Сэтгүүлчээс зураач руу хөрвөж, кино урлагт хүч үзэж яваа уран бүтээлч А.Уянга буюу Ингатай ярилцлаа. Тэрбээр саяхан үзэгчдийн хүртээл болоод буй “Цус сорогчийн хайр” УСК-ны гол дүрийг бүтээсэн билээ.

-Сайн байна уу. Шинэхэн уран бүтээлээ үзэгчдийн хүртээл болгосонд баяр хүргэе. Цус сорогчийн тухай кино өмнө манайд хийгдэж байгаагүй гэдгээрээ онцлог. Эл бүтээлд дүр бүтээх саналыг хэрхэн хүлээж авч байв?

            -Баярлалаа, “Цус сорогчийн хайр” УСК-ны хамт олон маань дэлгэцийн өмнө гарч байгаагүй, шинэ содон дүрийг удаан хугацаанд хайсан юм билээ. Кино зохиолч маань энэхүү зохиолоо долоон жилийн хугацаанд бичсэн. Кино маань үзэгчдийн хүртээл болоод, америкийн видео сангуудаар гарч эхлэх гэж байгаад маш их баяртай байна. Миний хувьд “Бодлын хулгайч”, “Помагатинам” зэрэг кинонд продюсоор ажиллаж байсан болохоор дүр бүтээхэд арай дөхөм байлаа. Гэхдээ жүжигчин байх, камерын ард байх хоёр тэс ондоо. Намайг сорьсон, хүнд сценүүд байсан. Жишээлбэл, Цустай ваннд хэвтэж, авсанд орж, камерын өмнө нүцгэлэх амаргүй даваа байлаа.

-Цус сорогч гэдэг бол хийсвэр сэдэв шүү дээ. Нисэх, өндрөөс үсрэх зэрэг сцен байв уу?

            -Бид Hollywood-ийн мэргэжлийн орлон тоглогч нартай хамтарч ажилласан. Цус сорогч гэдэг утгаараа дийлэнх зураг шөнөөр авсан учир зодоонтой үзэгдлүүд дээр бэртэхчихвий гэж л эмээж байлаа.

-Тантай ярилцаад суухад та их зоримог эмэгтэй шиг санагдаж байна л даа. Хувь хүн талаасаа яриа дэлгээч?

            -Би сэтгүүлч, зураач мэргэжилтэй. Олон салбарт хүч үзэж өөрийгөө сорьж, өсвөр наснаасаа бизнес эрхэлж эхэлсэн. Би өөрийгөө адал явдалд дуртай, дайчин, зөөлөн сэтгэлтэй бие даасан эмэгтэй л гэж боддог доо.

-Сэтгүүл зүйн салбарт хэдэн жил ажилласан бэ. Энэ талаараа яриа дэлгээч?

            -Би Монгол Улсын Их Сургуулийг сэтгүүлчээр төгссөн. Мэргэжлээрээ найман жил ажилласан. Улирал тутам хэвлэгддэг “Updown” сэтгүүлд  эрхлэгчээр ажиллаж байсан. Сэтгүүлчийн мэргэжил бусдын нүдэнд энгийн харагдах ч маш их оюуны хүч шаарддаг хэцүү мэргэжил шүү дээ. Үргэлж шинэ содон зүйлс, хүмүүстэй учруулж, их зүйл сургасан болохоор мэргэжилдээ маш их хайртай.

-Сэтгүүлчээс зураач руу хөрвөжээ. Та хүүхэд байхаасаа зурдаг байв уу?

            -Хүүхэд байхдаа хүн бүр л зураг оролддог байх. Миний хувьд багадаа зурах авьяастай байсан. Харин  сүүлийн таван жил гаруйн хугацаанд уран зурагт төвлөрч ажиллаж, гурван үзэсгэлэн гаргасан байна.  Мөн ирэх аравдугаар сард тав дахь үзэсгэлэнгээ дэлгэхээр зэхэж байна. Би абстракт болон хөрөг зургаар дагнан зурдаг. Үзэл санааны хувьд түлхүү феминист, эротик чиглэлээр  бүтээлээ туурвидаг.  Миний хувьд зураачийн замналаа хожуу эхэлсэн учир  зурагтаа өвөрмөц  байх үүднээс эротик төрлөөр ихэвчлэн зурж байна. Олон улсад энэ төрөл аль хэдийнээ хүлээн зөвшөөрөгдөж, дагнасан  уран бүтээлч их байдаг. Харин манай улсад тоотой хэд байх шиг санагддаг. Сүүлийн үед францын коллеж арт төрөлтэй уусгаж, илүү сонирхолтой зураг зурахыг зорьж байгаа.

-Энэ төрлийн зураг зурах магадгүй уран бүтээлчээс тэр тусмаа эмэгтэй хүнээс зориг шаарддаг болов уу?

                -Би урлагийг үнэнээс төрдөг гэж боддог. Тийм болохоор нүцгэн үнэн зурж байна гэх үү дээ. Эротик бол гоо зүй, гэхдээ зурахад зориг, мэдрэмж шаардана. Ер нь амьдралын гашуун үнэн доторх гоо үзэсгэлэнг  л бүтээлээрээ харуулахыг хүсэж байна.

-Ярилцсанд баярлалаа. Цаашдын уран бүтээлд нь амжилт хүсье.

                -Баярлалаа.