төрлийн урлаг төдийлөн хөгжөөгүй байсан болов уу. Тэр үед гэр бүл, ойр дотнын хүмүүс нь ойлгож, дэмжиж байв уу?

            -Анх “Хэрэггүй юм хийлээ, хог цуглууллаа” гэдэг байсан. Тэгээд цаг хугацаа өнгөрөхийн хэрээр ойлгож, дэмжиж эхэлсэн.

-Ямар материалаар хийдэг вэ?

       -Гутал, углаашны ул хийдэг материалыг зөөлрүүлж, хэлбэрт оруулж, жижиг хэрэглэлээ хийдэг. Хувцсаа бол тохирох өнгийн материалуудыг нь бүс барааны дэлгүүрээс хайж олдог доо. Яг тохирсон өнгийн давуу олдохгүй бол хүнсний будаг ашиглан өнгөнд оруулна.

-Энгийн хүний нүдээр косплей хийх нь амархан харагддаг. Нүүрээ будаад, хиймэл үс зүүгээд л болчихдог юм шиг санадаг шүү дээ. Нэг косплей бүтээхэд хэд хоног шаардагддаг вэ?

       -Эхлээд дүрээ судалж, загвараа зурна. Тайван хийвэл 30 хоног, яаралтай бол долоо хоногт хийнэ.

-Дүрүүдээ хэрхэн сонгодог вэ?

         -Анимэ үзэж байгаад “Энэ дүр надад зохиж магадгүй юм байна” гэж бодсоноо сонгодог. Тэгээд өмнө нь энэ дүрийг өөр хүн хийж байсан эсэхийг судална. Ер нь хийхээс илүү судлахад цаг ордог.

-Чиний хувьд косплей хийхэд юуг голчлон анхаарах хэрэгтэй вэ?

           -Хэдий хайртай дүр маань байсан ч миний царай, бие галбир, өндөрт тохирохгүй байх үе бий. Хамгийн гол нь өөртөө тохирох дүрээ олох байдаг. Өөртөө тохирохгүй дүр болон секси хувцаслалтай дүр бүтээдэггүй.

-Анх хийж эхлэхэд оёж чадахгүй байх, хэцүү зүйл хэр тулгарч байв?

       -Бараг анхны косплей минь санагдаж байна. Хичээгээд, хамаг чадлаараа оёсон. Тэгээд өмссөн чинь надад таараагүй. Суналттай материалаар хийх байсан юм билээ. Одоо ч хувцасны шүүгээнд минь өлгөөтэй байдаг.

-Косплей хийж эхэлснээр амьдралд тань ямар өөрчлөлтүүд гарсан бэ?

        -Хүрээллээ тэлж, эерэг найзуудтай болсондоо баяртай байдаг. Мөн нүүр будалт хийж, загвар гаргаж сурсан. Бас жүжиглэх чадвараа хөгжүүлсэн, дүрдээ орохын тулд жүжиглэх шаардлагатай болдог. Өөр мэргэжилтэй болсон ч эдгээр чадвар амьдралд минь хэрэг болно.

-Ярилцлагын төгсгөлд косплей сонирхож эхэлж байгаа дүү нартаа хандаж зөвлөгөө өгөөч?

       -Намайг анх эхэлж байхад хүмүүс косплейг этгээд зүйл гэж хардаг байсан. Энэ талаар хүмүүсийн мэдлэг хомс байсан. Одоо харин бүх зүйл хөгжиж, сайхан болсон. Тиймээс би дүү нартаа “Хүсэж байвал хий” гэж хэлмээр байна. Гэхдээ цаг хугацаа их орохоос гадна санхүү шаарддаг шүү. Хэрэв надаас асуух зүйл байвал бүх сэтгэлээрээ туслах болно. Амжилт хүсье.

-Ярилцсанд баярлалаа.

                -Баярлалаа.