М.ЯНЖИНДУЛАМ: Бидний бүтээл хүмүүст хүрч байгаад сэтгэл дүүрэн явдаг

Д. Бямбасүрэн:
Гэрэлт ирээдүй- Шинэ танил

2022-02-20, 832

Эргэлт.мн мэдээллийн сайт “Шинэ танил” булангийнхаа ням гарагийн зочноор HUMANZ.mn START UP-ын сэтгүүлч, жүжигчин М.Янжиндуламыг урилаа. Тэрбээр 2020 онд МУИС-ийг утга зохиол судлаач мэргэжлээр төгсөөд өдгөө тус сайтын сэтгүүлчээр ажиллаж байгаа юм. Түүнтэй бид тус сайтын хийдэг богино бичлэг болон дүрээ хэрхэн бэлддэг талаар нь ярилцсанаа хүргэж байна.

-HUMANZ.mn START UP-ынхан залууст цаг үеэ мэдэрсэн богино хэмжээний нөлөөллийн бичлэгүүдийг хүргэдэг. Та бүхэн санаагаа хэрхэн олдог вэ?

-Манай багийнхан асуудал дэвшүүлсэн болон эерэг хандлагыг нийгэмд түгээх зорилгоор нөлөөллийн богино хэмжээний видео бичлэг бэлдэж, бүтээдэг. Бид хагас жилийн хугацаанд 100 гаруй нөлөөллийн богино бичлэг үзэгчдэд хүргэсэн байна. Бидний ард ямар нэгэн нам, эвсэл, байгууллага огтхон ч байхгүй. Бид сайтынхаа багийг өөрсдөө бүрдүүлж, бүхнийг тэгээс эхэлсэн. Мөн бичлэгийнхээ санааг өөрсдөө гаргаж, зохиолоо бичиж, дүрдээ тоглодог. Ихэнхдээ хамтдаа ярилцаж, нэгнийхээ гаргасан санааг дэмжин, ажил болгодог юм.

-Та бүхний зорилго хэр биелж байна вэ?

-Манай уншигч, үзэгчдийн ихэнх хувийг өсвөр насныхан, залуус эзэлдэг. Бид тус насныханд сэтгэл зүйн болон бэлгийн боловсрол хамгийн их хэрэгцээ шаардлагатай байгааг олж анзаарсан. Тиймдээ ч бичлэг бүрдээ өсвөр насныхан болон залууст тулгамдаж байгаа асуудалд нь нэг ч гэсэн хариулт тодорхой өгөхийг зорьдог. Мөн мянган, мянган залуус бидний хөндөж буй сэдэв, ил болгож буй асуудлуудыг сонсож, өөрсдөдөө тулгамдсан асуудлаа шийдээсэй, шийдэхэд нь бид дэм болосоосой гэж зорьдог. Энэ дагуу манай цахим хуудаст тулгамдаж буй асуудлаа бичсэн зурвас өдөрт олон зуугаараа ирдэг. Тэр бүхэнд бид тэдэнд хэрэгцээтэй нөлөөллийн ажлыг хамгийн сонирхолтой байдлаар хүргэж, үр дүнд хүрэхийг зорьж ажилладаг.

Манай цахим хуудсанд тулгамдаж буй асуудлаа бичсэн зурвас өдөрт олон зуугаараа ирдэг

-Өдөр бүр богино хэмжээний бичлэг тогтмол оруулдаг шүү дээ. Ажлын нэг өдөр нь хэрхэн өнгөрдөг вэ?

-Өглөө ажилдаа ирээд редакцын ажлаа эхлүүлдэг. Ингэхдээ цаг үеийн гэхээсээ илүүтэй зорилтот булангуудаар сайтын мэдээ, мэдээллээ уншигчдадаа хүргэдэг. Тэгээд тухайн өдөртөө видеогоо хийж хүмүүст хүргэнэ. Бид богино бичлэгийнхээ тоглогдох сэдвээ тухайн өдөртөө болон өмнө нь ярилцаж, хуралдсан санаагаа баяжуулан гаргана. Өмнөх өдөр нь "Чи ийм хувцастай, тийм зүйл авчраарай. Ингэж хэлээрэй, тэгэж хараарай" гээд л нэгэндээ сануулж, санаагаа найруулна. Бид удаан, хурдандаа биш, харин тууштай байдлаар зорилго, үр дүндээ хүрэхийг хичээж байгаа учраас нэг хүн бараг 2-4 хүний ажлыг хийдэг юм.

-Мэргэжлийн жүжигчид биш болохоор бэрхшээл багагүй гардаг болов уу?

-Яагаад ч юм өөрсдөө хүсээд хийж байгаа зүйлдээ ялархахыг хүсдэггүй. Хувь хувьдаа дүрийн онцлогоо бодоод нарийн төвлөрчихөөр нэг их хэцүү бэрхшээлтэй тулгардаггүй. Гэсэн ч мэдээж мэргэжлийн биш тул алдаа болон дутагдалтай зүйлстэй тулгардаг ч эвтэйхэн шийдээд арга замаа олчихдог. Нэг талаараа гурван хүн маш олон талын дүрд хувирч, өөр өөр ааш авир гаргана гэдэг хэний ч санаанд буумгүй л байгаа байх. Гэхдээ л бид дүрүүдээрээ хүмүүст хүлээн зөвшөөрөгдөж, хийж буй бүтээл минь хүмүүст хүрч байгаад сэтгэл дүүрэн явдаг.

-Таны хувьд ихэнхдээ эрэгтэй болон эсрэг дүрд тоглодог шүү дээ. Энэ нь тухайн хүнээс илүү их ур чадвар шаарддаг байх. Үг болон дүрээ хэр хугацаанд бэлддэг вэ?

-Старт АП болохоор анхнаасаа л юмхнаар юм хийгээд сурсан чадвараараа дүрээ бүтээдэг. Гурвуулаа эмэгтэй болохоор, эрэгтэй дүрд зайлшгүй нэг нь хүч сорих хэрэгтэй болж байгаа юм. Тэгээд яагаад ч юм би эрэгтэй дүрд хөрвөх чадвар өндөртэйд тооцогдоод анхны дугаараас хойших бүхий л эрэгтэй дүрд тоглосон. Эсрэг дүр ч мөн адил. Магад өөрт байдаг нэг чадвараа эсрэг дүрээр нээж байх шиг санагддаг. Тухайн өдрийн богино бичлэгт ямар дүр байна, үгүй гэхгүй шууд л дотор байгаа ийм, тийм гэсэн зан төлөвөөр дүрээ бүтээдэг. Би бүр эсрэг дүрээсээ болоод шулам гэж нэрлэгдчихсэн байна лээ. Одоо тэгээд амьтан болох л дутуу байна даа /инээв/. Бидний хувьд зохиолоо гаргаад л дор бүрнээ бэлддэг, багаараа ажиллах их урамтай шүү дээ, дутуугаа гүйцээгээд л.

-Манай сайтын залууст хандаж хэлэх зүйл бий болов уу?

-Залуус бол том хүч. Нас залуу, цус шингэн гээд улстөр, нийгмийн асуудлаас ангид байж, хойш сууж болохгүй. Харин ч хамгийн оролцоотой, үзэл бодол, үг үйлдэлдээ үнэнч тууштай байх хэрэгтэй. Түүнээс биш, болохгүй байна гээд зүгээр л утасны цаанаас бухимдаж суухын оронд нэг ч гэсэн өөрчлөлт авчрах эерэг дадалд суралцаж байгаа орчиндоо нөлөөлөл үүсгэх хэрэгтэй санагддаг.

-Цаг гарган ярилцсанд баярлалаа. Амжилт хүсье.

-Баярлалаа.