• Өнөөдөр 2022-05-19

Э.АНУСЭЦЭН: Уран сайхны гимнастик эмэгтэй хүнийг хамгийн үзэсгэлэнтэйгээр харуулдаг

2022-05-14,   275

    Уран сайхны гимнастикаар 10 жил тасралтгүй хичээллэж гадаад болон дотоодын олон тэмцээнд амжилттай оролцсон  тамирчин Э.Анусэцэнтэй ярилцлаа. Тэрбээр Дубай хотод болсон “Dugymcup 2017” тэмцээний дэд байр,  мөнгөн медаль, 2017 онд Орос Улсад болсон уран сайхны гимнастикийн олон улсын тэмцээний хоёр алтан медальтай өсөх ирээдүйтэй тамирчин юм. Түүний хувьд энэхүү спорт эмэгтэй хүний хамгийн төгс байдлыг ил болгодог гэнэ.

 -Энэ өдрийн мэнд хүргэе. Тэмцээндээ амжилттай оролцож байна уу. Манай уншигчдад өөрийгөө танилцуулаач?

      -Сайн байна уу? Намайг Энхбаярын Анусэцэн гэдэг. Одоо 15 настай. Шинэ Монгол Харүмафүжи сургуулийн 9-3 ангид суралцдаг.

-Уран сайхны гимнастикаар хэзээнээс хичээллэж эхэлсэн бэ?

      -Би уран сайхны гимнастикаар таван настайгаасаа хойш буюу 10 жил хичээллэж байна.  Анх ээж "Ийм уран сайхны гимнастик гэсэн спорт байдаг юм байна миний охин хичээллэж үзэх үү" гэсэн тухайн үед юу бодолгүй  "Тэгье" гээд сургалтын төв дээрээ ирж байлаа.Тэр үед спорт ч гэж мэддэггүй байж дээ. Уран сайхны гимнастик заалгахаар анх Халиун багш дээрээ ирж байсан. Одоо ч Халиун багшийнхаа удирдлага доор явдаг.

-Уран сайхны гимнастикаар арван жил хичээллэхэд юу нөлөөлөв ?

      -Гимнастик, тэр дундаа уран сайхны гимнастик гэдэг дан  ганц охидын спорт. Эрэгтэй хүн хичээллэдэггүй. Уран сайхны гимнастик эмэгтэй хүнийг өв тэгш бие галбиртай, хөдөлгөөний эвсэлтэй, уян хатан болгодог. Ер нь бол үзэсгэлэн төгөлдөр эмэгтэй хүнийг цогцлоож өгдөг. Бидний өмсдөг хувцас, нүүр будалт гээд эмэгтэй хүнийг тал талаас нь хамгийн гоо төгөлдөр болгож харуулдаг.  Тэр зүйлд нь дурлаж, энэ спортод хайртай болсон. Мөн спортоор хичээллэх нь ирээдүйд хэрэгтэй учраас ингэж олон жил хичээллэж байгаа.

-Энэ спортоор хичээллэсний үр шим нь юу байсан бэ?    

       -Хаана ч явсан үргэлж нэг зүйлээр онцгойрдог. Тэр онцгой зүйл нь уран сайхны гимнастик байдаг. Жишээ нь сагс, гар бөмбөгийн дугуйланд хамрагдахад бусдаасаа илүү хөдөлгөөний эвсэлтэй байна. Спортоор хичээллэдэг минь давуу тал болсон олон  тохиолдол байгаа.

-Гэр бүлийн гишүүд нь хэр их дэмждэг вэ?

       -Гэр бүлийнхэн маань хамгийн их ойлгож дэмждэг. Тэр дундаа ээж илүү их дэмжинэ. Хүмүүс намайг дэмжиж байна гэдэг цаашаа үргэлжлэх урам болж байдаг.

-Гадаад дотоодын олон тэмцээн уралдаанд оролцсон юм билээ. Бүгд л хичээл зүтгэл шаардсан байх тэр дундаас хамгийн их бэлтгэл шаардсан нь ямар тэмцээн байсан бэ?

    -Өдөр бүр бэлтгэлтэй байдаг. Тийм ч учраас орох боломжтой бүх тэмцээн уралдаанд оролцохыг хичээдэг. Миний хувьд зургаан настайгаасаа хойш олон тэмцээнд оролцсон. Хамгийн их бэлтгэл шаардаж байгаа гэвэл зургаан сард болох гэж байгаа нэг тэмцээн байна. Тэрнээс өмнө гэвэл 2017 онд Дубай хотод болсон тэмцээнд хамгийн их бэлдсэн.

-Олон тэмцээнд орсон гэлээ.Тэр дундаас хамгийн дурсамж үлдээсэн тэмцээн байгаа юу?

    -Орос Улсад болсон тэмцээнд миний өрсөлдөж байгаа төрөлд олон мундаг охид байсан. Тэр дунд Орос Улсын хамгийн шилдэг тамирчин охин оролцохоор бэлдэж байсан. Тэмцээн эхлэх, үзүүлбэр үзүүлэхээс өмнө бага зэргийн сандралтай байсан, гэхдээ үзүүлбэрээ өөрийн чадах хамгийн сайнаараа үзүүлээд гараад ирсэн. Тэгсэн тэр сайн охиныг ялаад тэргүүн байр эзэлсэн, үгээр хэлж барамгүй мэдрэмж авсан даа.  Тэр үед Оросын шүүгчид манай багшид намайг “Ямар мундаг, чадвартай охин бэ” гэж магтсан байсан. Тэгээд шилдэг үзүүлбэрүүдээр хийдэг гала тоглолтод урилгаар оролцож өөрийнхөө үзүүлбэрийг үзүүлсэн дээ.

-Спортоор хичээллэж байх явцад олон бэрхшээл,шантарсан үе гардаг шүү дээ. Танд тийм  үе гарав уу?

    -Тийм хэцүү, шантармаар зүйл одоогийн байдлаар гарч ирээгүй ээ. Гэхдээ бага ангид байхад уян болохын тулд шахалт хийгээд, жаахан байсан болохоор бааштай ч байж өвдөг өвдөөд, 2-3 хоног уйлаад “Ёстой энэ спортоос гарна болино” гэж их бодсон. /Инээв/ Өөр гэвэл Орос Улсад болсон тэмцээнд оролцоод ирж байх үедээ осолд орсон. Тэр үед бас нэг удаа гарах талаар бодож байсан. Гэхдээ шантраагүй учраас өнөөдөр дахиад нэг тэмцээнд оролцоод сууж байна.

-Уран сайхны гимнастикаар хичээллэж байгаа тамирчинд анхаарах ёстой дэглэм байдаг уу?

    -Уран сайхны гимнастикчид биеийн жин маш сайн барих ёстой. Жингээ барихын тулд тодорхой цагт, тохирсон хоол хүнс хэрэглэнэ. Мөн уян байх ёстой, ингэхийн тулд өдөр бүр сунгалтын дасгал хийх ёстой. Нэг өдөр хийгээд хэдэн хоногоор таслах юм бол уян болж чадахгүй. Тиймээс сунгалтын дасгалыг өдөр бүр олон цагаар хийдэг.

-Э.Анусэцэн ирээдүйн мэргэжлээ сонгосон уу?

    - Одоогоор тэс өөр чиглэлийн хоёр мэргэжил сонгосон байгаа. Хуульч болох талаар бодож байгаа. Нөгөө нь гэвэл багаасаа кино урлагт дуртай, үзэж өссөн болохоор жүжигчин мэргэжлийг бас их сонирхож байна.

-Одоо сонгосон байгаа хоёр мэргэжил нь гимнастиктай төдийлөн холбоогүй юм байна шүү дээ. Тэгвэл ирээдүйд мэргэжлээрээ ажиллахын хажуугаар спортоо орхихгүй хичээллэнэ гэж боддог уу?

    -Гимнастик нь бусад жүдо эсвэл гүйлтийн спорт шиг 30 40 нас хүртэл үргэлжлэх хэцүү,боломжгүй байдаг. Хүний уян хатан байдлыг шаарддаг учраас сайн бэлтгэл хийлээ гэхэд 25 нас хүртэл хичээллээд зогсохоос өөр аргагүй болдог. Тийм учраас мэргэжил эзэмшсэнийхээ дараа гимнастикаар хичээллэж чадахгүй байх гэж боддог. Ер нь энэ спортын хувьд 2-3 цагийн бэлтгэл хийгээд ч хангалтгүй олон удаагийн давталт, олон цагийн бэлтгэл шаарддаг.  Тиймээс тамирчны хувиар бэлтгэл сургуулилт хийж чадахгүй болно. Гэхдээ аль болох бэлтгэлээ хийхийг хичээнэ.

-Гимнастикаар хичээллэх хугацаанд тохиолдсон хамгийн хөгжилтэй дурсамжаасаа хуваалцах уу?

    -Нэг хүүхэд бүр ямар ч тоглосон шинжгүй “Чамд яс байдаг юм уу” гэж асуугаад миний бугуйнаас барьж үзэж байсан. “Тэгээд энэ яс мөн юм уу. Яаж ийм уян байгаа юм бэ” гэж үнэхээр  гайхсан шинжтэй асууж байсан. Надад ийм төрлийн асуулт их ирдэг.

 

 

-Уран сайхны гимнастикаар хичээллэж байгаа дүү нартаа зөвлөх зөвлөж байгаа юу?

    -Хичээллэх гэж байгаа хүүхдүүдэд бол "Хичээллээд үзээрэй төсөөлж байгаагаас чинь илүү  сайхан спорт" гэдгийг хэлмээр байна. Харин хичээллэж эхэлсэн тамирчдадаа "Бэлтгэлээ сайн хийгээрэй, битгий шантраарай хичээж чадвал амжилтад хүрч чаддаг шүү" гэдгийг хэлмээр байна.

-Ярилцлага өгсөнд баярлалаа. Илүү олон амжилт үзүүлсэн мундаг тамирчин болоорой.

        -Баярлалаа, Амжилт хүсье.

Уран сайхны гимнастик гэдэг эмэгтэй хүнийг хамгийн төгс, эрхэм ялдам, уян зөөлөн гэдгийн харуулдаг спорт ажээ. Э.Анусэцэн охинтой хэсэгхэн яриа өрнүүлж байх үед тайзан дээр үзүүлбэр үзүүлж буй охид нуурандаа байгаа хун мэт харагдаж байлаа. Үзүүлбэрээ үзүүлж буй охидод 1:30 секундийн хугацаа бий, гэвч тэд энэ богино хугацаанд дэлбээгээ нээсэн сарнай мэт үзэсгэлэнтэй байж чадаж байлаа.



 


Э.АНУСЭЦЭН: Уран сайхны гимнастик эмэгтэй хүнийг хамгийн үзэсгэлэнтэйгээр харуулдаг
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188