Ц.ЦЭЛМЭГ: Эсрэг дүр бүтээхийг хүсдэг

Д. Бямбасүрэн:
Гэрэлт ирээдүй- Шинэ танил

2021-12-16, 2616

"Нарны сүүдэр" киноны гол дүрд тоглосон залуу жүжигчин Ц.Цэлмэгийг "Шинэ танил" буландаа урилаа. Соёл урлагийн их сургуулийн жүжигчний гуравдугаар курсийн оюутан тэрбээр арван жилд байхаасаа эхлэн "Шилжилт","Анхны харц" зэрэг уран бүтээлд тоглоод амжсан юм. Ингээд урлагийн ертөнцөд дөнгөж хөл тавьж буй түүнтэй сая тоглосон кино болон хүсэл мөрөөдлийнх нь талаар ярилцлаа.

-КИНОНД УСАНД СЭЛЭХ, ӨНДӨР ДЭЭР ГАРАХ ХЭСЭГ ХАМГИЙН ХЭЦҮҮ БАЙСАН-

-"Нарны сүүдэр" кинонд хэрхэн тоглох болсноос яриагаа эхэлье?

-Нэг өдөр мэргэжлийн хичээл орж байтал Д.Отгонсүрэн найруулагч орж ирээд хүүхдийн хүчирхийллийн сэдвийг хөндсөн кино хийх гэж байгаа тухай ярьсан юм. Тэгээд гол дүрд нь хүүхэд шалгаруулж авна гээд, ангиас арав гаруй хүүхэд сонгож авч, дүрийн сонгон шалгаруулалт явууллаа. Тэгээд л би сонгогдсон доо. Энэ бол оюутан хүний хувьд том боломж байсан. Тухайн үед гол дүрд сонгогдоод баярлахын зэрэгцээ жаахан эмээсэн. Одоо харин мундаг уран бүтээлч ах, эгч нарынхаа ачаар ард нь гарсандаа баяртай байна.

-Киноны хувьд ямар санааг дэвшүүлэхийг зорьсон бэ?

-Хүчирхийллийн олон хэлбэр болон жендерт суурилсан хүчирхийллийг харуулахыг зорьсон. Хүчирхийлэл гэдэг бол ганц цохиж, зодох зүйл биш. Үйлдэл болоод ятгалга, хүчээр тулгах хэлбэр ч хүчирхийлэл байж болохыг харуулсан. Тухайлбал, ээж, аав нь хүүхдийнхээ хүсэл сонирхлыг асуулгүйгээр өөрсдийн бодож буй мэргэжлээр сургах гээд тулгах нь өөрөө хүчирхийллийн нэг хэлбэр. Үүнийгээ хүчирхийлэл гэдгийг ээж, аавууд өөрсдөө огт мэддэггүй. Энэ санааг "Нарны сүүдэр" киногоор илэрхийлэхийг зорьсон.

-Киноны хамгийн хэцүү зураг авалтын хэсэг аль нь байв?

-Мэдээж хэцүү зүйлс их тохиолдсон. Анх дүрд сонгогдоход найруулагч надаас "Усанд сэлдэг үү", "Өндрөөс айдаг уу" гэж асууж байсан. Усанд сэлж чаддаггүйгээ хэлсэн. Харин урьд нь өндөрт гарч байгаагүй болохоор чадна гээд хэлчихсэн. Гэтэл яг усанд сэлэх үеийн хэсэг дээр ус залгиад, сүүлдээ уйлаад хэсэг юм болж зураг авалтаа дуусгасан. Мөн өндөр гүүрэн дээр гарахад толгой эргээд, дайвалзаад эвгүй санагдсан. Энэ хоёр хэсэг надад хамгийн хэцүү байсан.

-ХҮҮХДИЙН ОРДНЫ ДРАМЫН ДУГУЙЛАНД БАЙСАН МИНЬ ЖҮЖИГЧИН МЭРГЭЖЛИЙГ СОНГОХОД НӨЛӨӨЛСӨН-

-Жүжигчин мэргэжлийг яагаад сонгох болсон бэ?

-Анх жүжигчин болно гэж боддоггүй байсан. Багаасаа шүлэг унших дуртай байсан болохоор хамаатны эгч нар минь нэвтрүүлэгч юм уу жүжигчин болохыг санал болгож байсан. Мөн туранхай болохоор загвар өмсвөл зүгээр гэж хэлдэг байсан. Тэгээд есдүгээр ангидаа Хүүхдийн ордны драмын дугуйланд явснаар урлагийн хүн болох, тэр дундаа жүжигчин мэргэжил их сайхан санагдсан. Тэгээд л эргэлт буцалтгүйгээр энэ мэргэжлийг сонгохоор шийдсэн юм.

-Жүжигчин болно гэж бодож байсан үеэс, энэ мэргэжлээр сураад, номын дуу сонсоод ирэхээр ямар санагдсан бэ?

-Мэдээж бодол, бодит зүйл хоёр өөр зүйл. Төсөөлснөөс хэцүү зүйлс их тулгарсан. Хүүхдийн ордны драмын дугуйланд явдаг байсан болохоор дүрийн талаар анхны ойлголттой байсан. Багш нарын минь онолын хичээлээс гадна практик хамгийн чухал юм билээ. Харин сая "Нарны сүүдэр" кинонд дүр гэдэг зүйлийг илүү ойлгож, кино уран бүтээлийн бүтцийг мэдэж авлаа. Энэ бол миний хувьд том сургууль болсон.

-Үлгэр дууриалал авдаг уран бүтээлч бий байх?

-Ж.Оюундарь багшаас их үлгэр дууриалал авдаг. Нэг, хоёрдугаар курсэд хичээл ордог байсан. Ер нь тэгээд багш нараасаа их үлгэр дуурайлал авна. Мөн сая кинонд хамтран ажилласан туршлагатай жүжигчдээс их суралцсан. Тухайлбал, Г.Нарансолонго эгчийн зохиол дээрээ ажиллаж байгаа байдал зэрэг сурч, мэдэх зүйл их байсан.

Багш нараасаа их үлгэр дуурайлал авна

-Ямар дүрд тоглохыг хүсдэг вэ?

-"Арван найман нас би чамд хайртай" кино шиг хайр дурлалын кинонд тоглох сон гэж боддог. Мөн эсрэг дүрд тоглохыг хүсдэг.

-Мэргэжлээсээ өөр сонирхол бий юу?

-Мэргэжлээсээ өөр сонирхол одоохондоо байхгүй. Хүнтэй харилцдаг мэргэжил сайхан санагддаг. Аравдугаар ангиасаа хойш жүжигчний мэргэжлээс өөр зүйл бодож байгаагүй.

-Цаашдын зорилго, мөрөөдлөөсөө хуваалцвал?

-Эхний ээлжид сургуулиа амжилттай төгсөөд, гадаад явж сурах төлөвлөгөөтэй байгаа.