Бидний хүүхэд байхдаа шимтэн үздэг байсан “Лоолоогийн найзууд” нэвтрүүлгийн хөтлөгч,“Уул, үүл”  хуудасны админ, залуу уран бүтээлч Б.Уянгатай ярилцлаа.

-Сайн байна уу. Уран бүтээл, яруу найргийн талаар яриа дэлгээч?

          -Би Соёл Урлагийн Их Сургуулийг Ж.Лхамхүү багшийн удирдлага дор жүжигчин мэргэжлээр төгссөн. Ээжийн ажлаа хийж байгаад, эргээд уран бүтээлдээ орсон. Одоогоор “Уул, үүл” хуудсаа хөтлөөд, залуучууддаа яруу найргиын сайхныг мэдрүүлэхээр хичээж явна. 2021 оноос хойш контент хийж, шүлэг уншиж, утастай мэндчилгээ хүргэж байгаа. Мөн саяхан “Womans club”-ийг жүжигчин Э.Хонгорзул, н.Тэгшжаргал нартаа хамтран үүсгэн байгуулаад, хамтдаа мэргэжлийн уран бүтээл болон контентуудыг хийж эхэлсэн.

-Яруу найраг хэзээнээс сонирхож эхэлсэн бэ?

          -Би хүүхэд байхаасаа л яруу найраг дуртай, бичих сонирхолтой хүүхэд байсан. “Уран жиргээ”, “Хүрэл тулга” зэрэг наадмуудад үргэлж л дээгүүр байр эзэлдэг байлаа. Оюутан болоод мартсан байж байгаад, саяхнаас сэргээсэн гэх үү дээ. Анхны шүлгээ охиныхоо төрсөн өдөрт зориулж уншаад, хуудастаа байршуулсан. Хүмүүсээс ирж буй эерэг сэтгэгдлийг уншаад, цаашид илүү сайхан шүлгүүдийг уншиж хүргэхийг л хүсдэг дээ.  Би шүлэг уншиж байхдаа маш их тайвшралыг мэдэрдэг. Тийм болохоор яруу найрагт хайртай.

-Анх хэний шүлэг таныг яруу найраг дурлуулж байв. Хэдэн мөрийг уншиж өгч болох уу?

          -Зохиол Р.Отгонцэцэгийн “Аавдаа“ шүлгийн анх уншаад, “Яруу найраг гэж ийм сайхан зүйл бил үү” гэж бодож байлаа.

Охин нь ядраад байна аа, аав аа

Олон олон шалтгаан, олон асуудал байна

Шийдэх гэж тэмцэж, тэсэж нэг үзлээ

Шигдсэн өргөс шиг, шидсэн чулуу шиг өвтгөөд байна

Заримдаа таныг яаж тэсдэг юм билээ гэж бодох юм... гээд их сайхан, дурламаар шүлэг... Мөн  яруу найрагч Ш.Сүрэнжав гуйн шүлгүүд миний хоолойнд тохирдог.

-Аавын тухай шүлгийн дараа түүний тухай ярихгүй өнгөрч болохгүй байх?

               -Би аавын жинхэнэ хайрын охин. Ер нь охидууд аавдаа амь байдаг шүү дээ. Одоо харин аав минь гурван охинд минь бүхэл хайраа дэвсдэг дээ.  Бага байхаасаа л аав, ээж хоёр минь олон төрлийн дугуйланд явуулж, намайг хөгжүүлдэг байсан. Айлын ганц охин болоод ч тэр үү, их эрхэлж өссөн байх.

-Тэднийгээ гомдоож байсан болов уу?

               -Хэтэрхий ихээр гомдоож байгаагүй ч гонсойлгож байсан удаа их байх. Ээж минь намайг мэдээний хөтлөгч болгохыг мөрөөддөг юм. Удахгүй тэр хүслийг нь биелүүлнэ ээ.

-Охидуудынхаа талаар яриач?

               -Айлын ганц охин болохоор багадаа үеэлийндээ очиж, хамт тоглох гэж аав, ээжээсээ их гуйдаг байлаа. Залуудаа ээж болсон болохоор охидуудтайгаа найз мэт л хамтдаа өсөж байна даа. Яг л сайн найзыг минь бурхан илгээсэн юм санагддаг. Ганцаараа өссөн болохоор олон хүүхэдтэй болохыг л хүсдэг дээ.

-“Womans club”-ийн талаар яриа дэлгээч?

          -Цахим сүлжээ хурдацтай хөгжиж эхэлснээс хойш хүмүүс ном уншиж, яруу найраг сонирхох нь багассан юм шин санагддаг. Бидний уншсан шүлэг тэднийг эргэн яруу найраг, утга зохиол руу урвуулна гэж найддаг. Мэдээж мэргэжлийн жүжигчид болохоор хамтдаа бүрэн хэмжээний кино, уран бүтээлүүд дээр ажиллана.

-Жүжигчний мэргэжлийг сонгоход хэн нэгэн нөлөөлж байв уу?

          -Хүүхэд байхын олон зүйл туршиж үздэг, хөдөлгөөнтэй байсан. Жүжигчин хүн бүхий л дүр хувирч чаддаг болохоор дурлаж, сонгосон. Арван жилээ төгсөх жилдээ “Үнсгэлжин” жүжгийн шидэт дагины дүрд тоглож байлаа.Тэр үеэс л театрт хайртай болсон доо. Талийгаач Жүжигчин Аси/Р.Алтансүх/ багш минь надад “Миний охин театрын хүн” гэж хэлж байсныг одоо ч санадаг. Хэрэв боломж нь бүрдэх юм бол дахин театрын тайзнаа гарах болно.  

Бид залуу уран бүтээлч Б.Уянгатай энэ удаад цөөн хором ийн ярилцлаа.