Кино урлагт шинэ содон өнгө төрх, урин салхийг оруулж ирж байгаа  шинэ цагийн уран бүтээлч залуусын буухиа үргэлжилсээр. Хамгийн сүүлд “Кассета” нэртэй кино энэ сарын 16-нд нээлтээ хийлээ. Энэхүү уран бүтээл нь  “Monopolу ТP S”, “Xalx” production хамтын бүтээл юм. Сургуулиа төгсөөд удаагүй залуус ийн хүсэл мөрөөдлөөрөө нэгдэн өөрсдийн сэтгэсэн, найруулсан бүтээлээрээ кино урлагийн ертөнцөд хөл тавьж байна. Чухам энэ салбарт өөрсдийн орон зайтай цааш алхах уу, эндээс нь зогсох уу гэдэг нь тэдний тууштай хөдөлмөр, үзэгчдийн таашаал мэдэх байх. Ингээд дээрх киноны Тогтохын дүрд тоглосон залуу уран бүтээлч Т.Лхагважаргалыг “Шинэ танил” буландаа урилаа.

-Юуны өмнө “Кассета” киногоо нээсэнд баяр хүргэе. Манай уншигчдад өөрийгөө танилцуулна уу?

  -Сайн байна уу. Намайг Тамирын Лхагважаргал гэдэг. Энэ жил Соёл урлагийн их сургуулийг жүжигчин, найруулагч мэргэжлээр төгссөн. Одоо  “Xalx” production-д ажиллаж байна.

-“Кассета” кино сургуулиа төгсөөд тоглож байгаа анхны уран бүтээл нь байх нь. Ямар дүр бүтээсэн бэ?

  -Тийм ээ. Анх удаа үзэгчдийн хүртээл болж, өргөн  дэлгэцээр өөрийгөө харуулсан уран бүтээл. Гэхдээ миний хувьд анхны бүтээл болохоос манай продакшн анхны киногоо үзэгчдийн хүртээл болгож амжаагүй байна. Киноны гол дүр Гангаа бол бусдаас содон, уран яруу шүлэгтэй дуу хийдэг залуу. Харин би чадваргүй хүн хэрхэн амжилтад хүрэх гэж хичээж байгаа дүр.

-Нэрийг нь сонсоход хамгийн түрүүнд хөгжмийн кассет санаанд бууж байна. Нэрний тухайд болон кинонд ямар санаа дэвшүүлэхийг зорьсон бэ. Бусад уран бүтээлээс юугаараа онцлог бол?

  -Манай киноны ерөнхий найруулагчаар “Gangbay” хамтлагийн гишүүн С.Баянмөнх ажилласан. Харин тус хамтлагийн Гангаа киноны гол дүрд ажилласан. Кассета бол гол дүрийн эмэгтэйн нэр юм. Киноны үйл явдал дээр кассет тоглуулагч мэдээж орсон. Манай киноны хэлэх гэсэн санаа бол залуусын хайр дурлал, хөгжмийн мэдрэмжийг харуулахаас гадна буруу зүйлд хөтлөгдвөл ямар байдгийг харуулахыг зорьсон. Хамгийн гол нь энэхүү бүтээл Монголын анхны реп мюзикл кино гэдгээрээ онцлог.

Кассета бол гол дүрийн эмэгтэйн нэр.

-Дөнгөж сургууль төгсөөд уран бүтээлд дүр аваад ажиллах ямар санагдсан. Тогтохын дүр өөртэй нь хэр төстэй вэ. Кино гарснаас хойш хүмүүсээс сэтгэгдэл ирсэн байх?

  -Сургуулиа төгсөөд өөрсдийнхөө хүсэл мөрөөдлөөр жигүүрлэн, өөрсдийн бодож санасан зүйлийг хийхийг зорьсон.  Энэ ч утгаар бүрэн хэмжээний кино хийхийг зорьж ажиллалаа. Дүрийн хувьд бид дээд курсийн уран бүтээлчидтэй хамтран ажилласан. Анх зохиолоо ярьж байхад өөрсдөөсөө нэг дүртэй байя гээд намайг Тогтохын дүрд сонгож, их итгэл хүлээлгэсэн. Тэгэхээр маш хариуцлагатай байхаас гадна анхны дүр болохоор ур чадварын хувьд их хичээж ажилласан. Надаас огт өөр дүр. Кино гарснаас хойш үзэгчдээс магтаал, шүүмжлэл ирж байгаа. Хүмүүсийн сэтгэгдлээс авахыг нь авч дараагийн урам бүтээлээ илүү сайжруулахыг зорьж байна.

-Уран бүтээлч бүр театрт орохыг мөрөөддөг. Таны хувьд ч мөн театрын жүжигчин болон мөрөөдөл бий байх?

 -Мэдээж байлгүй яах вэ. Театрын жүжигчин ур чадварын хувьд их хөгждөг юм шиг санагддаг. Театрын тайзнаас үзэгчдийн алга ташилтыг шууд хүлээн авах мэдрэмж хамгийн сайхан. Үүнийг би оюутан байхдаа мэдэрч байсан юм.

-Уран бүтээлчдийн хэнээс үлгэр дууриалал авдаг вэ?

 -С.Болд-Эрдэнэ, Б.Амарсайхан жүжигчдээс үлгэр дууриалал авдаг. Холливуд Амраа ахын тоглосон кино бүрийг зорьж, үзэж өссөн. Багадаа ганцаараа байх үедээ дууриаж жүжиглэдэг байсан.

-Дараагийн киноны төлөвлөгөө гарсан уу. Цаашдын зорилгоосооо бидэнтэй хуваалцвал?

 -Дараагийн уран бүтээлийн төлөвлөгөө одоохондоо гараагүй байна. Залуу уран бүтээлчдийн хувьд шинэ сэтгэлгээ, шинэ содон зүйлийг Монголын үзэгчдэд хүргэхийг хүсэж байна. Кино урлагийг өнгөц ойлгодог зарим хүнд мэргэжлийн сайн бүтээлээрээ мэргэжлээ, энэ урлагийг ойлгуулахыг хүсдэг.

Кино гарснаас хойш үзэгчдээс магтаал, шүүмжлэл ирж байгаа. Хүмүүсийн сэтгэгдлээс авахыг нь авч дараагийн урам бүтээлээ илүү сайжруулахыг зорьж байна.