“Ертөнцийн юм бүхэн санаа. Бидний төсөөлсөн төсөөлөл өөр нэг ертөнцөд жинхэнэ байхыг үгүйсгэх аргагүй” хэмээн өгүүлэх өдгөө 24 настай комик зураач Б.Тэлмэнг энэ удаагийн “Шинэ танил” буландаа урьж, оролцууллаа.

Тэрбээр Дүрслэх, дизайн урлагийн дээд сургуулийн зураасан зургийн ангийг төгсжээ. Түүний зургууд нь төсөөллийн ертөнцөөс бодит амьралд бууж, цаасан дээр амилж, тэр өөрөө бүтээл дотроо амьдардаг. Ингээд уншигч тантай түүнийг уулзуулж байна.

-Хэзээнээс эхлэн комикийн төрлөөр зурж эхэлсэн бэ?

   -Багаасаа зурагт дуртай байсан. Яг тодорхой эхэлсэн үеэ санадаггүй. Сүүлийн жилүүдэд комик номд түлхүү ажиллаж байна. Комик миний хувьд цаасан дээрх кино. Би адал явдалтай зохиол болон кинонд дуртай. Адал явдал гэдэг бол уншигч болон үзэгчийг сонирхолтой, амттай үйл явдлаараа хөтөлж, цааш илүү үзэх, унших сэдлийг төрүүлдэг. Комик бол энэ бүхний цаасан дээрх хувилбар. Энэ ч утгаар надад их ойр санагдаж, комик төрлийг сонгон, зурдаг. Зурж байгаа зургаараа ч энэхүү санаагаа илэрхийлэхийг зорьдог. 

-Гол үүрэг роль нь төсөөлөл байх. Өөрөө ихэвчлэн зохиож, бодож, төсөөлж зурдаг уу?

-Мэдээж төсөөлөл бол комик зураачийн гол зэвсэг. Төсөөллөөс л бүтээл төрнө. Би ч бодож, төсөөлөх дуртай. Төсөөлөл  бол миний хувьд  нэг агшинд байх боломжтой бүхий л хувилбарын давхцал. Учир нь бидний  энд төсөөлсөн төсөөлөл өөр нэг ертөнцөд жинхэнэ байхыг үгүйсгэх аргагүй. Тиймээс амьд мэт төсөөлж, төсөөллөө барьж, амталж үзэх нь комик зураачийн гол зүйл.

-Зургаараа үзэсгэлэн гаргаж байсан уу. Өөрийн илэрхийлж байгаа зүйлээ хүмүүст хүргэх тал дээр хэрхэн ажилладаг вэ?

  -Өнөөдрийг хүртэл ямар нэгэн үзэсгэлэн гаргаж байгаагүй ч “Мост” гэх манга сэтгүүлд гурван богино хэмжээний комик уран бүтээлээ нийтэлсэн. Өөрөөр бол сошиал хаягтаа зурсан зургаа байршуулах л байна. Мөн дотны хүмүүстээ зураг зурж бэлэглэх.

-Уран бүтээлийн санаа хамгийн чухал байдаг шүү дээ. Хэрхэн санаагаа олдог вэ?

   -Эргэн тойронд орших юм  бүхнээс санаа төрнө. Ертөнцийн юм бүхэн санаа. Бид амьдралын хором, мөч бүрийн сайхныг мэдэх завгүй амьдарсаар, ахуй орчноос урган гарах санааг үл анзаардаг. Угтаа юм бүхэн хязгааргүй санааг өгч, бүтээл болгох сэдвийг өгдөг. Тухайлбал, навч хэрхэн унах, борооны чимээ, шувуудын жиргээ гээд олж, харж сонсвол бодож, ажиглах, эргэцүүлэх зүйлс түм бумаараа байна. Ихэвчлэн би гэр, өрөө, ой зэрэг нам гүм орчинд зургаа зурах дуртай.

-Зураг бүхэн өөр өөрийн түүхтэй бүтдэг байх.  Хамгийн гунигтай, баяртай үедээ зурсан зургаасаа хуваалцвал?

  -Энэ миний анхны комик. Эндээс их ч зүйл сурсан. Зохиолыг нь их гуниг мэдэрч бичсэн. Харин миний бичиж байсан хамгийн хайртай зохиол бол “Цаглашгүй” нэрт зураг. Мөн саяхан “мэндэлсэн” “Зүүд” зурагтаа их дуртай.

-Залуу комик зураачийн хувьд Монголд комик зураг хэр хөгжиж байгаа санагддаг вэ?

-Монголд гаргадаг комикуудыг үнэнийг хэлэхэд уншиж үзээгүй. Гэхдээ миний сүүлд орсон ажлын газар “Ногун” нэртэй комик гаргаж байсан юм билээ. Түүнийг уншиж үзээд их таалагдсан. Над шиг байгальд хайртай, адал явдалтай зохиол сонирхдог хүн, хүүхдэд гарцаагүй таалагдах бүтээл болсон байна билээ.

-Цаашид зорьж, тэмүүлж байгаа зүйлс олон байх?

 -Хэрэв энэ миний хийж чадах зүйл бол би цаашид дэлхийд биш гэхэд эргэн тойрныхоо хүмүүст , тэдний хамгийн их дутагддаг, сэтгэлд нь байх бяцхан дөлийг бэлэглэмээр санагддаг. Энэ бол амьдралын хамгийн чухал орц. Хүн бүрт амьдралд шантрахгүйн тулд урдах замд нь түлхэж өгдөг хүч бий.  Үүнийг урлагаар дамжуулан хүмүүст хүргэвэл маш хүчтэй сэтгэл анагаах эм байх болно.

   Түүний ертөнцийг харах өнцөг, хүсэл мөрөөдөл, дотоод сэтгэл их хил хязгааргүй, гүн гэдгийг уншигч та анзаарсан болов уу. Тун удахгүй нэрээ гаргасан Монголын нэгэн комик зураач тэр байна гэдэгт эргэлзэхгүй байна. Тэр зорьж яваа...