Энэ удаагийн “Шинэ танил” буландаа залуу уран бүтээлч Ө.Анандыг урилаа. Тэрбээр  2017 онд Соёл урлагийн их сургуулийг жүжигчнээр төгссөн бөгөөд тун саяхан “Мөнхийн эхлэл” нэртэй контентын нэгдүгээр ангийг бүх IPТV-д оруулаад байгаа юм. Ингээд түүнтэй уран бүтээлийнх нь талаар ярилцлаа.

-“Мөнхийн эхлэл” шинэ уран бүтээл үзэгчдийн хүртээл боллоо. Энэ киноны талаар яриагаа эхэлье?,

                        -МУГЖ агсан Л.Дэмидбаатар багштайгаа ярилцаж байгаад анх 2018 онд киноныхоо  зохиолын талаар ярилцаж, бичигдэж эхэлсэн. Түүнээс хойш зохиол нь бичигдсээр өнгөрсөн онд эхний хоёр ангийн зураг авалтдаа орсон. Одоо эхний анги нь бүх кино сангуудаар гарч эхэлсэн. Хоёрдугаар анги  нь дараагийн шатандаа  явагдаж байна.

-Зохиолын хувьд ямар санааг илэрхийлэхийг зорьсон бэ?

             -Гэр бүлийн сэдвийг хөндөн, зохиолоо бичсэн. Айл гэр бүхэн өөр уур амьсгалтай, өөр өөрсдийн асуудалтай. Тухайлбал, зарим гэр бүлд хүсээд ч хүүхэд төрөхгүй байхад, заримд нь хүсээгүй байхад хүүхэд ирдэг. Хамгийн гол нь хүний сэтгэл дэх эмзэглэлээр дамжуулж  гэр бүл болж байгаа гэсэн санааг илэрхийлэхийг зорьсон. Мөн эцсийн мөчид хүний амьдралд гэр бүл л хамгийн чухал байдаг бөгөөд хүн бүрийн амьдрал гадна харагдаж байгаа шиг ээ биш гэдгийг мөн энэхүү бүтээлээрээ дуугарахыг хичээсэн.

-Кино багийн баг бүрэлдэхүүний хувьд хэчнээн уран бүтээлчид оролцсон бэ. Зураг авалт хэдий хэр хугацаанд хийгдсэн бэ?

           -Зураг авалт маш богинохон хугацаанд хийгдсэн. Нийт 20 гаруй хүний бүрэлдэхүүнтэй ажилласан. Үе үеийн шавь нар нь оролцон тоглосноороо онцлог. Энэ ташрамд хамтран ажилласан үе тэнгийн найзууд болон нийт уран бүтээлчид кино багийнхандаа баярлалаа.

-Сэдвийн хувьд багштайгаа ярьж сонгохоос гадна танд мөн энэ сэдвийг хөндье гэсэн эмзэглэл байсан байх?

            -Би аавыгаа 2009 онд алдсан юм. Орон зайгүй болдог юм билээ. Тэгээд ч надад хамгийн түрүүнд цаашид гэр бүлээ хэрхэн авч явах вэ гэсэн бодол төрсөн. Энэ ч утгаар дотоод сэтгэлийнхээ эмзэглэлд хөтлөгдөж энэ сэдвээр кино хийе, олон залууст амьдралаа авч явах гарц, гаргалгааг нь олж өгье гэсний үүднээс зохилоо бичиж эхэлсэн.

-“Мөнхийн эхлэл” гэж ямар утгаар нэрлэсэн бэ?

          -Хүний амьдралын мөнхөд үргэлжлэх зүйл бол гэр бүл, үр хүүхэд. Хүн эхэлсэн ч төгссөн ч ер хаана ч явсан эцсийн мөчид гэр бүлдээ л үлдэнэ гэсэн санаагаар “Мөнхийн эхлэл” гэж нэрлэсэн.

-Багштайгаа хамтарч хийсэн гэдгээрээ онцлог. Энэ хугацаанд багшаасаа сурсан мэдсэн зүйл олон байх?

          -Багш их зарчимч хүн. Олон жил багшилсан болохоор сурах зүйл ихтэй. Мөн их сайхан сэтгэлтэй.Би ч багшаасаа сурсан зүйлээ дараагийн уран бүтээлүүддээ анхаарч ажиллана. Сурсан зүйлүүд их байгаа Алтны дэргэд гууль шарлана гэдгийн адилаар  цагийн юмыг цагт нь хийх зарчимчаас нь суралцсан. Мөн маш сайхан сэтгэлтэй, хал нь гаднаа хайр нь дотроо хүн. Уран бүтээлээс бусад үед найзууд шиг, аав шиг байдаг. Анх сургууль төгсөхдөө багшдаа кино хийх санаагаа хэлж байсан нь саяхан мэт санагдаж байна. Харин  багш их дэмжиж, надад итгэл хүлээлгэсэн болов уу гэж боддог. Үүгээрээ цаашид олон зүйлийг хийж бүтээгээсэй гэсэн захиас байх.

-Кино гараад эхэлсэн. Үзэгчдээ мэдээж сэтгэгдэл ирсэн байх. Киноны зохиолч, найруулагчийн хувьд үзэгчид киноноос ийм л зүйлийг хараасай гэсэн зүйл бий юу?

           -“Мөнхийн эхлэл” контентийг үзээд хүмүүс амьдралдаа хаана алдаж байгаагаа, хэнийг гомдоосноо олж хараасай гэж хүсэж байна. Мөн гэр бүлээ хүн хэрхэн чандлан сахих ёстой вэ гэдгийг ойлгоосой гэж бодож байна. Гэхдээ хүмүүс өөр өөрийнхөөрөө үзэж, тунгаах биз ээ.  Тэгээд  "Таны гэр бүл таны мөнхийн эхлэл" шүү хэмээн хэлсэн багшийнхаа үгээр яриагаа өндөрлөе.