БЯМБААГИЙН НАЙЗУУД: "Ямар ч үед хамтдаа" гэж амласан болохоор загнуулсан ч, магтуулсан ч, шоглуулсан ч цугтаа байхыг хичээдэг

Э. Энхмаа:
Гэрэлт ирээдүй- Шинэ танил

2022-06-04, 795

Хүүхэд насны гэнэн томоогүй нөхөрлөлийн үнэ цэн, гэгээн түүхийг хуваалцдаг “Бямбаагийн найзууд” хэмээх богино хэмжээний нэвтрүүлгийг долоо хоног бүр бэлтгэн, уншигч та бүхэнд хүргэдэг билээ. “Бямбаагийн найзууд” нэвтрүүлгийн энэ удаагийн дугаарын зочноор Дорноговь аймгийн Сайншанд сумын нэгдүгээр сургуулийн тавдугаар ангийн сурагч Н.Амарбаясгалан болон Э.Энхтөр нарыг урьсан юм. Тэдний дурсамж дүүрэн, инээд цалгисан ярилцлагыг уншигч таны өмнө дэлгэе.

-Сайн байна уу, та хоёрт энэ өдрийн мэнд хүргэе. Манай сайтын уншигчдад өөрсдийгөө танилцуулаач?

-Н.Амарбаясгалан: Сайн байна уу, намайг Норжмаагийн Амарбаясгалан гэдэг. Дорноговь аймгийн Сайншанд сумын нэгдүгээр сургуулийн тавдугаар ангид суралцдаг. Сайншанд суманд өсөж, төрсөн. Одоо 11 настай, айлын том хүүхэд.

-Э.Энхтөр: Сайн байна уу, намайг Энхдөлийн Энхтөр гэдэг. Дорноговь аймгийн Сайншанд сумын нэгдүгээр сургуулийн тавдугаар ангид суралцдаг. Одоо 11 настай.

-Та хоёр найзлаад хэдэн жил болж байгаа вэ?

-Э.Энхтөр: Бид бүр цэцэрлэгт байхаасаа л найзалсан. Анх яагаад найзалснаа санадаггүй юм. Ямартай ч цэцэрлэгт нэг ангид сурдаг байсан. Тэгээд л нэг мэдсэн чинь сайн найзууд болчихсон байсан. Надад хэзээ ч мартдаггүй нэг зүйл байдаг. Хүүхдүүд намайг муухай үгээр доромжилж байхад найз минь хамгийн түрүүнд намайг хамгаалж байсан. Магадгүй тэр үеэс хойш илүү сайн найзууд болсон байх.

-Н.Амарбаясгалан: Найзлаад найман жил болж байна. Одоо үргэлж хамт явдаг сайн найзууд болсон. Бүр жаахан байхаасаа найзалсан болохоор найздаа дэндүү их хайртай байдаг.

-Та хоёрын бодлоор сайн найзууд ямар байх ёстой вэ?

-Э.Энхтөр: Нэг нэгнээ бусдаас хамгаалж, хайрладаг, заримдаа уучлалт гуйж, буулт хийдэг. Бас нууцаа хэлдэг. Хэлсэн нууцыг нь сайн хадгалдаг. "Ер нь л сайн найз гэдэг яг Н.Амарбаясгалан шиг байхад хангалттай”. /Инээв/

-Н.Амарбаясгалан: Э.Энхтөр маш мундаг хүүхэд. Бага байхаасаа олон зүйлд өөрийгөө хөгжүүлдэг байсан. Харин би дуу цөөнтэй даруухан хүүхэд. Найз минь намайг олон сайхан зүйл сурахад тусалсан. Би монгол хэлний хичээлдээ сайн, харин Э.Энхтөр математикдаа сайн. Бид хоёр нэг нэгэндээ мэдэхгүй, ойлгоогүй хичээлийг нь зааж өгдөг. Мөн би сайн найзтайгаа хамтдаа хөгжиж, суралцахын тулд морин хуурын дугуйланд явж байгаа. Одоо тэгээд л сураад л байна даа.

-Хамтдаа морин хуурын дугуйланд явдаг гэлээ. Яагаад морин хуур сурахаар шийдсэн юм бэ?

-Э.Энхтөр: Манай Дорноговь аймаг соёл, урлагийн олон авьяастнууд мэндэлсэн өлгий нутаг. Цэцэрлэгт байхаас л дуу, бүжиг, үндэсний хөгжим сурах хүслийг багш нар маань дэмждэг. Миний хувьд морин хуураар тоглох болсон хамгийн том шалтгаан нь биет бус соёлын өвийг тээгч, түгээн дэлгэрүүлэгч яг л багш шигээ болохыг хүссэн. Одоо морин хуураар хичээллээд жил болж байна. Мөн найзтайгаа уулзах, шинэ зүйл сурах, сурснаа давтах боломж олддог учраас морин хуур тоглохоор дуртай. Бид хоёр гар бөмбөг ч тоглох дуртай.

-Н.Амарбаясгалан: Би Э.Энхтөрийг морин хуур тоглож сурч байгаа болохоор хамтдаа суралцмаар санагдаад “Эгшиглэн энтертаймент”-ийн морин хуурын дугуйланд явахаар болсон. Одоо морин хуураар хичээллээд зургаан сар болж байна. Бүр сайн сураагүй байгаа ч морин хуураа тоглоод суухаар бахархал төрдөг. Яагаад гэдгийг нь мэдэхгүй ч дахин дахин тоглоод л баймаар гоё санагддаг.

-Сүүлийн үед хүүхдүүд краш гэж их ярьдаг болсон. Та хоёр үүнийг юу гэж ойлгож байна вэ?

-Э.Энхтөр: Манай үеийн бүх хүүхэд үүнийг мэддэг байх. Миний бодлоор харж явдаг хүүхдийг л хэлдэг гэж ойлгодог. Надад нэг найз охин байсан, одоо үерхэхээ больсон. Санамсаргүй байж байгаад сайн охиноосоо “Хоёулаа үерхье” гэсэн чат авсан. Яг гуравдугаар сарын зургааны өдөр байсан. Эхлээд жаахан гайхсан. Сүүлдээ баярласан. Өөрөө түрүүлж бичээгүй болохоор, намайг түрүүлж гуйсан гэж ойлгож байгаа. Буруу зөвийг нь мэдэхгүй ч үерхчихсэн. Тэгэхээр крашаасаа үерхэх санал авсан гэсэн үг биз дээ.

Н.Амарбаясгалан: Э.Энхтөрд нэг л найз охин байсан. Харин надад байхгүй ээ. Гэхдээ манай найз надад үерхэх санал авснаа хамгийн түрүүнд хэлсэн гээд боддоо. Яахав харж явдаг краш гэвэл ганц нэг байгаа байгаа.

-Э.Энхтөр: Худлаа яриад байгаач. Чамд краш зөндөө байдаг шүү дээ. Яагаав дээ, чи дээр нэг яриад байсан.

-Н.Амарбаясгалан: Гэхдээ цөөхөн л байгаа. Яг албан ёсны найз охин одоогоор нэг ч байхгүй ээ./Инээв/

-Краш гээд хэлсэн чинь та хоёрт олон дурсамж байдаг бололтой?

-Э.Энхтөр: Сайн найзууд болохоор бүх юмаа нуулгүй ярьдаг.Тэгж байж л сайн найзууд хэвээрээ байна шүү дээ.

-Н.Амарбаясгалан: Зүгээр л танил санагдаад л жаахан ярьчихлаа. Одоо 10,11 настай хүүхдүүд краш, найз охин байх нь хэвийн зүйл байх. Гэхдээ найз бид хоёр даруухан хүүхдүүд л дээ.

-Найзыг чинь хэн нэгэн шогловол яадаг вэ?

-Э.Энхтөр: Заримдаа тийм үе байдаг. Хэрэв хэн нэгэн найзыг минь гомдоовол би өмөөрөөд, шууд дайрна. Энэ мэт биенээ хамгаалдаг даа.

Н.Амарбаясгалан: Ямар ч үед хамтдаа гэж амласан болохоор загнуулсан ч, магтуулсан ч, шоглуулсан ч хамтдаа байхыг хичээдэг. Зуны амралтаар бид хоёр хол газар амардаг болохоор хамт байж чаддаггүй. Хамт байгаагүй хугацаанд хэн нэгэн биднийг гомдоосон бол уулзаад хоорондоо ярьчихдаг.

-Санаанаас гардаггүй, сахилгагүйтсэн дурсамж бий юү?

-Н.Амарбаясгалан: Байдаг. Бараг хоёрдугаар ангид байх аа. Гэр лүүгээ харих гээд хамт явж байгаад зүгээр л айлын цонх руу чулуу шийдмээр санагдаад, шидчихсэн. Юм хагарах чимээ гарангуут нь зугтаагаад явчихсан. Нэг хэсэгтээ л тэр замаар гэрлүүгээ дахиж яваагүй. Энэ буруу зүйл л дээ. Тэр үед жаахан байсан болохоор л ийм зүйл хийсэн. Одоо том болсон болохоор арай гайгүй ухаан суусан./Инээв/

Э.Энхтөр: Цонх хэзээ хагалсныг санахгүй л байна. Би сүүлийн үед жаахан мартамхай болоод байгаа юм аа.

-Том болоод ямар хүн болно гэж боддог вэ?

-Э.Энхтөр: Би яг л аав шигээ хүн болно. Манай аав архи ууж, тамхи татдаггүй. Би бүр жаахан байхаасаа элэгний B вирустэй байсан гэж ээж маань хэлсэн. Тийм болохоор муу зуршлаас хол байхаас өөр аргагүй. “Баян болохоос илүү эрүүл байх нь чухал” гэж эмээ маань хэлсэн л дээ. Тэгэхээр эрүүл, аав шигээ л хүн болмоор байна.

-Н.Амарбаясгалан: Би бас жаахан байхдаа ясны хорт хавдраар өвдсөн гэсэн. Би одоо санадаггүй ч гэрийнхэн маань тэгж хэлсэн. Мөн би машинд дуртай учраас уралдаанд оролцдог жолооч болохыг хүсдэг.

-Зорьж ирсэн бидэнд цаг гарган ярилцсанд баярлалаа. Энэхүү ярилцлагыг уншиж буй уншигчдад хандаж хэлэх зүйл байна уу?

-Э.Энхтөр: Гэр бүлийнхэн болон багш нартаа баярлалаа. Бас "Найздаа хайртай шүү" гэж хэлмээр байна.

-Н.Амарбаясгалан: Надтай найзалж, нууцыг минь хадгалдаг сайн найз Э.Энхтөрдөө болон гэр бүлийнхэндээ "Хайртай шүү" гэж хэлэхийг хүсэж байна.

БЯМБААГИЙН НАЙЗУУД: "Ямар ч үед хамтдаа" гэж амласан болохоор загнуулсан ч, магтуулсан ч, шоглуулсан ч цугтаа байхыг хичээдэг