Тэр одоогоор хэний ч танихгүй уран бүтээлч. Гэвч түүнд ирээдүйд хүмүүсийн хайрыг татсан уран бүтээлч болох том хүсэл мөрөөдөл бий. Урлагийн ертөнцөд өөрийн нэгэн өнгө төрх, авьяасаараа дөнгөж урган цэцэглэж байгаа залуу уран бүтээлч Атарбаярын Эгэлзаяаг “Шинэ танил” буландаа урилаа. Тэрбээр сургуулиа төгссөнөөс хойш “Нэг талын тасалбар” киноны гол дүр, “Гэгээн учрал” киноны туслах дүрд ажилласан залуу уран бүтээлч юм.

-Сайн байна уу. Манай уншигчдад өөрийгөө танилцуулаач?

  -Сайн, сайн байна уу. Танай уншигчдад энэ өдрийн мэнд хүргэе. Намайг А.Эгэлзаяа гэдэг. Булган аймгийн Тэшиг суманд төрж өссөн. Тэгээд өнгөрсөн жил Соёл урлагийн их сургуулийг жүжигчин мэргэжлээр суралцаж төгссөн.

-Яагаад жүжигчин мэргэжлийг сонгосон бэ?

 -Арван жилд байхдаа телевизэд хоёр жил хөтлөгч хийж байсан. Тэгээд сэтгүүлч болно гээд эргэлт буцалтгүй шийдчихсэн байлаа. Арван нэгдүгээр ангид байхад багш минь "Миний мэргэжил, миний мөрөөдөл" сэдэвтэй эсээ бичүүлэхэд мөн л өөрийгөө сэтгүүлч болно гэж мөрөөдсөн маш гоё эсээ хураалгаж байсан юм байна лээ. Гэтэл арван хоёрдугаар ангид ороод гэнэт бодол минь өөрчлөгдөж, гэнэт л жүжигчин мэргэжлийг сонгохоор шийдсэн. Ийм мэргэжил сонгож байгаадаа өөрийгөө ч гайхаж байлаа. Нэг инээдтэй түүх ярья. Тухайн үед би нэг хэсэг загварын дугуйланд явдаг байсан юм. Тэгээд загварын дугуйлангийн охидууд Хүүхэд залуучуудын театрын драмын дугуйлангийн хүүхдүүдтэй туршлага солилцох хичээл зохион байгуулахаар болов оо. Очоод хичээлд нь суусан чинь драмын дугуйлангийн хүүхдүүд учир нь ойлгогдохгүй нүүр амаа сонин болгодог дасгалууд, бас түргэн хэллэгүүд хэлээд л юу хийгээд байгааг нь ч мэдэхгүй их инээдтэй санагдаж байсан. Гэтэл хамгийн инээдтэй нь сарын дараа би өөрөө жүжигчний сургуульд шалгалт өгөх болчихсон тэр дугуйландаа очоод өнөө шоолж байсан дасгалаа хамт хийгээд зогсож байсан /инээв/. Ингээд л хамтдаа шүлэг дуугаа бэлдсээр байгаад шалгалтандаа ч тэнцэж жүжигчин мэргэжлээр суралцаж эхэлсэн дээ. Гэнэт сонгож энэ замаар алхах болсон нь хувь тавьлан юм шиг л санагддаг.

"НЭГ ТАЛЫН ТАСАЛБАР" МУСК

Анх сэтгүүлч болох мөрөөдөлтэй байсан

-Оюутан байх хугацаандаа ямар уран бүтээлд орсон бэ. Анх мэргэжлээ сонгох, мэргэжлээрээ сонгоод суралцах хоёр өөр байх даа?

 -Оюутан байх хугацаандаа сургуульдаа олон тайзны бүтээлд оролцож байсан. Гуравдугаар курсдээ найруулагч Б.Гарамхандын киноны туслах дүрд тоглосон. Одоохондоо энэхүү кино нээлтээ хийгээгүй байгаа. Дараа нь ангийнхныхаа байгуулсан "Зэв" продакшны анхны бүтээл "Гэгээн учрал" киноны Яруугийн дүрд тоглосон. Яруу бол надаас огт өөр. Харин "Нэг талын тасалбар" кино бол миний хамгийн анхны гол дүр. Энэ дүр бол айлын ганц, аядуу дөлгөөн охины дүр. Анх урлагийн сургуульд орвол шууд л тайзан дээр гарч том дүрд хувирч жүжиглэдэг байх гэж бодож байсан. Гэтэл яг мэргэжлээр нь сурахад их хөдөлмөр шаарддаг юм билээ. Бид анх нэгдүгээр курсдээ амьтан судлахаас эхэлдэг. Дараа нь үггүй жүжиглэлт хийнэ. Тэгээд хоёрдугаар курсээсээ тайзан дээр үг хэлж, дүрд ажиллаж эхэлдэг.  Эхний хоёр жилд хажуугаар нь ерөнхий эрдмийн хичээл гээд тун завгүй өнгөрсөн. Тэгээд мөн бүжиг, дуу гээд олон талын чадварын хичээл ордог.

"ГЭГЭЭН УЧРАЛ" МУСК

-"Нэг талын тасалбар" кинонд хэрхэн тоглох болсон бэ?

  -Гуравдугаар курсэд байхад би Ц.Гансэрээ найруулагчийн Midnight Ub контентын сонгон шалгаруулалтад оролцож байсан ч тэнцээгүй юм. Харин найруулагч дараагийн кино болох "Нэг талын тасалбар" кинондоо намайг дуудаж проб авсан. Тухайн үед гурван охин шалгаруулалтад оролцсон. Тэгээд би тэнцсэн юм. Анх дүрийн сонгон шалгаруулалт өгөхдөө би дипломын жүжгээ тавиад жаахан хоцорч очиж байсан. Тэгээд шалгаруулалт өгчихөөд гараад явж байхад яагаад ч юм яг л миний дүр юм шиг, би тоглох юм шиг дотно мэдрэмж төрж байсан.

-Энэ кино ямар санааг дэвшүүлэхийг зорьсон бэ. Өөрийнхөө дүрийн талаар хуваалцаач?

-Өсвөр насны охид их үр хөндөлт хийлгэж байгаа. Энэ ч утгаар бид киногоороо дамжуулан үр хөндөлт хийлгэхгүй байгаасай гэсэн санааг хэлэхийг зорьсон. Мөн охид өсвөр насандаа ямар алдаа гаргадаг вэ гэдгийг харуулж, энэ насандаа алдахгүй байх бага ч болов мэдлэг олох болов уу гэж бодож байна. Дүрийн хувьд ээж, аавдаа эрхлээд байдаггүй айлын том охин миний хувьд айлын ганц, эрх охин Аядуугийн дүрд тоглох нь өөр санагдаж байсан. Мөн ээж болж байгаагүй болохоор ээжийн дүрд тоглох нь жаахан эвгүй байсан. Харин кинондоо ороод, зураг авалтын хэсэгтээ ороод явахад, миний хүүхэд болж тоглож байгаа хүүхэд нээрээ миний хүүхэд ч юм шиг санагдсан.

Өсвөр насны охидууд үр хөндөлт хийлгэхгүй байгаасай гэсэн санааг " Нэг талын тасалбар" кино маань гаргахыг зорьсон

 -Үлгэр дууриалал авдаг уран бүтээлч бий юу?

-Улсын драмын эрдмийн театрын Б.Одончимэг жүжигчний тоглосон кино уран бүтээлийг үзэх дуртай. Мөн "Хэцүү анги" киноноос хойш А.Ганчимэг жүжигчинд их дуртай. Гэхдээ хэн нэг хүнийг дууриахаас илүү өөрөөрөө байхыг илүү чухалчилдаг. 

-Жүжигчин бүр театрт орохыг хүсдэг байх. Таны хувьд харин ямар бодолтой байдаг вэ?

-Оюутан байхдаа театрын жүжигчин болохыг боддог байсан. Одоо тэр бодол маань харьцангуй багассан. Гэхдээ шалгалт өгч өөрийгөө сорьж үзнэ гэж бодож байгаа. 

-Ямар дүрд тоглохыг хүсдэг вэ. Сайхан хайрын тухай киноны гол дүр байхыг хүсдэг байх?

 -Түүхэн кинонд дүрээ үлдээх нь миний мөрөөдөл. Мэдээж уран бүтээлч хүн бүр л хайрын сэдэвтэй кинонд тоглохыг хүсдэг байх. Миний хувьд ч мөн адил сайхан хайрын тухай өгүүлсэн кинонд тоглохыг хүсэж байгаа.

-Найз залуутай юу. Хайр гэж таныхаар ямар зүйл вэ?

-Байгаа. Арван жилээс хойш үерхээд одоо зургаан жил болж байна. Хайр гэж зүгээр л хайр. Хайрламааргүй байсан ч хайрлахыг хайр гэх байх /инээв/.Хайр өөрөө их өргөн сэдэв. Үүнийг үгээр тайлбарлаж, тодорхойлох хэцүү байх.

-Цаашдын зорилго, мөрөөдлөөсөө бидэнтэй хуваалцаач?

-Мэдээж залуу уран бүтээлч учир өөрийгөө улам хөгжүүлж, ямар ч тохиолдолд мэргэжлээрээ ажиллах юм сан гэж боддог.

-Ярилцсанд баярлалаа. Цаашдын уран бүтээлд нь амжилт хүсье.

-Баярлалаа. Намайг урьж оролцуулсан танай хамт олонд мөн ажлын амжилт хүсье.